ರುಕ್ಮಿಣಿ ವಸಂತ್ ಕಣ್ಣಲ್ಲಿ ಸಪ್ತ ಕನಸು
Team Udayavani, Mar 21, 2021, 8:51 AM IST
ರಕ್ಷಿತ್ ಶೆಟ್ಟಿ ನಟನೆಯ “ಸಪ್ತ ಸಾಗರದಾಚೆ ಎಲ್ಲೋ’ ಚಿತ್ರಕ್ಕೆ ಇತ್ತೀಚೆಗೆ ಮುಹೂರ್ತ ನಡೆದಿದೆ. ಈ ಚಿತ್ರದಲ್ಲಿ ರುಕ್ಮಿಣಿ ವಸಂತ್ ನಾಯಕಿ. ಈ ಹಿಂದೆ ಬೀರ್ಬಲ್ ಸಿನಿಮಾದಲ್ಲಿ ನಟಿಸಿರುವ ರುಕ್ಮಿಣಿ ಈಗ ಸಪ್ತ ಸಾಗರ ಮೇಲೆ ನಿರೀಕ್ಷೆ ಇಟ್ಟಿದ್ದಾರೆ. “ಸಪ್ತಸಾಗರದಾಚೆ ಎಲ್ಲೋ’ ಸಿನಿಮಾದಲ್ಲಿ ನಟಿಸುತ್ತಿರೋದು ರುಕ್ಮಿಣಿ ಅವರಿಗೆ ಖುಷಿಕೊಟ್ಟಿದೆಯಂತೆ.
“ಲಾಕ್ಡೌನ್ ಸಮಯ ನನಗೆ ತುಂಬ ಕಷ್ಟಕರವಾಗಿತ್ತು. ಕೈಯಲ್ಲಿ ಒಂದಷ್ಟು ಪ್ರಾಜೆಕ್ಟ್ ಗಳಿದ್ದರೂ, ಆ ಸಿನಿಮಾಗಳು ಮುಂದುವರೆಯುವ ಯಾವ ಲಕ್ಷಣವೂ ಕಾಣುತ್ತಿರಲಿಲ್ಲ. ಈ ಸಂದರ್ಭದಲ್ಲಿ ನಾನು ನೇರವಾಗಿ ನಿರ್ದೇಶಕ ಹೇಮಂತ್ ಅವರಿಗೆ ನನ್ನ ಬಯೋಡೇಟಾ ಹಾಗೂ ಅವರ ಸಿನಿಮಾದಲ್ಲಿ ಕೆಲಸ ಮಾಡುವ ಆಸಕ್ತಿಯನ್ನು ತೋಡಿಕೊಂಡೆ. ಹೀಗಿರುವಾಗ ಒಂದು ದಿನ ನನಗೆ ಕರೆ ಮಾಡಿ ಆಡಿಷನ್ಗೆ ಬರಲು ಹೇಳಿದರು’ ಎನ್ನುತ್ತಾ ತಾವು ಈ ಸಿನಿಮಾಕ್ಕೆ ಆಯ್ಕೆಯಾದ ಬಗ್ಗೆ ಹೇಳುತ್ತಾರೆ.
ಇದನ್ನೂ ಓದಿ:ಅದ್ಧೂರಿಯಾಗಿ ಸೆಟ್ಟೇರಿದ ಸತ್ಯಪ್ರಕಾಶ್ ರ ‘ಮ್ಯಾನ್ ಆಫ್ ದಿ ಮ್ಯಾಚ್’
ಇನ್ನು, ಈ ಚಿತ್ರದಲ್ಲಿ ರುಕ್ಮಿಣಿ ಅವರು ಪ್ರಿಯಾ ಎಂಬ ಪಾತ್ರ ಮಾಡುತ್ತಿದ್ದಾರೆ. ಗಾಯನದ ಬಗ್ಗೆ ಆಸಕ್ತಿ ಇರುವ ಪಾತ್ರದಲ್ಲಿ ಅವರು ಕಾಣಿಸಿಕೊಳ್ಳುತ್ತಿದ್ದಾರಂತೆ. ತನ್ನ ಇತರೆ ಜವಾಬ್ದಾರಿಗಳನ್ನು ಅರಿತು ಅದರ ಮೇಲೆ ನಿರ್ಧಾರ ತೆಗೆದುಕೊಳ್ಳುವ ಪಾತ್ರದಲ್ಲಿ ಅವರು ಕಾಣಿಸಿಕೊಳ್ಳುತ್ತಿದ್ದಾರಂತೆ.