ಕೊಡಗು: 13 ಕೋವಿಡ್ ಪಾಸಿಟಿವ್‌ ಪ್ರಕರಣ ದಾಖಲು

Team Udayavani, Jul 17, 2020, 6:20 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಮಡಿಕೇರಿ: ಕೋವಿಡ್ 19 ಸೋಂಕು ಬಾಧಿತ ವೃದ್ಧೆಯೊಬ್ಬರು ಗುರುವಾರ ಸಾವನ್ನಪ್ಪುವುದರೊಂದಿಗೆ ಕೊಡಗು ಜಿಲ್ಲೆಯಲ್ಲಿ ಸಾವಿನ ಸಂಖ್ಯೆ 4ಕ್ಕೆ ಏರಿದೆ.

ಹೊಸದಾಗಿ 13 ಕೋವಿಡ್-19 ಪಾಸಿಟಿವ್‌ ಪ್ರಕರಣಗಳು ವರದಿಯಾಗಿವೆ. ಸೋಂಕಿತರ ಸಂಖ್ಯೆ 239ಕ್ಕೆ ಏರಿಕೆಯಾಗಿದೆ.

ಸೋಮವಾರಪೇಟೆಯ ತೊರೆನೂರು ಗ್ರಾಮದ 90 ವರ್ಷದ ವೃದ್ಧೆ ಮೃತಪಟ್ಟವರು. ಸಾವಿನ ಬಳಿಕ ಕೋವಿಡ್‌ ಪರೀಕ್ಷೆ ನಡೆಸಿದ್ದು, ಸೋಂಕು ದೃಢಪಟ್ಟಿದೆ.

ಅವರಿಗೆ ಬೇರಾವುದೇ ರೋಗ ಲಕ್ಷಣಗಳಿಲ್ಲದ ಕಾರಣ ಕೋವಿಡ್‌ ಸಂಬಂಧಿತ ಸಾವು ಎಂದು ನಿರ್ಧರಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ತಿಳಿಸಿದ್ದಾರೆ.

ಗುರುವಾರ ಸೋಂಕು ದೃಢವಾದ 13 ಮಂದಿಯಲ್ಲಿ 3 ವರ್ಷದ ಬಾಲಕ, 64 ವರ್ಷದ ಮಹಿಳೆ, 20 ವರ್ಷದ ಯುವತಿ, 21 ವರ್ಷದ ಯುವಕ ಸೇರಿದ್ದಾರೆ.

ಕಾಸರಗೋಡು: 18 ಪ್ರಕರಣ
ಜಿಲ್ಲೆಯಲ್ಲಿ ಗುರುವಾರ 18 ಮಂದಿಗೆ ಕೋವಿಡ್‌ ಬಾಧಿಸಿದೆ. 11 ಮಂದಿಗೆ ಸಂಪರ್ಕದ ಮೂಲಕ ಸೋಂಕು ತಗಲಿದೆ. ನಾಲ್ವರು ವಿದೇಶಗಳಿಂದ, ಮೂವರು ಇತರ ರಾಜ್ಯಗಳಿಂದ ಆಗಮಿಸಿದವರು.

ಮಂಗಲ್ಪಾಡಿಯ ಮಹಿಳೆ, ಮೂವರು ಪುರುಷರು, 14, 3 ವರ್ಷ ಮತ್ತು 40 ದಿನಗಳ ವಯೋಮಾನದ ಮಕ್ಕಳು, ಮಧೂರಿನ ಯುವಕ, ಚೆಮ್ನಾಡ್‌ನ‌ ಮಹಿಳೆ, ಪನತ್ತಡಿಯ ವೃದ್ಧ ಸಂಪರ್ಕದಿಂದ ಸೋಂಕು ತಗಲಿದವರು.