ಪಾಕ್ ಉಗ್ರರ ಉತ್ಪಾದನಾ ಘಟಕ : ವಿಶ್ವಸಂಸ್ಥೆಯಲ್ಲಿ ಭಾರತ
Team Udayavani, Sep 19, 2017, 9:18 AM IST
ಜಿನೆವಾ : ತನ್ನ ನೆಲದಲ್ಲಿ ನಿರಂತರ ಉಗ್ರ ಚಟುವಟಿಕೆಗಳನ್ನು ನಡೆಸುತ್ತಿರುವ ಪಾಕಿಸ್ಥಾನಕ್ಕೆ ಭಾರತ ವಿಶ್ವಸಂಸ್ಥೆಯಲ್ಲಿ ಚಾಟಿಯೇಟು ನೀಡಿದ್ದು,’ಅಂತರಾಷ್ಟ್ರೀಯ ಭಯೋತ್ಪಾದನೆಯ ಮುಖವಾಗಿರುವ ಪಾಕ್ ಉಗ್ರ ಉತ್ಪಾದನಾ ಘಟಕ’ ಎಂದು ಜರಿದಿದೆ.
ವಿಶ್ವಸಂಸ್ಥೆಯ 36 ನೇಯ ಮಾನವ ಹಕ್ಕುಗಳ ಸಮಿತಿಯ ಸಭೆಯಲ್ಲಿ ಮಾತನಾಡಿದ ಐಎಫ್ಎಸ್ ಅಧಿಕಾರಿ ವಿಷ್ಣು ರೆಡ್ಡಿ ‘ಭಯೋತ್ಪಾನಾ ಕೃತ್ಯಗಳು ಅಂತ್ಯವಾಗಬೇಕಾದರೆ ಪಾಕ್ ಮೊದಲು ಉಗ್ರ ಉತ್ಪಾದನಾ ಘಟಕಗಳನ್ನು ಸ್ಥಗಿತಗೊಳಿಸಬೇಕು’ ಎಂದು ಕಿಡಿ ಕಾರಿದ್ದಾರೆ.
‘ಅಂತರಾಷ್ಟ್ರೀಯ ಮಟ್ಟದಲ್ಲಿ ನಿಷೇಧಕ್ಕೊಳಗಾಗಿರುವ ಲಷ್ಕರ್ -ಎ-ತೋಯ್ಬಾ, ಜೈಶ್-ಎ -ಮೊಹಮದ್ನಂತಹ ಉಗ್ರ ಸಂಘಟನೆಗಳು ಪಾಕ್ನಲ್ಲಿ ಕಾರ್ಯಚರಿಸುತ್ತಿರುವ ಬಗ್ಗೆ ಅಲ್ಲಿನ ವಿದೇಶಾಂಗ ಸಚಿವರೂ ಒಪ್ಪಿಕೊಂಡಿದ್ದಾರೆ. ಅವುಗಳನ್ನು ಮೊದಲು ಸ್ಥಗಿತಗೊಳಿಸಬೇಕು ಮತ್ತು ಉಗ್ರವಾದಿಗಳನ್ನು ಶಿಕ್ಷಿಸಿ ವಿಶ್ವಕ್ಕೆ ನ್ಯಾಯ ಒದಗಿಸಲಿ’ ಎಂದು ರೆಡ್ಡಿ ಆಗ್ರಹಿಸಿದರು.
‘ಕಾಶ್ಮೀರದಲ್ಲಿನ ಉಗ್ರ ಚಟುವಟಿಕೆಗಳಿಗೆ ಪಾಕ್ ನೆರವು ನೀಡುತ್ತಿರುವುದು ಸ್ಪಷ್ಟವಾಗಿದೆ’ ಎಂದ ರೆಡ್ಡಿ ‘ಕಾಶ್ಮೀರ ಭಾರತದ ಅವಿಭಾಜ್ಯ ಮತ್ತು ಅವಿಚ್ಛಿನ್ನ ಅಂಗವಾಗಿಯೇ ಉಳಿಯಲಿದೆ’ ಎಂದು ಪುನರುಚ್ಚರಿಸಿದರು.