CONNECT WITH US  

ಕುಡಿಯುವ ನೀರಿಗೆ ಹಾಹಾಕಾರ

ಕೈ ಕೊಟ್ಟ ಶುದ್ಧ ಕುಡಿವ ನೀರಿನ ಘಟಕ

ಹಳಿಯಾಳ: ತಾಲೂಕಿನ ಮುರ್ಕವಾಡ ಗ್ರಾಮ ಸೇರಿದಂತೆ ಸುತ್ತಲಿನ ಗ್ರಾಮಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ತಲೆದೋರಿದೆ.
ಇಲ್ಲಿನ ಶುದ್ಧ ಕುಡಿಯುವ ನೀರಿನ ಘಟಕಗಳು ಕೈಕೊಟ್ಟಿವೆ. ಕಿರು ನೀರಿನ ಘಟಕಗಳಿಂದ ಒಂದೆರಡು ಕೊಡ ನೀರು ಪಡೆಯಲು 
ಕೆಲಸ ಬಿಟ್ಟು ಗಂಟೆಗಟ್ಟಲೇ ಸರತಿ ಸಾಲಿನಲ್ಲಿ ನಿಲ್ಲಬೇಕಾಗಿದೆ. ತಾಲೂಕು ಕೇಂದ್ರ ಹಳಿಯಾಳದಿಂದ 12 ಕಿ.ಮೀ ಅಂತರದಲ್ಲಿರುವ ಮುರ್ಕವಾಡ ಗ್ರಾಮ 3100ಕ್ಕೂ ಹೆಚ್ಚು ಜನಸಂಖ್ಯೆ ಹೊಂದಿದೆ. ಇದೀಗ ಇಲ್ಲಿ ಜಲಕ್ಷಾಮ ಜನರ ನಿದ್ದೆಗೆಡಿಸಿದೆ.

ಮುರ್ಕವಾಡದಲ್ಲಿ ಜಲಮೂಲ ಹೊಂದಿದ ಕೊಳವೆ ಬಾವಿಗಳಿಗೆ ಶುದ್ಧ ಕುಡಿಯುವ ನೀರಿನ ಘಟಕ ಸ್ಥಾಪಿಸಿದ್ದರೆ ನೀರು ಲಭ್ಯವಾಗುತ್ತಿತ್ತು. ಜಲಮೂಲ, ಜಲಧಾರೆ ಗಮನಿಸದೇ ಕೆವಲ ಜನ ವಸತಿ ಗಮನಿಸಿ ಎರಡು ಶುದ್ಧ ಕುಡಿಯುವ ನೀರಿನ ಘಟಕ ಸ್ಥಾಪಿಸಿದ್ದಲ್ಲಿ ಒಂದು ಮಾತ್ರ ಕಾರ್ಯನಿರ್ವಹಿಸುತ್ತಿದ್ದು, ಅದೂ ಸಮರ್ಪಕವಾಗಿ ನೀರು ಕೊಡದೇ ಜನರು ಸರತಿ ಸಾಲಿನಲ್ಲಿ ನಿಲ್ಲುವ ಸ್ಥಿತಿ ನಿರ್ಮಾಣವಾಗಿದೆ. ಮುರ್ಕವಾಡ ಗ್ರಾಮಸ್ಥರು ಸಚಿವರ ಬಳಿ ಸಮಸ್ಯೆ ತೊಡಿಕೊಂಡಾಗ ಸಮಸ್ಯೆ ಪರಿಹಾರಕ್ಕೆ ಗ್ರಾಪಂದವರು ಮುಂದಾದಾಗ ಗ್ರಾಮದ ದೊಡ್ಡಕೆರೆಯಲ್ಲಿ ಮೂರು ಬೋರ್‌ವೆಲ್‌ ಗಳನ್ನು ಕೊರೆಸಲಾಗಿದೆ. ಇದರಲ್ಲಿ ಎರಡು ಬೋರ್‌ವೆಲ್‌ ಕಾರ್ಯನಿರ್ವಹಿಸುತ್ತಿವೆ. ಅವುಗಳಲ್ಲಿ ಒಂದಕ್ಕೆ ಕೇವಲ ಪೈಪ್‌ಲೈನ್‌ ಆಗಿದ್ದು, ತಾಲೂಕು ಆಡಳತದಿಂದ ಸಬ್‌ ಮರ್ಸಿಬಲ್‌ ಪಂಪ್‌ ಹಾಗೂ ವಿದ್ಯುದೀಕರಣ ಮಾಡದೇ ಇರುವುದರಿಂದ ಮುರ್ಕವಾಡ ಗ್ರಾಮದ ಎಲ್ಲ ಗಲ್ಲಿಗಳಲ್ಲಿ ಕುಡಿಯುವ ನೀರಿನ ಪೂರೈಕೆ ಇಲ್ಲದಂತಾಗಿದೆ.

