ಪಾಕ್‌ ಏಕದಿನ ನಾಯಕತ್ವಕ್ಕೆ  ಅಜರ್‌ ಅಲಿ ರಾಜೀನಾಮೆ

Team Udayavani, Feb 10, 2017, 3:45 AM IST

ಕರಾಚಿ: ಅಜರ್‌ ಅಲಿ ಪಾಕಿಸ್ಥಾನ ಏಕದಿನ ತಂಡದ ನಾಯಕತ್ವಕ್ಕೆ ರಾಜೀನಾಮೆ ಸಲ್ಲಿಸಿದ್ದಾರೆ. ಸತತ ಕಳಪೆ ನಿರ್ವಹಣೆಯಿಂದಾಗಿ ಅವರು ಈ ನಿರ್ಧಾರಕ್ಕೆ ಬಂದಿದ್ದಾರೆ. ಅವರ ಬದಲಿಗೆ ಸಫ‌ìರಾಜ್‌ ಅಹ್ಮದ್‌ ಅವರನ್ನು ಆಯ್ಕೆ ಮಾಡಲಾಗಿದೆ ಎಂಬುದನ್ನು ಪಾಕಿಸ್ಥಾನ ಕ್ರಿಕೆಟ್‌ ಮಂಡಳಿ (ಪಿಸಿಬಿ) ಚೇರ್ಮನ್‌ ಶಹರ್ಯಾರ್‌ ಖಾನ್‌ ದೃಢಪಡಿಸಿದ್ದಾರೆ.

ಕಳೆದ ವರ್ಷದ ಸಪ್ಟೆಂಬರ್‌ನಲ್ಲಿ ಇಂಗ್ಲೆಂಡಿನಲ್ಲಿ 1-4 ಅಂತರದಿಂದ ಪಾಕಿಸ್ಥಾನ ಸೋಲನ್ನು ಕಂಡ ಬಳಿಕ ಅಜರ್‌ ಅಲಿ ಅವರ ನಾಯಕತ್ವ ಹುದ್ದೆಗೆ ಗಂಭೀರ ಅಪಾಯ ಎದುರಾಗಿತ್ತು.  ಆದರೆ ಸಪ್ಟೆಂಬರ್‌-ಅಕ್ಟೋಬರ್‌ನಲ್ಲಿ ಯುಎಇನಲ್ಲಿ ವೆಸ್ಟ್‌ಇಂಡೀಸ್‌ ವಿರುದ್ಧ ಸರಣಿ ಕ್ಲೀನ್‌ಸಿಪ್‌ಗೆçದ ಕಾರಣ ಅವರನ್ನು ಉಳಿಸಿಕೊಳ್ಳಲಾಗಿತ್ತು.

ಅಲಿ ನನ್ನಲ್ಲಿಗೆ ಬಂದು ನಾಯಕತ್ವದ ಜವಾಬ್ದಾರಿಯಿಂದ ಬ್ಯಾಟಿಂಗ್‌ ಫಾರ್ಮ್ಗೆ ಅಡ್ಡಿಯಾಗುತ್ತಿದೆ. ಹಾಗಾಗಿ ಹುದ್ದೆಯಿಂದ ಕೆಳಗಿಳಿಯಲು ಬಯಸಿದ್ದೇನೆ ಎಂದು ಹೇಳಿದರು. ಹಾಗಾಗಿ ನಾವು ಏಕದಿನ ತಂಡದ ನಾಯಕರಾಗಿ ಸಫ‌ìರಾಜ್‌ ಅಹ್ಮದ್‌ ಅವರನ್ನು ನೇಮಕ ಮಾಡಿದೆವು ಎಂದು ಖಾನ್‌ ತಿಳಿಸಿದರು.

ಏಕದಿನ ನಾಯಕತ್ವ ವಹಿಸಲು ಸಫ‌ìರಾಜ್‌ ಒಪ್ಪಿಗೆ ಸೂಚಿಸಿದ್ದಾರೆ. ಅವರು ಈಗಾ ಗಲೇ ಟ್ವೆಂಟಿ-20 ತಂಡದ ನಾಯಕತ್ವ ವಹಿಸಿಕೊಂಡಿದ್ದಾರೆ. 2015ರ ವಿಶ್ವಕಪ್‌ನಲ್ಲಿ ಕ್ವಾರ್ಟರ್‌ಫೈನಲ್‌ನಲ್ಲಿ ತಂಡ ನಿರ್ಗಮಿಸಿದ ಬಳಿಕ ಏಕದಿನ ಕ್ರಿಕೆ‌ಟ್‌ನಿಂದ ಮಿಸ್ಬಾ ಉಲ್‌ ಹಕ್‌ ನಿವೃತ್ತಿಯಾದ ಕಾರಣ ಅಜರ್‌ ಅಲಿ ಅವರನ್ನು ಆಶ್ಚರ್ಯಕರ ರೀತಿಯಲ್ಲಿ ನಾಯಕರನ್ನಾಗಿ ನೇಮಕ ಮಾಡಲಾಗಿತ್ತು. ಅವರ ನಾಯಕತ್ವದಲ್ಲಿ ತಂಡ ಕಳಪೆ ನಿರ್ವಹಣೆ ನೀಡುತ್ತ ಬಂದಿದ್ದು ಆಡಿದ 31 ಏಕದಿನ ಪಂದ್ಯಗಳಲ್ಲಿ ಕೇವಲ 12ರಲ್ಲಿ ಜಯ ಸಾಧಿಸಿದ್ದರೆ 18ರಲ್ಲಿ ಸೋಲನ್ನು ಕಂಡಿತ್ತು. ಮಳೆಯಿಂದ ಒಂದು ಪಂದ್ಯದಲ್ಲಿ ಫ‌ಲಿತಾಂಶ ಬಂದಿರಲಿಲ್ಲ.