ಮಲ್ಪೆ: ನವಶಕ್ತಿ ವೈಭವದಲ್ಲಿ ದೇವಿ ಆವೇಶ

Team Udayavani, Mar 10, 2018, 6:10 AM IST

ಮಲ್ಪೆ: ಇಲ್ಲಿಗೆ ಸಮೀಪದ ಭಜನ ಮಂದಿರವೊಂದರ ವಾರ್ಷಿಕೋತ್ಸವ ಕಾರ್ಯಕ್ರಮದಲ್ಲಿ ನವಶಕ್ತಿ ವೈಭವ ನೃತ್ಯ ಕಾರ್ಯಕ್ರಮದ ವೇಳೆ ದೇವಿ ಪಾತ್ರಧಾರಿಯೊಬ್ಬರಿಗೆ ಶಕ್ತಿ ಆವಾಹನೆಯಾಗಿ ಪ್ರೇಕ್ಷಕರನ್ನು ಬೆರಗುಗೊಳಿಸಿದ ಘಟನೆ ನಡೆದಿದೆ, ಸನ್ನಿವೇಶದ ವೀಡಿಯೋ ಚಿತ್ರಿಕೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

ಮಂದಿರದ ಮಹಿಳಾ ಮಂಡಲದ ಸದಸ್ಯರು ನವಶಕ್ತಿ ನೃತ್ಯ ವೈಭವಕಾರ್ಯಕ್ರಮವನ್ನು ಪ್ರಸ್ತುತಪಡಿಸಿದ್ದರು. ಅದು ಆ ದಿನದ ಕಾರ್ಯಕ್ರಮದ ಕೊನೆಯ ಭಾಗವಾಗಿತ್ತು. 

ಮಹಿಷಾಸುರ ವಧೆಯ ಸನ್ನಿವೇಶ ಹತ್ತಿರವಾಗುತ್ತಿದ್ದಂತೆ ಮುಖ್ಯ ದೇವಿ ಪಾತ್ರಧಾರಿಯ ಹಿಂಭಾಗದಲ್ಲಿ ಮೂರನೆಯವರಾಗಿದ್ದ ದೇವಿ ಪಾತ್ರಧಾರಿಯೊಬ್ಬರು ಆವೇಶಗೊಂಡರು, ಖಡ್ಗ ಸಹಿತ ಕಂಪಿಸಲಾ ರಂಭಿಸಿದರು. ಇದನ್ನು ಗಮನಿಸಿದ ಆಕೆಯ ಹಿಂದಿದ್ದ ಪಾತ್ರಧಾರಿಗಳು ನಿಯಂತ್ರಣಕ್ಕೆ ಪ್ರಯತ್ನಿಸಿದರು. ಮಹಿಷಾಸುರ ವಧೆಯಾಗುತ್ತಿದ್ದಂತೆ ಆಕೆ ಖಡ್ಗ ಝಳಪಿಸುತ್ತಿರುವುದನ್ನು ಗಮನಿಸಿದ ಉಳಿದ ಪಾತ್ರಧಾರಿಗಳು ಮತ್ತು ವೇದಿಕೆಗೆ ಧಾವಿಸಿದ ಸಂಘಟಕರು ಆಕೆಯನ್ನು ಆಧರಿಸಿ ಹಿಡಿದುಕೊಂಡು ಉಪಚರಿಸಿದರು. 

ಸೂಕ್ತ ಉಪಚಾರದ ಬಳಿಕ ಸ್ವಲ್ಪ ಹೊತ್ತಿನಲ್ಲೇ ಆಕೆ ಸಹಜ ಸ್ಥಿತಿಗೆ ತಲುಪಿದ್ದಾರೆ. ಈ ಸನ್ನಿವೇಶವನ್ನು ಕಾರ್ಯಕ್ರಮ ನೋಡಲು ಬಂದವರು ಮೊಬೈಲ್‌ನಲ್ಲಿ ಚಿತ್ರೀಕರಿಸಿದ್ದು, ಈ ದೃಶ್ಯಾವಳಿ ಈಗ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತ ಕುತೂಹಲ ಮೂಡಿಸುತ್ತಿದೆ.