ವೆನ್ಲ್ಯಾಕ್ ನಲ್ಲಿ ಸಾರ್ವಜನಿಕ ಆರೋಗ್ಯ ಪ್ರಯೋಗಾಲಯ

Team Udayavani, Oct 3, 2018, 9:53 AM IST

ಮಂಗಳೂರು: ನಗರದ ಜಿಲ್ಲಾ ವೆನ್ಲ್ಯಾಕ್ ಆಸ್ಪತ್ರೆಯಲ್ಲಿ ನೂತನ ಆರೋಗ್ಯ ಪ್ರಯೋಗಾಲಯವನ್ನು ತೆರೆಯಲಾಗಿದ್ದು, ಪರಿಸರದ ಎಲ್ಲ ಸರಕಾರಿ ಆಸ್ಪತ್ರೆಗಳಲ್ಲಿ ರೋಗಿಗಳಿಂದ ಸಂಗ್ರಹಿಸುವ ಪ್ರಯೋಗಾಲಯ ಮಾದರಿಗಳನ್ನು ಇನ್ನು ಮುಂದೆ ಇಲ್ಲಿಯೇ ಉಚಿತವಾಗಿ ಪರೀಕ್ಷಿಸಬಹುದು.

ಜಿಲ್ಲಾ ಸರ್ವೇಕ್ಷಣ ಘಟಕದ ವತಿಯಿಂದ ಸುಮಾರು 50 ಲಕ್ಷ ರೂ. ವೆಚ್ಚದಲ್ಲಿ ವೆನ್ಲ್ಯಾಕ್ ನ ನೂತನ ಕಟ್ಟಡದಲ್ಲಿ ಆರಂಭಿಸಲಾದ ಪ್ರಯೋಗಾಲಯವನ್ನು ಸಚಿವ ಯು.ಟಿ. ಖಾದರ್‌ ಮಂಗಳವಾರ ಉದ್ಘಾಟಿಸಿದರು. ತಾಂತ್ರಿಕ ಉಪ ಕರಣಗಳು ಕೆಲವೇ ದಿನಗಳಲ್ಲಿ ಕೇಂದ್ರಕ್ಕೆ ಬರಲಿವೆ. ಬಳಿಕ ಖಾಸಗಿ ಪ್ರಯೋಗಾಲಯಗಳ ಅವಲಂಬನೆ ತಪ್ಪಲಿದೆ.

ಶಾಸಕ ವೇದವ್ಯಾಸ ಕಾಮತ್‌, ವಿಧಾನ ಪರಿಷತ್‌ ಸದಸ್ಯ ಐವನ್‌ ಡಿ’ಸೋಜಾ, ಜಿಲ್ಲಾ ಪಂಚಾಯತ್‌ ಅಧ್ಯಕ್ಷೆ ಮೀನಾಕ್ಷಿ ಶಾಂತಿಗೋಡು, ಮಂಗಳೂರು ತಾ.ಪಂ. ಅಧ್ಯಕ್ಷ ಮೊಹಮ್ಮದ್‌ ಮೋನು, ಜಿಲ್ಲಾಧಿಕಾರಿ ಶಶಿಕಾಂತ ಸೆಂಥಿಲ್‌ ಉಪಸ್ಥಿತರಿದ್ದರು. 

ಪ್ರಯೋಗಾಲಯದಲ್ಲಿ…
ಹೊಸದಿಲ್ಲಿಯ ಕೇಂದ್ರ ಕಣ್ಗಾವಲು ಘಟಕ, ಬೆಂಗಳೂರಿನ ರಾಜ್ಯ ಕಣ್ಗಾವಲು ಘಟಕದ ನಿಯಮಾನುಸಾರ  ಈ ಪ್ರಯೋಗಾಲಯದಲ್ಲಿ ಸಾಂಕ್ರಾಮಿಕ ರೋಗಗಳಾದ ಡೆಂಗ್ಯೂ, ಚಿಕೂನ್‌ಗುನ್ಯಾ, ಇಲಿಜ್ವರ, ಕಾಮಾಲೆ, ಟೈಫಾಯ್ಡ, ಟೈಫಸ್‌, ಮಲೇರಿಯಾ ಪರೀಕ್ಷೆ ನಡೆಸಲಾಗುವುದು. ರುಬೆಲಾ, ಮೀಸೆಲ್ಸ್‌, ಎಚ್‌1ಎನ್‌1, ಎಬೋಲಾ, ನಿಫಾ, ಜಿಕಾ ರೋಗಿಯ ಪ್ರಯೋಗಾ ಲಯ ಮಾದರಿಗಳನ್ನು ತಜ್ಞ ವೈದ್ಯರು ಸಂಗ್ರಹಿಸಿ ಮಣಿಪಾಲ, ಬೆಂಗಳೂರು, ಹೊಸದಿಲ್ಲಿಯ ಉನ್ನತ ಪ್ರಯೋಗಾಲಯಕ್ಕೆ ಕಳುಹಿಸಿ ವರದಿ ಪಡೆಯುವ ಸೌಲಭ್ಯವಿದೆ. ಜಿಲ್ಲೆಯ ಎಲ್ಲ ಸರಕಾರಿ ಆರೋಗ್ಯ ಸಂಸ್ಥೆಗಳಲ್ಲಿ ನೀರಿನ ಬ್ಯಾಕ್ಟೀರಿಯಾ ಲಜಿಕಲ್‌ ಪರೀಕ್ಷೆ ಮಾಡಲು ಅಗತ್ಯ ಸಾಧನಗಳು, ಮಲೇರಿಯಾ ಪರೀಕ್ಷೆಗೆ ಜೆಎಸ್‌ಬಿ ಸ್ಟೈನ್‌ ಅನ್ನು ನೂತನ ಕೇಂದ್ರದಲ್ಲಿ ತಯಾರಿಸಲಾಗುತ್ತದೆ.