ಇಂದು ದರ್ಶನ್‌ ಹುಟ್ಟುಹಬ್ಬ

Team Udayavani, Feb 16, 2020, 7:01 AM IST

ಇಂದು ದರ್ಶನ್‌ ಅಭಿಮಾನಿಗಳ ಪಾಲಿಗೆ ಹಬ್ಬ. ಅದಕ್ಕೆ ಕಾರಣ ಏನೆಂದು ಹೊಸದಾಗಿ ಹೇಳುವ ಅಗತ್ಯವಿಲ್ಲ. ಹೌದು, ಇಂದು ದರ್ಶನ್‌ ಹುಟ್ಟುಹಬ್ಬ. ತಮ್ಮ ಪ್ರೀತಿಯ ಡಿ ಬಾಸ್‌ ಹುಟ್ಟುಹಬ್ಬವೆಂದರೆ ಅಭಿಮಾನಿಗಳಿಗೆ ಎಲ್ಲಿಲ್ಲದ ಸಡಗರ. ಅದೇ ಕಾರಣದಿಂದ ದೂರದ ಊರುಗಳಿಂದಲೂ ಅಭಿಮಾನಿಗಳು ಬಂದು ದರ್ಶನ್‌ ಅವರಿಗೆ ಶುಭಾಶಯ ಕೋರುತ್ತಾರೆ. ದರ್ಶನ್‌ ಕೂಡಾ ಅಷ್ಟೇ ಫೆ.16 ರಂದು ಇಡೀ ದಿನ ತಮ್ಮ ಅಭಿಮಾನಿಗಳ ಜೊತೆ ಕಳೆಯುತ್ತಾರೆ.

ಒಂಥರಾ ಅಭಿಮಾನಿಗಳ ದಿನ ಎನ್ನಬಹುದು. ಈ ಬಾರಿಯೂ ದರ್ಶನ್‌ ಹುಟ್ಟುಹಬ್ಬ ಅದ್ಧೂರಿಯಾಗಿ ನಡೆಯುತ್ತಿದೆ. ಅದು ಅಭಿಮಾನಿಗಳ ಆಸೆ ಕೂಡಾ. ಆದರೆ, ದರ್ಶನ್‌ ಮಾತ್ರ ಹಾರ-ಕೇಕ್‌ ಬದಲು ದವಸ-ಧಾನ್ಯ ನೀಡಿ ಎಂದು ಕಳೆದ ಬಾರಿಯಂತೆ ಅಭಿಮಾನಿಗಳಿಗೆ ಮನವಿ ಮಾಡಿದ್ದಾರೆ. ಆದರೆ, ಅಭಿಮಾನಿಗಳು ದವಸ-ಧಾನ್ಯಗಳ ಜೊತೆಗೆ ಕೇಕ್‌-ಹಾರವನ್ನು ತಂದು ತಮ್ಮ ಖುಷಿಯನ್ನು ಹಂಚಿಕೊಳ್ಳುತ್ತಿದ್ದಾರೆ.

ಇನ್ನು, ದರ್ಶನ್‌ ಹುಟ್ಟುಹಬ್ಬದ ಅಂಗವಾಗಿ ರಾಜ್ಯಾದ್ಯಂತ ಇರುವ ಅವರ ಅಭಿಮಾನಿ ಸಂಘಗಳು ರಕ್ತದಾನ, ಅನ್ನದಾನ ಸೇರಿದಂತೆ ಹಲವು ಸಮಾಜಮುಖೀ ಕಾರ್ಯಗಳನ್ನು ಹಮ್ಮಿಕೊಂಡಿವೆ. ಇದು ಅಭಿಮಾನಿಗಳ ಸಂಭ್ರಮವಾದರೆ, ಚಿತ್ರರಂಗದ ಮಂದಿ ಕೂಡಾ ದರ್ಶನ್‌ ಹುಟ್ಟುಹಬ್ಬವನ್ನು ಸಂಭ್ರಮಿಸುತ್ತಿದ್ದಾರೆ. ದರ್ಶನ್‌ ಜೊತೆ ಸಿನಿಮಾ ಮಾಡಬೇಕೆಂದು ಕಾಯುವ ಸಿನಿಮಾ ಮಂದಿಯ ಸಂಖ್ಯೆಯೇನೂ ಕಮ್ಮಿಯಿಲ್ಲ.

ಈಗಾಗಲೇ ಅನೇಕರು ದರ್ಶನ್‌ ಜೊತೆ ಸಿನಿಮಾ ಮಾಡುವ ಕುರಿತು ಮಾತುಕತೆಯಾಡಿದ್ದು, ಅವರೆಲ್ಲ ಜಾಹೀರಾತು ಮೂಲಕ ತಮ್ಮ ಹೀರೋಗೆ ಶುಭ ಕೋರಿದ್ದಾರೆ. ಸಾಕಷ್ಟು ಸಿನಿಮಾಗಳು ಕೂಡಾ ಹುಟ್ಟುಹಬ್ಬ ಸಮಯದಲ್ಲಿ ಅನೌನ್ಸ್‌ ಆಗಿವೆ. ದರ್ಶನ್‌ ಕೂಡಾ ಒಂದರ ಹಿಂದೊಂದರಂತೆ ಸಿನಿಮಾಗಳನ್ನು ಮಾಡಲಿದ್ದಾರೆ. ಸದ್ಯ ದರ್ಶನ್‌ “ರಾಜವೀರ ಮದಕರಿ ನಾಯಕ’ ಚಿತ್ರೀಕರಣದಲ್ಲಿದ್ದಾರೆ. ಈಗ ಆ ಚಿತ್ರೀಕರಣದಿಂದ ಬ್ರೇಕ್‌ ಪಡೆದು ಅಭಿಮಾನಿಗಳ ಜೊತೆ ಹುಟ್ಟುಹಬ್ಬ ಆಚರಿಸುತ್ತಿದ್ದಾರೆ.

ರಾಬರ್ಟ್‌ ಟೀಸರ್‌: ದರ್ಶನ್‌ ನಾಯಕರಾಗಿರುವ “ರಾಬರ್ಟ್‌’ ಚಿತ್ರದ ಚಿತ್ರೀಕರಣ ಸಂಪೂರ್ಣ ಮುಗಿದಿದ್ದು, ಏಪ್ರಿಲ್‌ನಲ್ಲಿ ಬಿಡುಗಡೆಯಾಗುವ ಸಾಧ್ಯತೆ ಇದೆ. ಇಂದು ದರ್ಶನ್‌ ಹುಟ್ಟುಹಬ್ಬ ಪ್ರಯುಕ್ತ ಚಿತ್ರದ ಟೀಸರ್‌ ಬಿಡುಗಡೆಯಾಗುತ್ತಿದೆ.