Malpe Beach: ಸಮುದ್ರದಲ್ಲಿ ಮುಳುಗುತ್ತಿದ್ದ ಇಬ್ಬರ ರಕ್ಷಣೆ

Team Udayavani, May 9, 2024, 12:50 AM IST

ಮಲ್ಪೆ: ಸಮುದ್ರದ ಅಲೆಗೆ ಸಿಕ್ಕು ಮುಳುಗುತ್ತಿದ್ದ ಇಬ್ಬರನ್ನು ಜೀವ ರಕ್ಷಕರು ರಕ್ಷಿಸಿರುವ ಘಟನೆ ಮಲ್ಪೆಯ ಕಡಲ ತೀರದಲ್ಲಿ ಬುಧವಾರ ನಡೆದಿದೆ.

ಅಲೆಗಳ ಅಬ್ಬರದಲ್ಲಿ ಮುಳುಗುತ್ತಿದ್ದ ಗೋಪಿನಾಥ್‌ (25) ರಂಗನಾಥ (26) ಪ್ರಾಣಾಪಾಯದಿಂದ ಪಾರಾದವರು.

ವಿಜಯನಗರ ಜಿಲ್ಲೆಯ ಕೊಟ್ಟೂರು ತಾಲೂಕಿನ 6 ಜನರ ಯುವಕರ ತಂಡ ಮಲ್ಪೆ ಕಡಲ ತೀರಕ್ಕೆ ಬಂದಿತ್ತು. ಅವರು ಸ್ನಾನಕ್ಕೆಂದು ಸಮುದ್ರಕ್ಕಿಳಿದಾಗ ಈ ಘಟನೆ ನಡೆದಿದೆ. ಬೆಳಗ್ಗೆ 6:45 ರ ವೇಳೆಗೆ ಮಲ್ಪೆ ಬೀಚ್‌ನ ಮುಖ್ಯ ಭಾಗದಿಂದ ಉತ್ತರ 100 ಮೀ ದೂರದಲ್ಲಿ ಸಮುದ್ರತೀರದಲ್ಲಿ ಈಜುತ್ತಿದ್ದಾಗ, ಗುಂಪಿನ ಇಬ್ಬರು ಸದಸ್ಯರು ಅಲೆಗಳ ಹೊಡೆತಕ್ಕೆ ಸಿಲುಕಿದರು. ಅವರನ್ನು ತತ್‌ಕ್ಷಣವೇ ಕಡಲ ಜೀವ ರಕ್ಷಕರು ರಕ್ಷಿಸಿ ಮೇಲಕ್ಕೆ ತಂದರು.

ಇತ್ತೀಚಿನ ಹವಾಮಾನ ಪರಿಸ್ಥಿತಿ ಮತ್ತು ಅಮಾವಾಸ್ಯೆ ದಿನದ ಪರಿಣಾಮದಿಂದ ಸಮುದ್ರದ ಅಲೆಗಳ ಅಬ್ಬರ ಜಾಸ್ತಿ ಇತ್ತು. ವಾಟರ್‌ ನ್ಪೋರ್ಟ್ಸ್ ಮತ್ತು ಜನರು ನೀರಿಗೆ ಇಳಿಯದಂತೆ ಜಿಲ್ಲಾಡಳಿತ ನಿಷೇಧ ಹೇರಿತ್ತು. ಆದರೂ ಪ್ರವಾಸಿಗರು ಮಾತ್ರ ಜೀವ ರಕ್ಷಕರ ಕಣ್ಣು ತಪ್ಪಿಸಿ ನೀರಿಗಿಳಿಯುತ್ತಿದ್ದರು ಎನ್ನಲಾಗಿದೆ.