Delhi Rape: ಅಧಿಕಾರಿ ಪುತ್ರ ಆರೋಪಿಯಲ್ಲ

Team Udayavani, Aug 29, 2023, 8:46 PM IST

ನವದೆಹಲಿ: ಗೆಳಯನ ಮಗಳನ್ನೇ ಅತ್ಯಾಚಾರಕ್ಕೊಳಪಡಿಸಿ ಅಮಾನತಾಗಿರುವ ದೆಹಲಿ ಅಧಿಕಾರಿ ಪ್ರಕರಣದಲ್ಲಿ, ಬೇರೆ ಯಾರನ್ನೂ ಆರೋಪಿಗಳೆಂದು ಹೆಸರಿಸಿಲ್ಲ. ಅಧಿಕಾರಿಯ ಮಗನೂ ಆರೋಪಿಯಲ್ಲ ಎಂದು ಪೊಲೀಸರು ಮಂಗಳವಾರ ತಿಳಿಸಿದ್ದಾರೆ. ಸಂತ್ರಸ್ತೆಯ ಮೇಲೆ ಬೇರೆ ವ್ಯಕ್ತಿಗಳೂ ಅತ್ಯಾಚಾರವೆಸಗಿದ್ದಾರೆ ಎಂಬ ಆರೋಪಗಳೂ ಇವೆ. ಈ ಹಿನ್ನೆಲೆಯಲ್ಲಿ ದೆಹಲಿ ಹೈಕೋರ್ಟ್‌, ಆ ಇನ್ನಿತರ ಆರೋಪಿಗಳು ಯಾರು? ಸಂತ್ರಸ್ತೆ ಹೇಳಿರುವುದೇನು? ಉಳಿದ ಆರೋಪಿಗಳ ವಿರುದ್ಧ ಕೈಗೊಂಡಿರುವ ಕ್ರಮ ಏನು? ಎಂಬುದರ ಮಾಹಿತಿ ಸಲ್ಲಿಸುವಂತೆ ಸೂಚನೆ ನೀಡಿತ್ತು.

ಈ ಸಂಬಂಧಿಸಿದಂತೆ ಪೊಲೀಸರು ಮಂಗಳವಾರ ಮಾಹಿತಿ ಸಲ್ಲಿಸಿದ್ದು, ಸಂತ್ರಸ್ತೆ ನೀಡಿರುವ ಲಿಖೀತ ದೂರಿನಲ್ಲಿ ಮಾಜಿ ಅಧಿಕಾರಿಯನ್ನು ಮಾತ್ರ ಆಕೆ ಉಲ್ಲೇಖೀಸಿದ್ದಾರೆ. ಅವರ ಮಗನನ್ನಾಗಲೀ ಅಥವಾ ಬೇರೆ ಯಾವುದೇ ಆರೋಪಿಗಳ ಹೆಸರನ್ನಾಗಲೀ ಉಲ್ಲೇಖೀಸಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಪ್ರಕರಣ ಏನು?: ದೆಹಲಿ ಸರ್ಕಾರದ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಅಭಿವೃದ್ಧಿ ಇಲಾಖೆಯ ಅಧಿಕಾರಿಯಾಗಿದ್ದ ಪ್ರೇಮೋದಯ್‌ ಖಾಖಾ ತಮ್ಮ ನಿವಾಸದಲ್ಲೇ ಆಶ್ರಯ ಪಡೆದಿದ್ದ 14 ವರ್ಷದ ಅಪ್ರಾಪ್ತ ಯುವತಿಯ ಮೇಲೆ ಅತ್ಯಾಚಾರ ನಡೆಸಿ, ಆಕೆ ಗರ್ಭ ಧರಿಸಲು ಕಾರಣವಾಗಿದ್ದರು. ಅವರ ಪತ್ನಿಯೇ ಗರ್ಭಪಾತ ಮಾಡಿಸಿದ್ದರು!