ಫಲ್ಗುಣಿ ಒಡಲಿಗೆ ಕಲುಷಿತ ನೀರು?
Team Udayavani, Sep 18, 2018, 12:29 PM IST
ಕೂಳೂರು: ಬೈಕಂಪಾಡಿ ಕೈಗಾರಿಕಾ ಪ್ರದೇಶ ತ್ಯಾಜ್ಯ ನೀರು ಚರಂಡಿ ಮೂಲಕ ಫಲ್ಗುಣಿ ಒಡಲು ಸೇರುತ್ತಿದ್ದು, ಸ್ಥಳೀಯರಲ್ಲಿ ಆತಂಕಕ್ಕೆ ಕಾರಣವಾಗಿದೆ.
ಸೋಮವಾರ ತೋಕೂರು ಕೂಳೂರು ಪ್ರದೇಶದಲ್ಲಿ ಕಪ್ಪು ಬಣ್ಣದ ನೀರು ನೇರವಾಗಿ ನದಿ ಸೇರುತ್ತಿರುವುದು ಕಂಡುಬಂದಿದೆ. ಕೂಳೂರು ರಸ್ತೆಯಾಗಿ ವಿಶೇಷ ಆರ್ಥಿಕ ವಲಯಕ್ಕೆ ಸಾಗುವ ರಸ್ತೆ ಬದಿ ಹಾಗೂ ಮೇಲ್ ಕೊಪ್ಪಳ, ತೋಕೂರು ಸುತ್ತಮುತ್ತ ಫಲ್ಗುಣಿ ನದಿ ನೀರು ಹರಿಯುವ ಪ್ರದೇಶದಲ್ಲಿ ಸಣ್ಣಪುಟ್ಟ ಹಳ್ಳಗಳಿದ್ದು, ನೀರು ನಿಂತಾಗ ದುರ್ವಾಸನೆ ಹರಡುತ್ತಿದೆ. ಇಲ್ಲಿ ಮಾಲಿನ್ಯಕಾರಕ ನೀರು ಹರಿದು ಬರುತ್ತಿದೆ. ಸಂಸ್ಕರಣೆ ಮಾಡದೆ ನೀರು ಬಿಟ್ಟಾಗ ಇಂತಹ ಸಮಸ್ಯೆ ಉದ್ಭವಿಸುತ್ತಿದೆ. ಇದರಿಂದ ಜಲಚರಗಳ ಮೇಲೆ ಪರಿಣಾಮ ಬೀರುತ್ತಿದ್ದು, ಮತ್ಸ ಸಂಪತ್ತು ಸಾಕಷ್ಟು ಸಿಗುತ್ತಿಲ್ಲ ಎಂಬುದು ಸ್ಥಳೀಯರ ಆರೋಪ.
ತತ್ಕ್ಷಣ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ಅಧಿಕಾರಿಗಳು ಈ ಬಗ್ಗೆ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ.