ಒಳ್ಳೇ ಕಥೆ ಸಿಕ್ಕರೆ ಪುನೀತ್‌ ಜೊತೆ ನಟನೆ

Team Udayavani, May 21, 2020, 4:21 AM IST

ಡಾ.ರಾಜ್‌ ಪುತ್ರರು ಒಟ್ಟಿಗೆ ಎಲ್ಲೇ ಸೇರಲಿ ಅಲ್ಲೊಂದು ಕಾಮನ್‌ ಪ್ರಶ್ನೆ ತೂರಿಬರೋದು ಸಹಜ. ಅದು ನಿನ್ನೆ ಮೊನ್ನೆಯ ಪ್ರಶ್ನೆಯಂತೂ ಅಲ್ಲ. ಹಲವು ವರ್ಷಗಳಿಂದಲೂ ಅಂಥದ್ದೊಂದು ಪ್ರಶ್ನೆ ತೂರಿಬರುತ್ತಲೇ ಇದೆ. ಆ ಪ್ರಶ್ನೆಗೆ ಅಷ್ಟೇ ಪ್ರೀತಿಯಿಂದಲೇ ಅವರು ಉತ್ತರಿಸುವ ಮೂಲಕ ಅಭಿಮಾನಿಗಳಿಗೆ ಖುಷಿಪಡಿಸುತ್ತಲೇ ಇದ್ದಾರೆ. ಇಷ್ಟಕ್ಕೂ ಆ ಪ್ರಶ್ನೆ ಏನು ಎಂಬ ಕುತೂಹಲಕ್ಕೆ ಇಲ್ಲಿದೆ ಉತ್ತರ.

ಶಿವರಾಜಕುಮಾರ್‌ ಅಭಿನಯದ “ಓಂ’ ಸಿನಿಮಾ 25 ವರ್ಷ ಪೂರೈಸಿದ ಹಿನ್ನೆಲೆಯಲ್ಲಿ, ಶಿವರಾಜಕುಮಾರ್‌ ಆನ್‌ಲೈನ್‌ ಲೈವ್‌ ಬಂದಿದ್ದರು. ಆ ಸಂದರ್ಭದಲ್ಲಿ ಅಭಿಮಾನಿಗಳು ಶಿವರಾಜಕುಮಾರ್‌ ಅವರನ್ನು ಎಲ್ಲಾ ಪ್ರಶ್ನೆಗಳನ್ನು ಕೇಳುವುದರ ಜೊತೆಯಲ್ಲಿ, ನೀವು ಹಾಗು ಪುನೀತ್‌ರಾಜಕುಮಾರ್‌ ಇಬ್ಬರು ಯಾವಾಗ ನಟಿಸುತ್ತೀರಿ ಎಂಬ ಪ್ರಶ್ನೆಯನ್ನು ಮುಂದಿಟ್ಟರು. ಆಗ ಶಿವರಾಜಕುಮಾರ್‌, ನಗುತ್ತಲೇ ಆ ಪ್ರಶ್ನೆಗೆ ಉತ್ತರ ಕೊಡಲು ಸಜ್ಜಾದರು.

ನಾನು ಈ ಪ್ರಶ್ನೆಗೆ ಹಲವು ಬಾರಿ ಉತ್ತರಿಸುತ್ತಲೇ ಬಂದಿದ್ದೇನೆ. ಬಹಳ ವರ್ಷಗಳಿಂದಲೂ ನನಗೆ ಎಲ್ಲೇ ಹೋದರೂ ಫ್ಯಾನ್ಸ್‌ ಈ ಪ್ರಶ್ನೆ ಕೇಳುತ್ತಾರೆ. ನನಗೊಬ್ಬನಿಗೆ ಅಲ್ಲ, ಪುನೀತ್‌ಗೂ ಇದೇ ಪ್ರಶ್ನೆ ಬರುತ್ತೆ. ಈ ಪ್ರಶ್ನೆಗೆ ನಾನು ಉತ್ತರಿಸುವುದಾದರೆ, 100% ನಾನು ಮತ್ತು ಪುನೀತ್‌ರಾಜಕುಮಾರ್‌ ಇಬ್ಬರೂ ಒಟ್ಟಿಗೆ ಸಿನಿಮಾದಲ್ಲಿ ನಟಿಸ್ತೀವಿ. ಆದರೆ, ಒಳ್ಳೆಯ ಕಥೆ ಬೇಕಲ್ಲವೇ?

ಒಳ್ಳೆಯ ಕಥೆ, ಪಾತ್ರಗಳು ಸಿಕ್ಕರೆ ಖಂಡಿತವಾಗಿಯೂ ಇಬ್ಬರು ಜೊತೆಯಲ್ಲೇ ನಟಿಸುತ್ತೇವೆ. ಆಮೇಲೆ, ಆ ಕಥೆ ಚೆನ್ನಾಗಿದ್ದು, ನಾವೂ ಒಪ್ಪಿ ಮಾಡಿದರೆ, ಅದು ನಮ್ಮ ಹೋಮ್‌ ಬ್ಯಾನರ್‌ ವಜ್ರೆàಶ್ವರಿ ಕಂಬೈನ್ಸ್‌ನಲ್ಲೇ ತಯಾರಾಗಲಿದೆ ಎಂದು ಉತ್ತರಿಸಿದರು ಶಿವರಾಜಕುಮಾರ್‌. ಅದೇನೆ ಇರಲಿ, ಈ ಪ್ರಶ್ನೆಗೆ ಮೊದಲಿನಿಂದಲೂ ಶಿವರಾಜ್‌ಕುಮಾರ್‌ ಆಗಲಿ, ಪುನೀತ್‌ರಾಜಕುಮಾರ್‌ ಆಗಲಿ ಉತ್ತರಿಸುತ್ತಲೇ ಬಂದಿದ್ದಾರೆ.

ಇಲ್ಲಿಯವರೆಗೂ ಅಂಥದ್ದೊಂದು ಒಳ್ಳೆಯ ಕಥೆ ಸಿಕ್ಕಿಲ್ಲ. ಮುಂದಿನ ದಿನಗಳಲ್ಲಿ ಇಬ್ಬರಿಗೂ ಸರಿಹೊಂದುವ ಕಥೆ ಸಿಕ್ಕರೆ, ಖಂಡಿತ ಶಿವರಾಜಕುಮಾರ್‌ ಮತ್ತು ಪುನೀತ್‌ ಸಹೋದರರು ಒಂದೇ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇಬ್ಬರು ತೆರೆ ಮೇಲೆ ರಾರಾಜಿಸಿದರೆ, ಅವರಿಬ್ಬರ ಅಭಿಮಾನಿಗಳಿಗಂತೂ ಹಬ್ಬದೂಟವೇ ಸರಿ. ಆದಷ್ಟು ಬೇಗ, ಇವರಿಬ್ಬರಿಗೂ ಸರಿ ಎನಿಸುವ ಕಥೆ ಸಿಗಲಿ ಎಂಬುದೇ ಆಶಯ.