ಬಿಸಿಯೂಟದಲ್ಲಿ ನುಶಿ ಹುಳ-ಕಲ್ಲು

Team Udayavani, Dec 6, 2019, 12:07 PM IST

ರೋಣ: ಪಟ್ಟಣದ ಗೌಡರ ಓಣಿ ಸರ್ಕಾರಿ ಹೆಣ್ಣು ಮಕ್ಕಳ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ನುಶಿ (ಹುಳ), ಕಲ್ಲು ಇರುವ ಕಳಪೆ ಮಟ್ಟದ ಬಿಸಿಯೂಟ ಪೂರೈಸುತ್ತಿರುವುದರಿಂದ ಮಕ್ಕಳು ಮನೆಯಿಂದಲೇ ಊಟದ (ಬುತ್ತಿ) ಡಬ್ಬಿ ತರುತ್ತಿದ್ದಾರೆ. ಕೆಲವು ಮಕ್ಕಳು ಮನೆಯಿಂದ ತರುವ ಊಟವನ್ನೇ ಮಾಡುತ್ತಿದ್ದರೆ, ಇನ್ನೂ ಕೆಲ ಮಕ್ಕಳು ಅನಿವಾರ್ಯವಾಗಿ ಬಿಸಿಯೂಟವನ್ನೇ ಸೇವಿಸುತ್ತಿದ್ದಾರೆ.

ಶಾಲೆಯ ಎಸ್‌ಡಿಎಂಸಿ ಸದಸ್ಯರ ದೂರಿನ ಹಿನ್ನೆಲೆಯಲ್ಲಿ ಕ್ಷೇತ್ರ ಶಿಕ್ಷಣಾಧಿಕಾರಿಗಳು ಶಾಲೆಗೆ ಬಂದು ಪ್ರಭಾರಿ ಮುಖ್ಯೋಪಾಧ್ಯಾಯರನ್ನು ವಿಚಾರಿಸಿದರೆ, ನಮ್ಮ ಶಾಲೆ ಮಕ್ಕಳಿಗೆ ನೀಡುತ್ತಿರುವ ಬಿಸಿಯೂಟ ಗುಣಮಟ್ಟದ್ದಾಗಿದೆ. ಈ ಹಿಂದೆ ಒಂದು ಬಾರಿ ಊಟದಲ್ಲಿ ಹುಳ (ನುಶಿ) ಬಂದಿತ್ತು. ಅಂದಿನಿಂದ ಅಡುಗೆಯವರು ಸ್ವಚ್ಛ–ಶುಚಿ ಆಹಾರ ನೀಡುತ್ತಿದ್ದಾರೆ. ಆದರೆ 1ನೇ ತರಗತಿ ಮಕ್ಕಳು ಬೇಗ ಹಸಿವಾಗುತ್ತದೆ ಎಂದು ಊಟದ ಡಬ್ಬಿ ತರುತ್ತಾರೆ ಎಂದು ಪ್ರಭಾರಿ ಮುಖ್ಯೋಪಾಧ್ಯಾಯ ಎಸ್‌.ಎಸ್‌. ಅಕ್ಕಿ ಹೇಳಿದರು. ಆದರೆ ಪಕ್ಕದಲ್ಲಿದ್ದಮಕ್ಕಳು “ಸುಳ್ಳ ಯಾಕ್ರೀ ಸರ್‌..ದಿನಾ ಊಟದಾಗ ನುಶಿ ಹುಳಾ ಬರ್ತಾವು ಎಂದ ಕೂಡಲೇ ಬಿಇಒ ಎನ್‌.ನಂಜುಂಡಯ್ಯ ಮುಖ್ಯೋಪಾಧ್ಯಾಯರನ್ನು ತರಾಟೆಗೆ ತೆಗೆದುಕೊಂಡರು.