ಪೌರ ಸೇವಾ ನೌಕರರನ್ನಾಗಿಸಲು ಸರ್ಕಾರದ ಸಮ್ಮತಿ: ಪಾಟೀಲ

Team Udayavani, Jan 20, 2020, 3:08 PM IST

ಚಿಕ್ಕೋಡಿ: ಬೆಳಗಾವಿ ಜಿಲ್ಲೆಯ ಗ್ರಾಪಂ ವತಿಯಿಂದ ಮೇಲ್ದರ್ಜೆಗೇರಿದ ಪಟ್ಟಣ ಪಂಚಾಯತಿ ಮತ್ತು ಪುರಸಭೆಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಗ್ರಾಪಂ ನೌಕರರನ್ನು ಪೌರ ಸೇವಾ ನೌಕರರೆಂದು ರಾಜ್ಯ ಸರ್ಕಾರ ಪರಿಗಣಿಸಿದೆ ಎಂದು ಬೋರಗಾಂವ ಪಟ್ಟಣ ಪಂಚಾಯತಿ ಮುಖಂಡ ಉತ್ತಮ ಪಾಟೀಲ ತಿಳಿಸಿದರು.

ರವಿವಾರ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ ಅವರು, ಬೆಳಗಾವಿಜಿಲ್ಲೆಯ ನಾಲ್ಕು ಪುರಸಭೆ ಮತ್ತು 10 ಪಟ್ಟಣದ ಪಂಚಾಯತಿಯ ವಿವಿಧ ಹುದ್ದೆಗಳಲ್ಲಿ ಕಾರ್ಯನಿರ್ವಹಿಸುವ 74 ಜನ ಗ್ರಾಪಂ ನೌಕರರಿಗೆ ಪೌರಾಡಳಿತ ಇಲಾಖೆಯು ಪೌರಸೇವಾ ನೌಕರರೆಂದು ಪರಿಗಣಿಸಿ ಅವರಿಗೆ ಆಯಾ ಹುದ್ದೆಗೆ ಅನ್ವಯವಾಗುವಂತೆ ವೇತನ ಶ್ರೇಣಿ, ರಜೆ ಸೌಲಭ್ಯ, ಇನ್ನಿತರ ಸೌಲಭ್ಯಗಳನ್ನು ನೀಡಲು ಅನುಮತಿ ನೀಡಿದೆ ಎಂದು ತಿಳಿಸಿದರು.

ಬೋರಗಾಂವ ಪಟ್ಟಣ ಪಂಚಾಯತಿ ಸದಸ್ಯ ಜೀವಂಧರ ಪಾಟೀಲ ಮಾತನಾಡಿ, ಗ್ರಾಪಂ ವತಿಯಿಂದ ಮೇಲ್ದಜೇìಗೇರಿದ ಜಿಲ್ಲೆಯ ಎಲ್ಲ ಪಪಂ ಮತ್ತು ಪುರಸಭೆಯಲ್ಲಿ ಗ್ರಾಪಂ ನೌಕರರಿಗೆ ಸಮರ್ಪಕ ವೇತನ ಇಲ್ಲದೇ ಕಳೆದ ವರ್ಷ ಐದು ದಿನಗಳ ಕಾಲ ಧರಣಿ ಸತ್ಯಾಗ್ರಹ ನಡೆಸಿದ್ದರು. ಬೋರಗಾಂವ ಪಟ್ಟಣ ಒಂದು ದಿನ ಬಂದ್‌ ಮಾಡಿ ನೌಕರರಿಗೆ ಬೆಂಬಲ ನೀಡಲಾಗಿತ್ತು. ಸಂಬಂಧಿಸಿದ ಇಲಾಖೆ ಅಧಿಕಾರಿಗಳಿಗೆ, ಸಚಿವರಿಗೆ ಮತ್ತು ಶಾಸಕರಿಗೆ ಅನೇಕ ಬಾರಿ ಮನವಿ ಮಾಡಿದರೂ ಕೂಡಾ ಪ್ರಯೋಜನವಾಗಿರಲಿಲ್ಲ. ಆದರೂ ನಾವು ನಮ್ಮ ಹೋರಾಟ ಬಿಡದೇ ಸತತ ಪ್ರಯತ್ನ ಮಾಡಿ ನೌಕರರಿಗೆ ಅನುಕೂಲ ಮಾಡಿಕೊಡಲಾಗಿದೆ ಎಂದರು. ನಮ್ಮ ಹೋರಾಟಕ್ಕೆ ಜಯ ಸಿಕ್ಕಿದೆ. ನಮ್ಮ ಪ್ರಯತ್ನಕ್ಕೆ ಜಿಲ್ಲೆಯ ಎಲ್ಲ ಶಾಸಕರು, ಸಚಿವೆ ಶಶಿಕಲಾ ಜೊಲ್ಲೆ, ಮಾಜಿ ಸಂಸದ ಪ್ರಕಾಶ ಹುಕ್ಕೇರಿ,ಚೆನ್ನಮ್ಮ ಕಿತ್ತೂರ ಶಾಸಕ ಮಹಾಂತೇಶ ದೊಡಗೌಡರ, ಕುಡಚಿ ಶಾಸಕ ಪಿ.ರಾಜೀವ ಸಹಾಯ ಸಹಕಾರನೀಡಿದ್ದಾರೆ ಎಂದು ತಿಳಿಸಿದರು.

ಈ ಸಂದರ್ಭದಲ್ಲಿ ಸುಭಾಷ ಜಗರಿ, ಪಪಂ ಜಿಲ್ಲಾ ನೌಕರರ ಸಂಘದ ಅಧ್ಯಕ್ಷ ಯಶವಂತ ಕರಬನ್ನವರ, ಉಪಾಧ್ಯಕ್ಷ ಲಕ್ಮಣ ಕೇಲಗುಡೆ ಇದ್ದರು.