ಹೊಸಬರ ಕನಸಿನ ‘ಎವಿಡೆನ್ಸ್‌’ ಫ‌ಸ್ಟ್‌ ಲುಕ್‌ ಟೀಸರ್‌ ಔಟ್

Team Udayavani, Jan 29, 2021, 4:07 PM IST

ಒಂದೇ ಲೊಕೇಶನ್‌ನಲ್ಲಿ, ಎರಡು ಪಾತ್ರಗಳನ್ನು ಇಟ್ಟುಕೊಂಡು, ಕೇವಲ ಐದೇ ದಿನಗಳಲ್ಲಿ ಇಡೀ ಚಿತ್ರೀಕರಣವನ್ನು ಕಂಪ್ಲೀಟ್‌ ಮಾಡಿ ಸುದ್ದಿಯಾಗಿದ್ದ “ಎವಿಡೆನ್ಸ್‌’ ಚಿತ್ರ ತೆರೆಗೆ ಬರಲು ಸಿದ್ಧವಾಗುತ್ತಿದೆ.

ಸಸ್ಪೆನ್ಸ್‌ ಕಂ ಕ್ರೈಂ – ಥ್ರಿಲ್ಲರ್‌ ಕಥಾಹಂದರ ಹೊಂದಿರುವ “ಎವಿಡೆನ್ಸ್‌’ ಚಿತ್ರದ ಪ್ರಚಾರ ಕಾರ್ಯಗಳಿಗೆ ಚಾಲನೆ ನೀಡಿರುವ ಚಿತ್ರತಂಡ, ಇತ್ತಿಚೆಗೆ ಚಿತ್ರದ ಫ‌ಸ್ಟ್‌ಲುಕ್‌ ಪೋಸ್ಟರ್‌ ಮತ್ತು ಟೀಸರ್‌ ಬಿಡುಗಡೆ ಮಾಡಿದೆ. ನಟ ಕಂ ನಿರ್ದೇಶಕ ಸಂತ ಮುರಳಿ ಮೋಹನ್‌ “ಎವಿಡೆನ್ಸ್‌’ ಚಿತ್ರದ ಫ‌ಸ್ಟ್‌ಲುಕ್‌ ಪೋಸ್ಟರ್‌ ಬಿಡುಗಡೆಗೊಳಿಸಿದರೆ, “ಕೆಜಿಎಫ್’ ಖ್ಯಾತಿಯ ನಟ ಕೃಷ್ಣಪ್ಪ ಚಿತ್ರದ ಟೀಸರ್‌ನ ಬಿಡುಗಡೆಗೊಳಿಸಿ ಚಿತ್ರತಂಡಕ್ಕೆ ಶುಭ ಹಾರೈಸಿದ್ದಾರೆ.

ಇನ್ನು ಯುವ ಪ್ರತಿಭೆ ಪ್ರವೀಣ್‌ ರಾಮಕೃಷ್ಣ ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡಿರುವ “ಎವಿಡೆನ್ಸ್‌’ ಚಿತ್ರದಲ್ಲಿ ಮಾನಸ ಜೋಶಿ ಮತ್ತು ರೋಬೋ ಗಣೇಶ್‌ ಮುಖ್ಯ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

“ಶ್ರೀಧೃತಿ ಪೊ›ಡಕ್ಷನ್ಸ್‌’ ಬ್ಯಾನರ್‌ ಅಡಿಯಲ್ಲಿ ನಿರ್ಮಾವಾಗಿರುವ “ಎವಿಡೆನ್ಸ್‌’ ಚಿತ್ರಕ್ಕೆ ಪಿ. ಅರವಿಂದ ಕುಮಾರ್‌, ಡಾ. ಕೊಡ್ಲಾಡಿ ಸುರೇಂದ್ರ ಶೆಟ್ಟಿ, ಎಂ.ಎನ್. ರವೀಂದ್ರ ರಾವ್‌, ನರಸಿಂಹ ಮೂರ್ತಿ ಎ.ಬಿ ಕಾವಲು, ಕಿಶೋರ್‌ ಬಾಬು, ಪ್ರಶಾಂತ್‌ ಸಿ.ಪಿ ಮತ್ತು ಚಂದ್ರರಾಜ್‌. ಕೆ ಜಂಟಿಯಾಗಿ ಬಂಡವಾಳ ಹೂಡಿದ್ದಾರೆ.

ಚಿತ್ರಕ್ಕೆ ರವಿ ಸುವರ್ಣ ಛಾಯಾಗ್ರಹಣ, ಚೆಲುವಮೂರ್ತಿ ಸಂಕಲನವಿದೆ. ಚಿತ್ರದ 2 ಹಾಡುಗಳಿಗೆ ಕಾರ್ತಿಕ್‌ ವೆಂಕಟೇಶ್‌ ಸಂಗೀತ ಸಂಯೋಜಿಸಿದ್ದು, ಆರ್‌. ಚಂದ್ರಶೇಖರ್‌ ಪ್ರಸಾದ್‌ ಸಂಭಾಷಣೆ ಬರೆದಿದ್ದಾರೆ.