ನೊಗ್‌ರಾಜ್‌ ಪ್ರದರ್ಶನ ಹೆಚ್ಚಾಯ್ತು

Team Udayavani, Jan 15, 2018, 4:30 PM IST

ಸಾದ್‌ಖಾನ್‌ ನಿರ್ದೇಶನದ “ಹಂಬಲ್‌ ಪೊಲಿಟಿಶೀಯನ್‌ ನೊಗ್‌ರಾಜ್‌’ ಚಿತ್ರದ ಬಗ್ಗೆ ಮೆಚ್ಚುಗೆ ವ್ಯಕ್ತವಾಗಿದೆ. ಅಷ್ಟೇ ಅಲ್ಲ, ಭಾನುವಾರದಿಂದ ಚಿತ್ರಮಂದಿರಗಳ ಸಂಖ್ಯೆ ಮತ್ತು ಪ್ರದರ್ಶನಗಳೂ ಹೆಚ್ಚಾಗಿವೆ. ಹೌದು,  ಪವನ್‌ಕಲ್ಯಾಣ್‌ ಅಭಿನಯದ “ಅಜ್ಞಾತವಾಸಿ’ ಚಿತ್ರಕ್ಕೆ ಸರಿಯಾದ ಪ್ರತಿಕ್ರಿಯೆ ವ್ಯಕ್ತವಾಗದ ಹಿನ್ನೆಲೆಯಲ್ಲಿ ಆ ಚಿತ್ರ ಪ್ರದರ್ಶನಗೊಳ್ಳುತ್ತಿದ್ದ ಬೆಂಗಳೂರಿನ ನಾಲ್ಕು ಚಿತ್ರಮಂದಿರಗಳಲ್ಲಿ ಚಿತ್ರದ ಪ್ರದರ್ಶನವನ್ನು ಕಡಿತಗೊಳಿಸಿ, ಆ ಜಾಗಕ್ಕೆ ದಾನಿಶ್‌ ಸೇಠ್ಅಭಿನಯದ “ಹಂಬಲ್‌ ಪೊಲಿಟಿಶಿಯನ್‌ ನೊಗ್‌ರಾಜ್‌’ ಚಿತ್ರ ಪ್ರದರ್ಶನ ಮಾಡಲಾಗಿದೆ.

ಬೆಂಗಳೂರಿನ ಊರ್ವಶಿ, ಸಂಜಯನಗರದ  ವೈಭವ್‌, ಗೌಡನಪಾಳ್ಯದ ಶ್ರೀನಿವಾಸ ಮತ್ತು ರೆಕ್ಸ್‌ ಚಿತ್ರಮಂದಿರಗಳಲ್ಲಿ ನಾಲ್ಕು ಪ್ರದರ್ಶನವಿದ್ದ ತೆಲುಗಿನ “ಅಜ್ಞಾತವಾಸಿ’ ಚಿತ್ರವನ್ನು ಎರಡು ಪ್ರದರ್ಶನಕ್ಕೆ ಸೀಮಿತಗೊಳಿಸಿ, ಆ ಎರಡು ಪ್ರದರ್ಶನಕ್ಕೆ ಕನ್ನಡದ “ಹಂಬಲ್‌ ಪೊಲಿಟಿಶಿಯನ್‌ ನೊಗ್‌ರಾಜ್‌’ ಚಿತ್ರಕ್ಕೆ ಅವಕಾಶ ಮಾಡಿಕೊಡಲಾಗಿದೆ. 

ಅಂತೆಯೇ, ಸೋಮವಾರದಿಂದಲೂ ಒಂದಷ್ಟು ಚಿತ್ರಮಂದಿರಗಳಲ್ಲಿ ಚಿತ್ರದ ಪ್ರದರ್ಶನ ಹೆಚ್ಚುವ ಸಾಧ್ಯತೆ ಇದೆ ಎಂದು ನಿರ್ಮಾಪಕ ಪುಷ್ಕರ್‌ ಹೇಳಿದ್ದಾರೆ. ಈ ಚಿತ್ರಕ್ಕೆ ರಕ್ಷಿತ್‌ ಶೆಟ್ಟಿ ಮತ್ತು ಹೇಮಂತ್‌ರಾವ್‌ ಕೂಡ ನಿರ್ಮಾಪಕರು.