ಇನ್ನೂ ಗ್ರಾಮದಿಂದ ಹೋಗುವ ಶಿವಪುರ ರಸ್ತೆಯಲ್ಲಿ ಮತ್ತೂಂದು ಬೋರ್‌ವೆಲ್‌ ಕೊರೆಯಿಸಿದ್ದು, ಅದಕ್ಕೂ ಸಬ್‌ ಮರ್ಸಿಬಲ್‌
ಪಂಪ್‌ ಹಾಗೂ ವಿದ್ಯುದೀಕರಣ ಮಾಡಿಲ್ಲ. ಇದರಿಂದ ಕುಡಿಯುವ ನೀರಿನ ಸಮಸ್ಯೆ ತೀವ್ರವಾಗಿದ್ದು, ತಾಲೂಕಾಡಳಿತದ ಗಮನಕ್ಕೆ
ತಂದರೂ ಯಾವ ಪ್ರಯೋಜನವಾಗುತ್ತಿಲ್ಲ. ಕೂಲಿಕಾರರು ತಮ್ಮ ಕೆಲಸಕ್ಕೆ ಹೋಗದೇ ನೀರಿಗಾಗಿ ಕಿರು ನೀರಿನ ಜಲ ಸಂಗ್ರಹಗಾರಕ್ಕೆ
ಬೆಳಗ್ಗೆ 4ರಿಂದ ಹಾಗೂ ಸಂಜೆ 4ರಿಂದ ಪಾಳಿಯಲ್ಲಿ ಕೊಡಗಳನ್ನಿಟ್ಟು ಕಾಯುತ್ತಿರುವ ದೃಶ್ಯಗಳು ಸಾಮಾನ್ಯವಾಗಿವೆ. ರೈತರು
ದನ-ಕರುಗಳ ಸಮೇತ ಹೊಲಗಳಲ್ಲಿ ವಾಸಿಸುವಂತಾಗಿದೆ. ಗ್ರಾಮದ ಜನತೆ ನೀರಿಗಾಗಿ ಬೋರ್‌ವೆಲ್‌ ಮಾಲೀಕರಲ್ಲಿ 
ಕೋರಿಕೊಳ್ಳುತ್ತಿದ್ದು, ಮೊದಲೆ ಬರಗಾಲದ ಬವಣೆಯಿಂದ ಬೇಸತ್ತಿರುವ ರೈತರು ಬೊರ್‌ವೆಲ್‌ಗ‌ಳಲ್ಲೂ ಅಂತರ್ಜಲಮಟ್ಟ
ಕುಸಿದಿದ್ದರಿಂದ ಮತ್ತೇ ಜಲಕ್ಷಾಮ ಎದುರಿಸುವ ಭಿತಿ ಎದುರಿಸುತ್ತಿದ್ದಾರೆ.

ತಾಲೂಕಾಡಳಿತ ಕೂಡಲೇ ನೀರಿನ ಸಮಸ್ಯೆ ಬಗೆಹರಿಸಿಬೇಕು. ಸದ್ಯ ಟ್ಯಾಂಕರ್‌ ಮೂಲಕ ನೀರು ಪೂರೈಸಬೇಕು. ಒಂದು ವಾರದೊಳಗೆ ಸ್ಪಂದಿಸದಿದ್ದರೆ ಮುರ್ಕವಾಡ ಗ್ರಾಪಂ ಎದುರು ರಸ್ತೆ ತಡೆ ನಡೆಸಲಾಗುವುದು ಎಂದು ಬಿಜೆಪಿ ಯುವ ಮೋರ್ಚಾ ಅಧ್ಯಕ್ಷ ನಾಗರಾಜ ಗೌಡಾ ಎಚ್ಚರಿಸಿದ್ದಾರೆ.

ಯೋಗರಾಜ ಎಸ್‌.ಕೆ

Trending videos

Back to Top