ನಗರ ಸ್ಥಳೀಯ ಸಂಸ್ಥೆಗಳಿಗೆ ಮೀಸಲು ಪ್ರಕಟ : ಆಕ್ಷೇಪಣೆಗೆ ಏಳು ದಿನಗಳ ಕಾಲಾವಕಾಶ

Team Udayavani, Sep 16, 2020, 6:44 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಬೆಂಗಳೂರು: ನಗರ ಸ್ಥಳೀಯ ಸಂಸ್ಥೆಗಳಿಗೆ ಅಧ್ಯಕ್ಷ-ಉಪಾಧ್ಯಕ್ಷ ಸ್ಥಾನಗಳ ವರ್ಗವಾರು ಮೀಸಲಾತಿಯನ್ನು ನಿಗದಿಪಡಿಸಿ ಕರಡು ಅಧಿಸೂಚನೆ ಪ್ರಕಟಿಸಿರುವ ರಾಜ್ಯ ಸರಕಾರವು, ಆಕ್ಷೇಪಣೆಗೆ ಏಳು ದಿನಗಳ ಕಾಲಾವಕಾಶ ನೀಡಿದೆ.

ನಗರಸಭೆಗಳಿಗೆ ಅಧ್ಯಕ್ಷ- ಉಪಾಧ್ಯಕ್ಷ ತಲಾ 59, ಪುರಸಭೆಗಳಿಗೆ 117 ಮತ್ತು ಪ. ಪಂ.ಗಳಿಗೆ 100 ಮೀಸಲು ಮಿತಿ ನಿಗದಿಪಡಿಸಿ ಸೆ. 15ರಂದು ಗೆಜೆಟ್‌ ಅಧಿಸೂಚನೆ ಹೊರಡಿಸಲಾಗಿದೆ.

ನಗರಸಭೆಗಳಲ್ಲಿ ಅಧ್ಯಕ್ಷ- ಉಪಾಧ್ಯಕ್ಷ ಹುದ್ದೆಗಳಿಗೆ ಎಸ್‌ಸಿ, ಎಸ್‌ಸಿ -ಮಹಿಳೆ ತಲಾ 5, ಎಸ್‌ಟಿ, ಎಸ್‌ಟಿ – ಮಹಿಳೆ ತಲಾ 2, ಹಿಂದುಳಿದ ವರ್ಗ – ಎ, ಹಿಂದುಳಿದ ವರ್ಗ – ಎ (ಮಹಿಳೆ) ತಲಾ 6, ಹಿಂದುಳಿದ ವರ್ಗ-ಬಿ ತಲಾ 2, ಹಿಂದುಳಿದ ವರ್ಗ-ಬಿ (ಮಹಿಳೆ) ತಲಾ 1, ಸಾಮಾನ್ಯ, ಸಾಮಾನ್ಯ- ಮಹಿಳೆ ತಲಾ 15 ಸ್ಥಾನಗಳನ್ನು ಮೀಸಲಿರಿಸಲಾಗಿದೆ.

ಪುರಸಭೆಯ ಅಧ್ಯಕ್ಷ-ಉಪಾಧ್ಯಕ್ಷ ಹುದ್ದೆಗಳಿಗೆ ಎಸ್‌ಸಿ, ಎಸ್‌ಸಿ-ಮಹಿಳೆ ತಲಾ 10, ಎಸ್‌ಟಿ, ಎಸ್‌ಟಿ – ಮಹಿಳೆ ತಲಾ 4, ಹಿಂದುಳಿದ ವರ್ಗ- ಎ, ಹಿಂದುಳಿದ ವರ್ಗ-ಎ (ಮಹಿಳೆ) ತಲಾ 12, ಹಿಂದುಳಿದ ವರ್ಗ-ಬಿ, ಹಿಂ. ವರ್ಗ-ಬಿ (ಮಹಿಳೆ) ತಲಾ 3, ಸಾಮಾನ್ಯ ತಲಾ 30, ಸಾಮಾನ್ಯ-ಮಹಿಳೆ ತಲಾ 29 ಸ್ಥಾನಗಳನ್ನು ಮೀಸಲಿಡಲಾಗಿದೆ.

ಪ.ಪಂ. ಅಧ್ಯಕ್ಷ-ಉಪಾಧ್ಯಕ್ಷ ಹುದ್ದೆಗಳಿಗೆ ಎಸ್‌ಸಿ ತಲಾ 9, ಎಸ್‌ಟಿ-ಮಹಿಳೆ ತಲಾ 8, ಎಸ್‌ಟಿ ತಲಾ 4, ಎಸ್‌ಟಿ- ಮಹಿಳೆ ತಲಾ 3, ಹಿಂ. ವರ್ಗ- ಎ ತಲಾ 11, ಹಿಂ. ವರ್ಗ-ಎ (ಮಹಿಳೆ) ತಲಾ 10, ಹಿಂ. ವರ್ಗ-ಬಿ ತಲಾ 3, ಹಿಂದುಳಿದ ವರ್ಗ-ಬಿ (ಮಹಿಳೆ) ತಲಾ 2, ಸಾಮಾನ್ಯ, ಸಾಮಾನ್ಯ-ಮಹಿಳೆ ತಲಾ 25 ಸ್ಥಾನಗಳಿಗೆ ಮೀಸಲಾತಿ ಕಲ್ಪಿಸಲಾಗಿದೆ.

ವಿವಾದದಿಂದ ನನೆಗುದಿಗೆ
ಮೀಸಲಾತಿ ವಿವಾದದಿಂದಾಗಿ 2018ರಿಂದ ರಾಜ್ಯದ 270ಕ್ಕೂ ಹೆಚ್ಚು ನಗರ ಸ್ಥಳೀಯ ಸಂಸ್ಥೆಗಳ ಅಧ್ಯಕ್ಷ-ಉಪಾಧ್ಯಕ್ಷ ಸ್ಥಾನಗಳ ಆಯ್ಕೆ ನನೆಗುದಿಗೆ ಬಿದ್ದಿತ್ತು. ಮೀಸಲಾತಿ ಪಟ್ಟಿಯನ್ನು ಸರಕಾರ 2 ಬಾರಿ ಬದಲಿಸಿತ್ತು. ಅಂತಿಮವಾಗಿ ಮೀಸಲು ಮಾರ್ಗಸೂಚಿ ಪರಿಷ್ಕರಿಸಿ 2020ರ ಆ. 27ರಂದು ಕರಡು ಅಧಿಸೂಚನೆ ಹೊರಡಿಸಿತ್ತು. ಸೆ. 11ರಂದು ಪರಿಷ್ಕೃತ ಮಾರ್ಗಸೂಚಿ ಅಂತಿಮಗೊಳಿಸಿತು. ಈಗ ವರ್ಗವಾರು ಮೀಸಲು ನಿಗದಿಪಡಿಸಿ ಕರಡು ಅಧಿಸೂಚನೆ ಪ್ರಕಟಿಸಿದೆ. ಬಳಿಕ ಅಂತಿಮ ಅಧಿಸೂಚನೆ ಪ್ರಕಟಿಸಲಾಗುತ್ತದೆ. ಇದರಂತೆ ಮೀಸಲಾತಿ ನಿಗದಿಯಾಗುತ್ತದೆ.