ರಾಜ್ಯಾದ್ಯಂತ ಎಂಟು ಖಾಸಗಿ ಪ್ರಯೋಗಾಲಯಗಳಲ್ಲಿ ಪರೀಕ್ಷಾ ಸೌಲಭ್ಯ

Team Udayavani, Mar 29, 2020, 6:28 PM IST

ಸಾಂದರ್ಭಿಕ ಚಿತ್ರ

ಮುಂಬಯಿ, ಮಾ. 28: ರಾಜ್ಯಾದ್ಯಂತ ಎಂಟು ಖಾಸಗಿ ಪ್ರಯೋಗಾಲಯಗಳು ಮತ್ತು 11 ಸರಕಾರಿ ಸಂಸ್ಥೆಗಳಲ್ಲಿ ಕೋವಿಡ್ 19 ವೈರಸ್‌ ಪರೀಕ್ಷಾ ಸೌಲಭ್ಯಗಳನ್ನು ಪ್ರಾರಂಭಿಸಲು ಕೇಂದ್ರ ಸರಕಾರ ಗುರುವಾರ ಅನುಮತಿ ನೀಡಿದೆ. ರಾಜ್ಯವು ಪ್ರಸ್ತುತ ಪರೀಕ್ಷಾ ಸೌಲಭ್ಯಗಳನ್ನು ಪುಣೆ, ಮುಂಬಯಿ ಮತ್ತು ನಾಗಪುರದ ಮೂರು ಸ್ಥಳಗಳಲ್ಲಿ ಮಾತ್ರ ಹೊಂದಿದೆ.

ಸರಕಾರದ ಈ ನಿರ್ಧಾರದಿಂದ ದಿನಕ್ಕೆ 4,000 ವ್ಯಕ್ತಿಗಳನ್ನು ಪರೀಕ್ಷೆ ಮಾಡಬಹುದಾಗಿದೆ ಎಂದು ರಾಜ್ಯ ವೈದ್ಯಕೀಯ ಶಿಕ್ಷಣ ಸಚಿವ ಅಮಿತ್‌ ದೇಶ್‌ಮುಖ್‌ ತಿಳಿಸಿದರು. ಯಾವುದೇ ತುರ್ತು ಪರಿಸ್ಥಿತಿಯನ್ನು ಎದುರಿಸಲು ಸಿದ್ಧರಾಗಿರಬೇಕುಎಂದು ಪರೀಕ್ಷಿಸುವ ಸಾಮರ್ಥ್ಯವನ್ನು ಮತ್ತಷ್ಟು ಹೆಚ್ಚಿಸಲು ರಾಜ್ಯ ಸರಕಾರ ಪ್ರಯತ್ನಿಸುತ್ತಿದೆ ಎಂದವರು ಹೇಳಿದರು.

ಅನುಮೋದನೆ ಪಡೆದ ಎಂಟು ಖಾಸಗಿ ಲ್ಯಾಬ್‌ಗಳು ಮೆಟ್ರೊಪೊಲೀಸ್‌ ಹೆಲ್ತ್‌ಕೇರ್‌ ಲಿಮಿಟೆಡ್‌, ಥೈರೋಕೇರ್‌ ಟೆಕ್ನಾಲಜೀಸ್‌ ಲಿಮಿಟೆಡ್‌, ಸಬರ್ಬನ್‌ ಡಯಾಗ್ನೊಸ್ಟಿಕ್‌ ಪ್ರೈವೇಟ್‌ ಲಿಮಿಟೆಡ್‌, ಸರ್‌ ಎಚ್‌ಎನ್‌ ರಿಲಯನ್ಸ ಫೌಂಡೇಶನ್‌ ಆಸ್ಪತ್ರೆ, ಎಸ್‌ಆರ್‌ಎಲ್‌ ಲಿಮಿಟೆಡ್‌, ಎಜಿ ಡಯಾಗ್ನೊಸ್ಟಿಕ್ಸ್‌ ಪ್ರೈವೇಟ್‌ ಲಿಮಿಟೆಡ್‌, ಕೋಕಿಲಾಬೆನ್‌ ಧೀರುಬಾಯಿ ಅಂಬಾನಿ ಆಸ್ಪತ್ರೆ ಪ್ರಯೋಗಾಲಯ ಮತ್ತು ಸೋಂಕು ಪ್ರಯೋಗಾಲಯಗಳು ಖಾಸಗಿ ಲಿಮಿಟೆಡ್‌ ಇಲ್ಲಿ ಪರೀಕ್ಷಾ ಸೌಲಭ್ಯಗಳನ್ನು ಆರಂಭಿಸಲಾಗಿದೆ.

ಒಬ್ಬ ವ್ಯಕ್ತಿಗೆ ಸಾಮಾನ್ಯ ವೈದ್ಯರಿಂದ ಪ್ರಿಸ್ಕ್ರಿಪ್ಷನ್‌ ಅಗತ್ಯವಿರುತ್ತದೆ ಎಂದು ದೇಶಮುಖ್‌ ಹೇಳಿದ್ದಾರೆ. ಅದರ ಆಧಾರದ ಮೇಲೆ ಖಾಸಗಿ ಪ್ರಯೋಗಾಲಯಗಳು ಸ್ವಾಬ್‌ ಮಾದರಿಯನ್ನು ಸಂಗ್ರಹಿಸಲು ತಾಂತ್ರಿಕ ತಂಡವನ್ನು ಕಳುಹಿಸುತ್ತವೆ. ಪರೀಕ್ಷಾ ವರದಿಯನ್ನು 8-12 ಗಂಟೆಗಳಲ್ಲಿ ಒದಗಿಸಲಾಗುವುದು ಮತ್ತು ಅದರ ಆಧಾರದ ಮೇಲೆ ವೈದ್ಯರು ಮುಂದಿನ ಚಿಕಿತ್ಸೆಯ ಕೋರ್ಸ್‌ಅನ್ನು ನಿರ್ಧರಿಸುತ್ತಾರೆ ಎಂದು ತಿಳಿಸಿದ್ದಾರೆ.