ಆಲ್ ಇಂಗ್ಲೆಂಡ್ ಚಾಂಪಿಯನ್ಶಿಪ್ ಸಿಂಧು ಔಟ್,ಪ್ರಣೀತ್ಗೆ ಮುನ್ನಡೆ
Team Udayavani, Mar 7, 2019, 12:30 AM IST
ಬರ್ಮಿಂಗ್ಹ್ಯಾಮ್: “ಆಲ್ ಇಂಗ್ಲೆಂಡ್ ಚಾಂಪಿಯನ್ಶಿಪ್’ ಬ್ಯಾಡ್ಮಿಂಟನ್ ಕೂಟದಲ್ಲಿ ಭಾರತದ ತಾರಾ ಆಟಗಾರ್ತಿ ಪಿ.ವಿ ಸಿಂಧು ಮೊದಲ ಪಂದ್ಯದಲ್ಲೇ ಸೋತು ಟೂರ್ನಿಯಿಂದ ಹೊರನಡೆದಿದ್ದಾರೆ. ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಸಾಯಿ ಪ್ರಣೀತ್ ಜಯಿಸಿ ಮುಂದಿನ ಸುತ್ತಿಗೆ ಪ್ರವೇಶಿಸಿದ್ದಾರೆ.
ಬುಧವಾರ ನಡೆದ ವನಿತಾ ಸಿಂಗಲ್ಸ್ ವಿಭಾಗದ ಪಂದ್ಯದಲ್ಲಿ ಸಿಂಧು ಕೊರಿಯದ ಸಂಗ್ ಜಿ ಹ್ಯುನ್ ವಿರುದ್ದ 16-21, 22-20, 18-21 ಗೇಮ್ಗಳಿಂದ ಸೋತರು. ಮೊದಲ ಗೇಮ್ನಲ್ಲಿ ಸೋತ ಸಿಂಧು ದ್ವಿತೀಯ ಗೇಮ್ನಲ್ಲಿ ಎಚ್ಚರಿಕೆಯ ಆಟವಾಡಿ ಗೆಲುವು ದಾಖಲಿಸಿದರು. ಆದರೆ ಈ ಆಟವನ್ನು 3ನೇ ಗೇಮ್ನಲ್ಲಿ ಮುಂದುವರಿಸಲಾಗದೇ ಸೋತು ಕೂಟದಿಂದ ನಿರ್ಗಮಿಸಿದರು. ಈ ಪಂದ್ಯವನ್ನು ಸೇರಿಸಿ ಹ್ಯುನ್ ವಿರುದ್ಧ 4 ಪಂದ್ಯಗಳಲ್ಲಿ ಸಿಂಧು 3 ರಲ್ಲಿ ಸೋಲು ಕಂಡತ್ತಾಗಿದೆ. ಹ್ಯುನ್ ಮುಂದಿನ ಪಂದ್ಯದಲ್ಲಿ ಹಾಂಕಾಂಗ್ನ ಚಿಯುಂಗ್ ಗಾನ್ ಯಿ ಅವರನ್ನು ಎದುರಿಸಲಿದ್ದಾರೆ.
ಸಾಯಿ ಪ್ರಣೀತ್ಗೆ ಜಯ
ಪುರುಷರ ವಿಭಾಗದಲ್ಲಿ ಭಾರತದ ಸಾಯಿ ಪ್ರಣೀತ್ ತನ್ನದೇ ದೇಶದ ಪ್ರತಿಸ್ಪರ್ಧಿ ಎಚ್. ಎಸ್. ಪ್ರಣಯ್ ಅವರನ್ನು 21-19, 21-19 ಗೇಮ್ಗಳಿಂದ ಸೋಲಿಸಿ ಮುಂದಿನ ಸುತ್ತಿಗೆ ಪ್ರವೇಶಿಸಿದ್ದಾರೆ. ಅವರಿಗೆ ಮುಂದಿನ ಎದುರಾಳಿ ಹಾಂಕಾಂಗ್ನ ಕಾ ಲಾಂಗ್ ಆಂಗಸ್.
ವನಿತಾ ಡಬಲ್ಸ್ ಪಂದ್ಯದಲ್ಲಿ ಭಾರತದ ಮೇಘಾನ ಜಕ್ಕಾಂಪುಡಿ-ಪೂರ್ವಿಶಾ ಎಸ್ ರಾಮ್ ಜೋಡಿ ರಶ್ಯಾದ ಎಕಟೇರಿನಾ ಬೊಲೊಟೊವಾ-ಅಲಿನಾ ಡಾವೆಲ್ಟೊವಾ ವಿರುದ್ಧ 21-18, 12-21, 12-21 ಗೇಮ್ಗಳಿಂದ ಮುಗ್ಗರಿಸಿದರು.