ಟಿ20ಗೆ ಮಿಥಾಲಿ ವಿದಾಯ? ಇಂಗ್ಲೆಂಡ್‌ ಸರಣಿ ಬಳಿಕ ಗುಡ್‌ಬೈ ಸಾಧ್ಯತೆ

Team Udayavani, Feb 7, 2019, 12:30 AM IST

ಹೊಸದಿಲ್ಲಿ: ಹಿರಿಯ ಆಟಗಾರ್ತಿ ಮಿಥಾಲಿ ರಾಜ್‌ ಭಾರತದಲ್ಲಿ ನಡೆಯಲಿರುವ ಇಂಗ್ಲೆಂಡ್‌ ವಿರುದ್ಧ ಸರಣಿಯ ಬಳಿಕ ಅಂತಾರಾಷ್ಟ್ರೀಯ ಟಿ20ಗೆ ವಿದಾಯ ತಿಳಿಸುವ ಸೂಚನೆ ಲಭಿಸಿದೆ.

ಈಗಾಗಲೇ ನ್ಯೂಜಿಲ್ಯಾಂಡ್‌ ವಿರುದ್ಧದ ಮೊದಲ ಟಿ20 ತಂಡದಿಂದ ಹೊರಗುಳಿದಿರುವ ಮಿಥಾಲಿ ರಾಜ್‌, ಮಾರ್ಚ್‌ 4ರಿಂದ ಆರಂಭವಾಗಲಿರುವ ಇಂಗ್ಲೆಂಡ್‌ ವಿರುದ್ಧದ 3 ಪಂದ್ಯಗಳ ಟಿ20 ಸರಣಿಯಲ್ಲಿ ಆಡದೇ ವಿದಾಯದ ನಿರ್ಧಾರಕ್ಕೆ ಬರುವ ಸಾಧ್ಯತೆಗಳಿವೆ.

“ಟಿ20 ತಂಡದ ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ 2020ರ ಟಿ20 ವಿಶ್ವಕಪ್‌ಗಾಗಿ ತಂಡವನ್ನು ಸಿದ್ದಪಡಿಸುತ್ತಿರುವ ವಿಷಯ ಮಿಥಾಲಿಗೆ ತಿಳಿದಿದೆ. ಅವರು ಆ ತಂಡದಲ್ಲಿ ಸ್ಥಾನ ಪಡೆಯುವುದು ಬಹುತೇಕ ಅನುಮಾನ. ಇಂಗ್ಲೆಂಡ್‌ ವಿರುದ್ಧ ಸರಣಿ ಕೊನೆಗೊಳ್ಳುವ ವರೆಗೆ ಮಿಥಾಲಿ ಆಡುತ್ತಾರೆಯೇ ಎಂಬುದು ತಿಳಿದಿಲ್ಲ’ ಎಂದು ಬಿಸಿಸಿಐ ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ನಿಧಾನ ಗತಿಯ ಸ್ಟ್ರೈಕ್‌ ರೇಟ್‌ ಹಾಗೂ ಕಳಪೆ ಫಿಲ್ಡಿಂಗ್‌ನಿಂದಾಗಿ ಟಿ20 ತಂಡದಲ್ಲಿ ಮಿಥಾಲಿಗೆ ಸ್ಥಾನ ಲಭಿಸುವುದು ಕಷ್ಟಕರ. ಇದೇ ವಿಷಯಕ್ಕಾಗಿ ವನಿತಾ ವಿಶ್ವ ಟಿ20 ಕೂಟದ ಸೆಮಿಫೈನಲ್‌ ಪಂದ್ಯದಲ್ಲಿ ಮಿಥಾಲಿ ರಾಜ್‌ ಅವರನ್ನು ಹೊರಗಿಡಲಾಗಿತ್ತು 85 ಟಿ20 ಪಂದ್ಯಗಳನ್ನಾಡಿರುವ ಮಿಥಾಲಿ ಒಟ್ಟು 2,283 ರನ್‌ ಗಳಿಸಿದ್ದಾರೆ. ಇದರಲ್ಲಿ 17 ಅರ್ಧ ಶತಕಗಳಿವೆ. ಅತ್ಯಧಿಕ ರನ್‌ 97.