ಫೆರಾರಿ ಕದ್ದರೂ, ಪರಾರಿ ಆಗದೇ ಸಿಕ್ಕಿಬಿದ್ದ!

Team Udayavani, Dec 4, 2017, 5:50 AM IST

ಕಳ್ಳರಿಗೆ ಸಾಮಾನ್ಯ ಜ್ಞಾನ ಇಲ್ಲದಿದ್ರೆ ಏನಾಗುತ್ತೆ ಅನ್ನೋದಕ್ಕೆ ಈತನೇ ಸಾಕ್ಷಿ. ಇಸ್ರೇಲ್‌ನಲ್ಲೊಬ್ಬ ಕಳ್ಳ ಭರ್ಜರಿ ಕಾರಿಗೇ ಕೈ ಹಾಕಿ, ಕಳ್ಳತನ ಮಾಡಿದ್ದಾನೆ. ಆದರೆ, ಅದಕ್ಕೆ ಪೆಟ್ರೋಲ್‌ ಹಾಕುವಾಗ, ಟ್ಯಾಂಕ್‌ ಮುಚ್ಚಳ ತೆಗೆಯಲೂ ಗೊತ್ತಿಲ್ಲದೇ ಪೇಚಾಡಿ ಸಿಕ್ಕಿಬಿದ್ದಿದ್ದಾನೆ. ಫೆರಾರಿ ಕಾರಿನ ಮಾಲೀಕರೊಬ್ಬರು ಯಾವುದೋ ಮರೆವಿನಲ್ಲಿ ಕಾರಿನ
ಕೀಯನ್ನು ಸೀಟಿನಲ್ಲೇ ಬಿಟ್ಟು ಹೋಗಿದ್ದರು. ಸಿಕ್ಕಿದ್ದು ಛಾನ್ಸ್‌ ಎಂದುಕೊಂಡ ಕಳ್ಳ ಪೆರೆಜ್‌ ರ್‍ಯಾಂಜೆಲ್‌, ಕೂಡಲೇ ಕಾರನ್ನು ಓಡಿಸಿಕೊಂಡು ಹೋಗಿದ್ದಾನೆ. ಆದ್ರೆ, ಕಳ್ಳತನ ಮಾಡಿದ ಎರಡೇ ವಾರಗಳಲ್ಲಿ ಸಿಕ್ಕಿಬಿದ್ದಿದ್ದಾನೆ. ಅದೂ ಹೇಗೆ ಗೊತ್ತಾ? ಕದ್ದ ಕಾರನ್ನು ಹೊತ್ತುಕೊಂಡು ಎಲ್ಲಾದ್ರೂ ದೂರ ಹೋಗಬೇಕೆಂದು ಕಳ್ಳ ಪೆಟ್ರೋಲ್‌ ಬಂಕ್‌ಗೆ ಹೋಗಿದ್ದಾನೆ.
ಆದ್ರೆ, ಪೆಟ್ರೋಲ್‌ ಹಾಕೋದು ಹೇಗೆಂದು ಗೊತ್ತಿರಲಿಲ್ಲ. ಟ್ಯಾಂಕ್‌ ಮುಚ್ಚಳ ತೆಗೆಯಲು ಹೋಗಿ, ಕಾರಿಗೆ ಪೂರ್ತಿ
ಹಾನಿ ಮಾಡಿಬಿಟ್ಟಿದ್ದಾನೆ. ಅಷ್ಟೇ ಅಲ್ಲ, ಪೆಟ್ರೋಲ್‌ಗೆ ದುಡ್ಡಿಲ್ಲ ಎಂದು ಬಂಕ್‌ನ ಸಿಬ್ಬಂದಿ ಬಳಿಯೇ ಭಿಕ್ಷೆ ಬೇಡಲು
ಶುರುವಿಟ್ಟುಕೊಂಡಿದ್ದಾನೆ. ಇದು ಗೊತ್ತಾಗುತ್ತಲೇ ಪೊಲೀಸರು, ಕಳ್ಳನನ್ನು ಬಂಧಿಸಿದ್ದಾರೆ. ಫೆರಾರಿ ಕದ್ದರೂ,
ಪರಾರಿಯಾಗಲು ಆಗದೇ ಈಗ ಕಂಬಿ ಎಣಿಸುತ್ತಿದ್ದಾನೆ.