ಅಪಘಾತಕ್ಕೆ ಆಹ್ವಾನ ನೀಡುತ್ತಿದೆ ಪಂದುಬೆಟ್ಟು ಮುಖ್ಯ ರಸ್ತೆ ಮಧ್ಯೆಯ ಹೊಂಡ!

Team Udayavani, Sep 4, 2021, 5:46 AM IST

ಮಲ್ಪೆ: ಆದಿವುಡುಪಿ-ಮಲ್ಪೆ ಮುಖ್ಯರಸ್ತೆಯ ಪಂದುಬೆಟ್ಟು ಬಳಿ ರಸ್ತೆ ಮಧ್ಯೆ ಭಾರಿ ಗಾತ್ರದ ಹೊಂಡ ನಿರ್ಮಾಣಗೊಂಡಿದ್ದು, ವಾಹನಗಳ ಸಂಚಾರಕ್ಕೆ ಅಡ್ಡಿ ಉಂಟಾಗಿದೆ. ರಸ್ತೆ ಮಧ್ಯೆ ಸುಮಾರು 5 ಅಡಿಗಳಷ್ಟು ವಿಸ್ತಾರದಲ್ಲಿ ಹೊಂಡವಾಗಿದ್ದು, ದ್ವಿಚಕ್ರ ಸವಾರರು ಸೇರಿದಂತೆ ವಾಹನ ಸಾವರರಿಗೆ ಅಪಾಯ ಎದುರಾಗಲಿದೆ.

ಇದು ರಾಷ್ಟ್ರೀಯ ಹೆದ್ದಾರಿಯಾಗಿದ್ದು, ಪ್ರಮುಖವಾಗಿ ಮೀನುಗಾರಿಕೆ ಬಂದರು ಮಲ್ಪೆಗೆ ಹೊಂದಿಕೊಂಡಿರುವ ರಸ್ತೆಯಾದ್ದರಿಂದ ದಿನನಿತ್ಯ ಸಾವಿರಾರು ಸಂಖ್ಯೆಯಲ್ಲಿ ವಾಹನಗಳು ಸಂಚರಿಸುತ್ತದೆ.

ಈ ರಸ್ತೆಯಲ್ಲಿರುವ ಗುಂಡಿಯ ಪಕ್ಕದಲ್ಲಿಯೇ ವಾಹನ ಸವಾರರು ಗುಂಡಿ ತಪ್ಪಿಸಲು ಒಮ್ಮೆಲೆ ಬದಿಗೆ ಸರಿದಾಗ ಎದುರು ಅಥವಾ ಹಿಂದಿನಿಂದ ಬರುವ ವಾಹನಗಳಿಗೆ ಢಿಕ್ಕಿ ಹೊಡೆದು ಅನಾಹುತಗಳನ್ನು ತಂದುಕೊಳ್ಳುವ ಪ್ರಮೇಯಗಳು ಸಾಕಷ್ಟು ಬಾರಿ ನಡೆದಿದೆ. ಈ ಹಿಂದೆ ಸ್ಥಳೀಯರು ಒಂದೆರಡು ಸಲ ಸಿಮೆಂಟ್‌ ಮಿಶ್ರಿತ ಜಲ್ಲಿಹಾಕಿ ಹೊಂಡ ಮುಚ್ಚುವ ಕೆಲಸವನ್ನು ಮಾಡಿದ್ದರೂ ಮತ್ತೆ ಅದು ಯಥಾಸ್ಥಿಗೆ ತಲುಪಿದೆ.

ಇದನ್ನೂ ಓದಿ:ಮಲ್ಪೆ-ತೊಟ್ಟಂ: ಕೈರಂಪಣಿ ಬಲೆಗೆ ಬಿತ್ತು ರಾಶಿ ರಾಶಿ ಪಾಂಪ್ರಟ್‌ ಮೀನು!

ಇಂತಹದೇ ಮತ್ತೊಂದು ಹೊಂಡ ಪಂದುಬೆಟ್ಟು ವಿಲೇಜ್‌ ಇನ್‌ ಬಾರ್‌ ಸಮೀಪವೂ ನಿರ್ಮಾಣಗೊಂಡಿದೆ.

ಮಳೆಗಾಲವಾದ್ದರಿಂದ ಈ ಹೊಂಡದಲ್ಲಿ ನೀರು ನಿಂತು ದ್ವಿಚಕ್ರ ಸವಾರರು ಹೊಂಡದ ಅರಿವಿಲ್ಲದೆ ತೆರಳುವುದರಿಂದ ಬೈಕಿನೊಂದಿಗೆ ಹೊಂಡಕ್ಕೆ ಬಿದ್ದು ಗಾಯಗೊಳ್ಳುತ್ತಿದ್ದಾರೆ. ದಿನಂಪ್ರತಿ ಇಷ್ಟೆಲ್ಲ ಅನಾಹುತಗಳು ನಡೆಯುತ್ತಿದ್ದರೂ ಹೆದ್ದಾರಿ ಇಲಾಖೆಯಾಗಲಿ, ಸ್ಥಳೀಯಾಡಳಿತವಾಗಿಲಿ ಸುಮ್ಮನಿದೆ ಎಂದು ಸಾರ್ವಜನಿಕರು ದೂರಿದ್ದಾರೆ.