‘ದೊಡ್ಡ ಕೆಲಸಗಳು ಮಾಡುವ ಹುಡುಗಿಗೆ ಸಣ್ಣ ವಿಷಯಗಳು ತಲುಪಲ್ಲ’: ರಶ್ಮಿಕಾ
Team Udayavani, Jun 16, 2021, 12:45 PM IST
ಸೌತ್ ಸಿನಿರಂಗದ ಸುಂದರಿ ರಶ್ಮಿಕಾ ಮಂದಣ್ಣ ಆಗಾಗ ಟೀಕೆಗಳಿಗೆ ಗುರಿಯಾಗುತ್ತಿರುತ್ತಾರೆ. ಕೆಲವೊಂದು ಬಾರಿ ಟೀಕೆಗಳಿಗೆ ಪ್ರತಿಕ್ರಿಯಿಸುವ ಅವರು ಸರಿಯಾಗಿ ತಿರುಗೇಟು ನೀಡುತ್ತಾರೆ. ಇದೀಗ ಮತ್ತೆ ವಿರೋಧಿಗಳಿಗೆ ಖಡಕ್ ಪ್ರತ್ಯುತ್ತರ ನೀಡಿದ್ದಾರೆ.
ಕೆಲವೊಮ್ಮೆ ರಶ್ಮಿಕಾ ಸುಮ್ಮನಿದ್ದರೂ ಟ್ರೋಲ್ಗೆ ಒಳಗಾಗಿರುವ ಘಟನೆಗಳು ನಡೆದಿದೆ. ಕೆಲವು ವಿಚಾರಗಳಲ್ಲಿ ರಶ್ಮಿಕಾ ಪಾತ್ರ ಇರುವುದಿಲ್ಲ, ಆದರೂ ಆಕೆಯ ಹೆಸರು ಚರ್ಚೆಯಲ್ಲಿರುತ್ತದೆ. ಸಕ್ಸಸ್ ಹಿಂದೆ ಸವಾರಿ ಮಾಡುತ್ತಿರುವ ನಟಿಗೆ ಟೀಕೆಗಳು ಬೆನ್ನು ಬಿದ್ದಿದೆ. ಟೀಕೆಗಳಿಗೆ, ಕೆಟ್ಟದಾಗಿ ಟ್ರೋಲ್ ಮಾಡುವವರಿಗೆ ನೇರವಾಗಿ ಪ್ರತಿಕ್ರಿಯೆ ನೀಡದ ರಶ್ಮಿಕಾ ತಮ್ಮದೇ ರೀತಿಯಲ್ಲಿ ತಿರುಗೇಟು ಕೊಟ್ಟು ಮುಂದೆ ಹೋಗ್ತಿದ್ದಾರೆ.
ಇತ್ತೀಚಿಗಷ್ಟೆ ಹೊಸದೊಂದು ಫೋಟೋ ಹಂಚಿಕೊಂಡಿರುವ ರಶ್ಮಿಕಾ ಮಂದಣ್ಣ ಹೆಚ್ಚು ಸುದ್ದಿಯಾಗಿದ್ದಾರೆ. ಸಾಮಾನ್ಯವಾಗಿ ಆಕರ್ಷಕವಾಗಿ, ಸ್ಟೈಲಿಶ್ ಆಗಿ ಕಾಣಿಸಿಕೊಳ್ಳುವ ರಶ್ಮಿಕಾ ಹಾಟ್ ಹಾಗೂ ರೊಮ್ಯಾಂಟಿಕ್ ಆಗಿ ಡ್ರೆಸ್ ಮಾಡುವುದು ಬಹಳ ಅಪರೂಪ. ಇದೀಗ, ಪೋಸ್ಟ್ ಮಾಡಿರುವ ಫೋಟೋ ಸಖತ್ ಹಾಟ್ ಆಗಿದೆ ಎಂದು ಫ್ಯಾನ್ಸ್ ಖುಷ್ ಆಗಿದ್ದಾರೆ.
ತಮ್ಮ ಪೋಟೊ ಜೊತೆ ಒಂದು ಕ್ಯಾಪ್ಷನ್ ಕೊಟ್ಟಿರುವ ಕಿರಿಕ್ ಪಾರ್ಟಿ ಚೆಲುವೆ ರಶ್ಮಿಕಾ, ”ದೊಡ್ಡ ಕೆಲಸಗಳನ್ನು ಮಾಡುವ ಹುಡುಗಿಗೆ, ಸಣ್ಣ ವಿಚಾರಗಳು ತಲುಪಲ್ಲ ಅಂತ ಯಾರೋ ಹೇಳಿದ್ದಾರೆ. ನನ್ನ ವಿಚಾರದಲ್ಲಿ ಇದು ಸೂಕ್ತವಾಗಿದೆ” ಎಂದಿದ್ದಾರೆ. ಈ ಮೂಲಕ ತನ್ನ ಏಳಿಗೆಯ ಕುರಿತು ಟೀಕಿಸುವವರ ವಿಷಯಕ್ಕೆ ನಾನು ಕಿವಿ ಕೊಡಲ್ಲ ಎಂದು ಪರೋಕ್ಷವಾಗಿ ತಿರುಗೇಟು ಕೊಟ್ಟಿದ್ದಾರೆ.