ಬಾಯಿಯ ಆರೋಗ್ಯ ಕಳಪೆಯಾಗಿರುವುದರಿಂದ ಕೋವಿಡ್‌ ಅಪಾಯ ಹೆಚ್ಚುತ್ತದೆಯೇ?

Team Udayavani, Nov 15, 2021, 4:35 PM IST

ಕೋವಿಡ್‌-19ನ ಬಹುವಿಧದ ಪರಿಣಾಮಗಳು ಹಾಗೂ ಹಲ್ಲುಗಳು, ವಸಡುಗಳು ಮತ್ತು ಬಾಯಿಯ ಕುಹರದ ಮೇಲೆ ಅದು ಬೀರಬಹುದಾದ ಪರಿಣಾಮಗಳ ಬಗ್ಗೆ ವೈದ್ಯರು ಮತ್ತು ಸಂಶೋಧಕರು ಅಧ್ಯಯನಗಳನ್ನು ನಡೆಸುತ್ತಲೇ ಇದ್ದಾರೆ. ಶ್ವಾಸಾಂಗವನ್ನು ಅಲ್ಪಾವಧಿಯಲ್ಲಿ ತೀವ್ರವಾಗಿ ಕಾಡುವ ಅನಾರೋಗ್ಯವಾಗಿರುವ ಕೋವಿಡ್‌ ವೈರಸ್‌ 2 (ಸಾರ್ -ಕೊವ್‌-2) ಕೊರೊನಾ ವೈರಾಣು 2019 ಕಾಯಿಲೆ (ಕೋವಿಡ್‌-19)ಗೆ ಕಾರಣವಾಗಿದೆ.

ಬಾಯಿಯ ಆರೋಗ್ಯ ಮತ್ತು ಕೋವಿಡ್‌-19 ನಡುವಣ ಸಂಬಂಧಗಳನ್ನು ಈ ಲೇಖನದಲ್ಲಿ ಚರ್ಚಿಸಲಾಗಿದೆ.

ಸಂಬಂಧ ಇದೆಯೇ?
ಕೋವಿಡ್‌-19ನಿಂದಾಗಿ ಬಾಯಿಯ ಅನಾರೋಗ್ಯಗಳು ಉಂಟಾಗುತ್ತದೆ ಎಂಬುದು ಹೆಚ್ಚು ವೈಜ್ಞಾನಿಕ ಸಾಕ್ಷ್ಯಾಧಾರಗಳು ಲಭ್ಯವಾಗಿಲ್ಲ. ಆದರೆ 2021ರಲ್ಲಿ ನಡೆಸಲಾದ ಒಂದು ಅಧ್ಯಯನವು ಬಾಯಿಯ ಆರೋಗ್ಯವು ಕಳಪೆಯಾಗಿದ್ದರೆ ಅದರಿಂದ ಕೋವಿಡ್‌-19 ಸೋಂಕು ತಗಲುವ ಸಾಧ್ಯತೆ ಹೆಚ್ಚಬಲ್ಲುದು ಎಂದು ಹೇಳಿದೆ.

ಸಾರ್ಸ್‌ -ಕೊವ್‌-2 ವೈರಾಣುಗಳು ದೇಹವನ್ನು ಪ್ರವೇಶಿಸಲು ಬಾಯಿ ಪ್ರವೇಶ ದ್ವಾರ ಆಗಬಹುದು ಎಂಬುದಾಗಿ ಈ ಅಧ್ಯಯನವು ಹೇಳಿದೆ. ಏಕೆಂದರೆ, ನಾಲಗೆ, ವಸಡು ಮತ್ತು ಹಲ್ಲುಗಳಲ್ಲಿ ಆ್ಯಂಜಿಯೊಟೆನ್ಸಿನ್‌ -ಕನ್ವರ್ಟಿಂಗ್‌ ಕಿಣ್ವ-2 (ಎಸಿಇ2)ಗಳು ಇರುತ್ತವೆ. ಇದು ಸಾರ್ಸ್‌ -ಕೊವ್‌-2 ವೈರಾಣು ಅಂಗಾಂಶಗಳಿಗೆ ಪ್ರವೇಶ ಪಡೆಯಲು ಅನುವು ಮಾಡಿಕೊಡುವ ಕಿಣ್ವವಾಗಿದೆ. ಬಾಯಿಯ ಆರೋಗ್ಯ ಕಳಪೆಯಾಗಿರುವವರಲ್ಲಿ ಎಸಿಇ2 ರೆಸಿಪ್ಟರ್‌ಗಳು ಹೆಚ್ಚಿರುವುದು ಕಂಡುಬಂದಿದೆ. ಬಾಯಿಯ ನೈರ್ಮಲ್ಯವು ಸರಿಯಿಲ್ಲದೆ ಇದ್ದರೆ ಬ್ಯಾಕ್ಟೀರಿಯಾಗಳು ಬಾಯಿಯಿಂದ ಶ್ವಾಸಕೋಶಕ್ಕೆ ಪ್ರವೇಶಿಸುವ ಸಾಧ್ಯತೆ ಹೆಚ್ಚುತ್ತದೆ ಎಂಬುದಾಗಿ ಇನ್ನೊಂದು ಲೇಖನವು ಹೇಳಿದೆ.

ಇದರಿಂದ ಕೋವಿಡ್‌-19ನ ಜತೆಗೆ ಬ್ಯಾಕ್ಟೀರಿಯಾ ಸೋಂಕು ಕೂಡ ಉಂಟಾಗುವ ಸಾಧ್ಯತೆಗಳು ಹೆಚ್ಚುತ್ತವೆ. ಕೋವಿಡ್‌-19 ಮತ್ತು ಜಿಂಜಿವೈಟಿಸ್‌ ಜಿಂಜಿವೈಟಿಸ್‌ ಎಂದರೆ ವಸಡುಗಳ ಉರಿಯೂತ.

