ತೆರೆಯತ್ತ “ಮೂರ್ಕಲ್ ಎಸ್ಟೇಟ್’
Team Udayavani, Oct 20, 2019, 3:00 AM IST
“ಮೂರ್ಕಲ್ ಎಸ್ಟೇಟ್’ ಎಂಬ ಸಿನಿಮಾ ಬಗ್ಗೆ ನೀವು ಕೇಳಿರಬಹುದು. ಈಗ ಆ ಚಿತ್ರ ಬಿಡುಗಡೆಯ ಹಂತಕ್ಕೆ ಬಂದಿದ್ದು, ಅ.24 ರಂದು ತೆರೆಕಾಣಲಿದೆ. “ಭದ್ರಾವತಿ ಮೂವಿ ಮೇಕರ್’ ಬ್ಯಾನರ್ನಲ್ಲಿ ಕುಮಾರ್ ಎನ್. ಭದ್ರಾವತಿ “ಮೂರ್ಕಲ್ ಎಸ್ಟೇಟ್’ ಚಿತ್ರಕ್ಕೆ ನಿರ್ಮಾಪಕರಾಗಿ ಬಂಡವಾಳ ಹೂಡಿದ್ದಾರೆ. ಕೆಟ್ಟದ್ದನ್ನು ಮಾಡಿದ್ದರೆ ಕೆಟ್ಟದ್ದು ಆಗುತ್ತೆ ಅನ್ನೋ ವಿಷಯವನ್ನ ಒಳ್ಳೆಯ ಮನರಂಜನೆ, ಮೆಸೇಜ್ ಜೊತೆ ಚಿತ್ರದಲ್ಲಿ ಹೇಳಲಾಗಿದೆಯಂತೆ.
ಎಲ್ಲೂ ಬೋರ್ ಹೊಡೆಯದಂತೆ ಸಿನಿಮಾ ಸಾಗುವುದರಿಂದ ಪ್ರೇಕ್ಷಕರು ಎಂಜಾಯ್ ಮಾಡುತ್ತಾರೆ ಎಂಬ ವಿಶ್ವಾಸ ಚಿತ್ರತಂಡಕ್ಕಿದೆ. ಮೈಸೂರು ಮೂಲದ ಪ್ರಮೋದ್ ಕುಮಾರ್ “ಮೂರ್ಕಲ್ ಎಸ್ಟೇಟ್’ ಚಿತ್ರದ ಮೂಲಕ ಪೂರ್ಣ ಪ್ರಮಾಣದ ನಿರ್ದೇಶಕನಾಗಿ ಚಂದನವನಕ್ಕೆ ಪರಿಚಯವಾಗುತ್ತಿದ್ದಾರೆ. ಸುಮಾರು ಹತ್ತು ವರ್ಷಗಳ ಹಿಂದೆ ಮೈಸೂರು ಬಳಿ ನಡೆದ ನೈಜ ಘಟನೆಯೊಂದು ಈ ಚಿತ್ರಕ್ಕೆ ಪ್ರೇರಣೆಯಂತೆ. ಅದೇ ಎಳೆಯನ್ನು ಇಟ್ಟುಕೊಂಡು, ಹಾರರ್-ಥ್ರಿಲ್ಲರ್ ಶೈಲಿಯಲ್ಲಿ ಚಿತ್ರವನ್ನು ತೆರೆಗೆ ತರಲಾಗಿದೆ.
ನೆಗೆಟಿವ್ ಮತ್ತು ಪಾಸಿಟಿವ್ ಎನರ್ಜಿಯನ್ನು ಹಿನ್ನೆಲೆಯಾಗಿ ಇಟ್ಟುಕೊಂಡು ಮಾಡಿರುವ ಸಿನಿಮಾ ಇದು. ಚಿತ್ರದ ದೃಶ್ಯಕ್ಕಾಗಿ ಬಾಳೂರು ಎಸ್ಟೇಟ್ ಎಂಬಲ್ಲಿ ಸುಮಾರು 250 ವರ್ಷಗಳ ಹಳೆಯ ಮನೆಯಲ್ಲಿ ಶೂಟಿಂಗ್ ಮಾಡಲಾಗಿದೆ. ನವ ಪ್ರತಿಭೆ ಪ್ರವೀಣ್, ಪ್ರಕೃತಿ, ವಿಜಯ್, ಅಭಿಷೇಕ್ ಸೇರಿದಂತೆ ಬಹುತೇಕ ಹೊಸ ಪ್ರತಿಭೆಗಳು “ಮೂರ್ಕಲ್ ಎಸ್ಟೇಟ್’ ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಚಿಕ್ಕಮಗಳೂರು, ಮೈಸೂರು, ಶ್ರೀರಂಗಪಟ್ಟಣ, ಮಂಡ್ಯ, ಬೆಂಗಳೂರು ಸುತ್ತಮುತ್ತ ಚಿತ್ರದ ಚಿತ್ರೀಕರಣ ನಡೆಸಲಾಗಿದೆ.