ದ.ಕ.: 21 ಸಾವಿರಕ್ಕೂ ಹೆಚ್ಚು ಯುವ ಮತದಾರರ ಸೇರ್ಪಡೆ

Team Udayavani, Jan 17, 2019, 12:30 AM IST

ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ನವೆಂಬರ್‌ನಲ್ಲಿ ನಡೆದ ಮಿಂಚಿನ ನೋಂದಣಿ ಹಾಗೂ ವಿಶೇಷ ನೋಂದಣಿ ಸೇರಿದಂತೆ ಪರಿಷ್ಕೃತ ಮತದಾರರ ಪಟ್ಟಿಗೆ 21,292 ಯುವ ಮತದಾರರು ಸೇರ್ಪಡೆಗೊಂಡಿದ್ದಾರೆ ಎಂದು ಜಿಲ್ಲಾಧಿಕಾರಿ ಶಶಿಕಾಂತ ಸೆಂಥಿಲ್‌ ಪತ್ರಿಕಾ ಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಎಲ್ಲ ಯುವ ಮತದಾರರಿಗೆ ಜ. 25ರಂದು ಪುರಭವನ ದಲ್ಲಿ ನಡೆಯಲಿರುವ ರಾಷ್ಟ್ರೀಯ ಮತದಾರರ ದಿನಾಚರಣೆ ಯಲ್ಲಿ ಗುರುತುಚೀಟಿ ನೀಡಲಾಗುವುದು ಎಂದರು.

ಅಂತಿಮ ಮತದಾರರ ಪಟ್ಟಿಯಂತೆ ಜಿಲ್ಲೆಯಲ್ಲಿ ಒಟ್ಟು 16,97,417 ಮತದಾರರಿದ್ದಾರೆ. ಈ ಪೈಕಿ 8,33,719 ಪುರುಷರು ಹಾಗೂ 8,63,698 ಮಹಿಳೆಯರು. ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಒಟ್ಟು 16,98,868 ಮತದಾರರಿದ್ದು, 1,451 ಮತದಾರರು ಈ ಬಾರಿ ಕಡಿಮೆಯಾಗಿದ್ದಾರೆ ಎಂದರು.

ಮತದಾರರ ಸೇರ್ಪಡೆ ಹಾಗೂ ಕೈಬಿಡುವ ಪ್ರಕ್ರಿಯೆ ಮುಂದಿನ ಚುನಾವಣೆ ಘೋಷಣೆಯ ವರೆಗೆ ಮುಂದುವರಿಯಲಿದೆ. ಅರ್ಜಿ ಸಲ್ಲಿಸಲು ಅಥವಾ ಆಕ್ಷೇಪಣೆ ಸಲ್ಲಿಸಲು ಅವಕಾಶವಿರುತ್ತದೆ ಎಂದು ಜಿಲ್ಲಾಧಿಕಾರಿ ತಿಳಿಸಿದರು.

ಉಡುಪಿ: 4,793 ಹೊಸ ಮತದಾರರು
ಉಡುಪಿ: ಜಿಲ್ಲೆಯಲ್ಲಿ ಹೆಸರು ಸೇರ್ಪಡೆಗೆ 10,273, ರದ್ದುಗೊಳಿಸಲು 7,099, ತಿದ್ದುಪಡಿಗಾಗಿ 3,374 ಜನರು, ವಿಧಾನಸಭಾ ವ್ಯಾಪ್ತಿಯಲ್ಲಿ ಬದಲಾವಣೆಗೆ 755 ಜನರು ಅರ್ಜಿ ಸಲ್ಲಿಸಿದ್ದಾರೆ. 4,793 ಯುವ ಮತದಾರರು ನೋಂದಣಿ ಆಗಿದ್ದಾರೆ. ಒಟ್ಟು ಜನಸಂಖ್ಯೆಯ ಶೇ.80.29 ಜನ ಮತದಾರರಾಗಿದ್ದಾರೆ ಎಂದು ಜಿಲ್ಲಾಧಿಕಾರಿ ಪ್ರಿಯಾಂಕಾ ಮೇರಿ ಫ್ರಾನ್ಸಿಸ್‌ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು. 

ಅಂತಿಮ ಮತದಾರರ ಪಟ್ಟಿಯನ್ನು ಎಲ್ಲ ಮತಗಟ್ಟೆಗಳಲ್ಲಿ ಮತ್ತು ಸಹಾಯಕ ಕಮಿಷನರ್‌, ತಾಲೂಕು ಕಚೇರಿಗಳಲ್ಲಿ ಮತ್ತು ಜಿಲ್ಲಾಧಿಕಾರಿ ಕಚೇರಿಯ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದೆ. 

ಬೈಂದೂರು ಕ್ಷೇತ್ರದಲ್ಲಿ ಒಟ್ಟು 2,22,542 ಮತದಾರರು, ಕುಂದಾಪುರದಲ್ಲಿ 2,00,101, ಉಡುಪಿಯಲ್ಲಿ 2,05,566 ಕಾಪುವಿನಲ್ಲಿ 1,81,178,ಕಾರ್ಕಳದಲ್ಲಿ 1,81,386 ಸೇರಿ ಜಿಲ್ಲೆಯಲ್ಲಿ ಒಟ್ಟು 9,90,773 ಮತದಾ ರರು ಇದ್ದಾರೆ. 16 ಮಂದಿ ತೃತೀಯ ಲಿಂಗಿಗಳಿದ್ದಾರೆಂದು ತಿಳಿಸಿದರು.

ಜ. 25ರಂದು ಪುರಭವನದಲ್ಲಿ ರಾಷ್ಟ್ರೀಯ ಮತದಾರರ ದಿನ  ನಡೆಯಲಿದ್ದು, ಯುವ ಮತದಾರರ ಗುರುತು ಚೀಟಿ ವಿತರಿಸಲಾಗುವುದು.

ದೂರು ಸಲ್ಲಿಕೆಗೆ ಅವಕಾಶ
ಮತದಾರರ ಪಟ್ಟಿಯಲ್ಲಿನ ಗೊಂದಲ, ಆಕ್ಷೇಪಗಳ ಕುರಿತಂತೆ ವಿವಿಧ ಪಕ್ಷಗಳಿಗೆ ಸಂಬಂಧಿಸಿದ ಬೂತ್‌ ಮಟ್ಟದ ಏಜೆಂಟ್‌ಗಳ ಸಹಿತ ಸಾರ್ವಜನಿಕರು ಚುನಾವಣೆಗೆ ಮುಂಚಿತವಾಗಿ ದೂರು ನೀಡಿದಲ್ಲಿ ಪರಿಹರಿಸಲಾಗುವುದು ಎಂದು ಜಿಲ್ಲಾಧಿಕಾರಿ ತಿಳಿಸಿದರು.
ಮತದಾರರ ಸಹಾಯವಾಣಿ 1950 ವೆಬ್‌ಸೈಟ್‌ ceokarnataka.kar.nic.in