ಜಿಂಜಿವೈಟಿಸ್‌ನ ಕೆಲವು ಲಕ್ಷಣಗಳೆಂದರೆ:

• ವಸಡುಗಳು ಕೆಂಪಾಗಿ ಊದಿಕೊಂಡಿರುವುದು
• ಹಲ್ಲುಜ್ಜುವಾಗ ಅಥವಾ ಫ್ಲಾಸ್‌ ಮಾಡುವಾಗ ವಸಡುಗಳಿಂದ ರಕ್ತಸ್ರಾವ
• ಉಸಿರಿನ ದುರ್ವಾಸನೆ
• ಬಾಯಿಯಲ್ಲಿ ಕೆಟ್ಟ ರುಚಿ

ಬಾಯಿಯ ನೈರ್ಮಲ್ಯ ಚೆನ್ನಾಗಿಲ್ಲದೆ ಇದ್ದರೆ ಬ್ಯಾಕ್ಟೀರಿಯಾ ಸಂಗ್ರಹವಾಗುತ್ತದೆ. ಇವು ಹಲ್ಲು ಮತ್ತು ವಸಡುಗಳಿಗೆ ಅಂಟಿಕೊಂಡು ಸಂಗ್ರಹವಾಗುತ್ತವೆ. ಇದು ಜಿಂಜಿವೈಟಿಸ್‌ಗೆ ಸಾಮಾನ್ಯವಾದ ಕಾರಣವಾಗಿದೆ. 2021ರಲ್ಲಿ ವರದಿಯಾದ ಒಂದು ಪ್ರಕರಣದ ಅಧ್ಯಯನಗಾರರು ಕೋವಿಡ್‌-19ನಂತಹ ದಣಿವು ಮತ್ತು ಅಶಕ್ತಿಗೆ ಕಾರಣವಾಗುವ ಕಾಯಿಲೆಗಳಿಗೆ ತುತ್ತಾದವರು ಬಾಯಿಯ ನೈರ್ಮಲ್ಯವನ್ನು ಸರಿಯಾಗಿಟ್ಟುಕೊಳ್ಳದೆ ಇರುವ ಸಾಧ್ಯತೆ ಹೆಚ್ಚು ಎಂದು ವರದಿ ಮಾಡಿದ್ದಾರೆ.

ಇದರಿಂದ ಹಲ್ಲುಗಳು ಪಾಚಿಕಟ್ಟುವುದು ಹೆಚ್ಚುತ್ತದೆ ಮತ್ತು ಜಿಂಜಿವೈಟಿಸ್‌ ಉಂಟಾಗುವ ಸಾಧ್ಯತೆ ಅಧಿಕವಾಗುತ್ತದೆ. ವಸಡುಗಳಿಂದ ರಕ್ತಸ್ರಾವವಾಗುವುದು ಕೋವಿಡ್‌-19ನ ಒಂದು ಲಕ್ಷಣವಾಗಿರಬಹುದು ಎಂಬುದಾಗಿಯೂ ಅಧ್ಯಯನಗಾರರು ಹೇಳಿದ್ದಾರೆ.

ಕೋವಿಡ್‌-19 ಸೋಂಕು ಕಡಿಮೆಯಾದ ಬಳಿಕ ಜಿಂಜಿವೈಟಿಸ್‌ ಲಕ್ಷಣಗಳು ಕಡಿಮೆಯಾಗಿರುವುದನ್ನು ಅವರು ಗಮನಿಸಿ ವರದಿ ಮಾಡಿದ್ದಾರೆ. ಆದರೆ ಈ ಎಲ್ಲ ವರದಿಗಳಿಂದ ಕಂಡುಕೊಂಡಿರುವ ಅಂಶಗಳು ಕೆಲವೇ ವ್ಯಕ್ತಿಗಳನ್ನು ಆಧರಿಸಿವೆ.

ಇದನ್ನು ಖಚಿತಪಡಿಸಿಕೊಳ್ಳುವುದಕ್ಕೆ ಹೆಚ್ಚು ಜನಸಂಖ್ಯೆಯನ್ನು ಒಳಗೊಂಡ ವಿಸ್ತೃತ ಅಧ್ಯಯನದ ಅಗತ್ಯವಿದೆ. ಆದರೂ ಕೋವಿಡ್‌-19 ಸಾಂಕ್ರಾಮಿಕ ಇನ್ನೂ ಪೂರ್ಣವಾಗಿ ಮರೆಯಾಗದ ಈ ಕಾಲಘಟ್ಟದಲ್ಲಿ ಬಾಯಿಯ ಆರೋಗ್ಯ ಮತ್ತು ನೈರ್ಮಲ್ಯವನ್ನು ನಿರ್ಲಕ್ಷಿಸದೆ ಉತ್ತಮ ಅಭ್ಯಾಸಗಳನ್ನು ರೂಢಿಸಿಕೊಂಡು ಚೆನ್ನಾಗಿಟ್ಟುಕೊಳ್ಳುವುದು ಉತ್ತಮವೂ ಸುರಕ್ಷಿತವೂ ಆಗಿದೆ.

ಡಾ| ಆನಂದದೀಪ್‌ ಶುಕ್ಲಾ
ಅಸೋಸಿಯೇಟ್‌ ಪ್ರೊಫೆಸರ್‌, ಓರಲ್‌ ಮತ್ತು ಮ್ಯಾಕ್ಸಿಲೊಫೇಶಿಯಲ್‌ ಸರ್ಜರಿ ವಿಭಾಗ
ಎಂಸಿಒಡಿಎಸ್‌, ಮಾಹೆ, ಮಣಿಪಾಲ