ಕೊಪ್ಪಳದಲ್ಲಿ ಐವರು ಆರೋಗ್ಯ ಸಿಬ್ಬಂದಿ ಸೇರಿ 14 ಜನರಿಗೆ ಸೋಂಕು ದೃಢ
Team Udayavani, Jun 26, 2020, 3:07 PM IST
ಕೊಪ್ಪಳ: ಜಿಲ್ಲೆಯಲ್ಲಿ ಕೋವಿಡ್-19 ಸೋಂಕು ತನ್ನ ಆರ್ಭಟವನ್ನು ಮುಂದುವರೆಸಿದೆ. ಇಂದು ಮತ್ತೆ ಐವರು ಆರೋಗ್ಯ ಸಿಬ್ಬಂದಿ ಸೇರಿ 14 ಜನರಿಗೆ ಸೋಂಕು ದೃಢಪಡುವ ಮೂಲಕ ಜಿಲ್ಲೆಯ ಜನರನ್ನು ಬೆಚ್ಚಿ ಬೀಳುವಂತೆ ಮಾಡಿದೆ.
ಗುರುವಾರದ ಸಂಜೆಯ ವರದಿಯ ಪ್ರಕಾರ ಜಿಲ್ಲೆಯಲ್ಲಿ 66 ಜನರಲ್ಲಿ ಸೋಂಕು ದೃಢವಾಗಿತ್ತು. ಆದರೆ ಇಂದು ಮತ್ತೆ14 ಜನರಿಗೆ ಕೋವಿಡ್ ಸೋಂಕು ದೃಢಪಟುವ ಮೂಲಕ ಜಿಲ್ಲೆಯ ಸೋಂಕಿತರ ಸಂಖ್ಯೆ 80ಕ್ಕೆ ಏರಿಕೆಯಾದಂತಾಗಿದೆ.
ಐವರು ಕೋವಿಡ್-19 ವಾರಿಯರ್ಸ್ ಗೆ ಸೋಂಕು ತಗುಲಿದ್ದು ಜನರ ಆತಂಕಕ್ಕೆ ಕಾರಣವಾಗಿದೆ. ಕೆಲ ಸೋಂಕಿತರು ಬಳ್ಳಾರಿ, ಜಿಂದಾಲ್, ಬಾಂಬೆ ಸಂಪರ್ಕ ಇದ್ದು, ಇನ್ನು ಕೆಲವರಿಗೆ ಟ್ರಾವೆಲ್ ಹಿಸ್ಟರಿ ಪತ್ತೆ ಹಚ್ಚಬೇಕಾಗಿದೆ.
ಜಿಲ್ಲಾಡಳಿತ 14 ಜನರ ಪ್ರಾಥಮಿಕ, ದ್ವಿತೀಯ ಸಂಪರ್ಕಿತರ ಪತ್ತೆ ಕಾರ್ಯ ನಡೆಸುತ್ತಿದೆ. ಸೋಂಕಿತರನ್ನ ಜಿಲ್ಲಾ ಕೋವಿಡ್ ಆಸ್ಪತ್ರೆಗೆ ದಾಖಲು ಮಾಡಿದ್ದು, ರಾಜ್ಯ ಹೆಲ್ತ್ ಬುಲೆಟಿನ್ ನಲ್ಲಿ ಘೋಷಣೆ ಮಾಡುವ ಸಾಧ್ಯತೆ ಇದೆ.