ಎಸ್‌ಬಿಐನ 3 ಸಹವರ್ತಿ ಬ್ಯಾಂಕ್‌ಗಳ ಶಾಖೆ ಬಂದ್‌

Team Udayavani, Mar 22, 2017, 3:50 AM IST

ನವದೆಹಲಿ: ಸ್ಟೇಟ್‌ ಬ್ಯಾಂಕ್‌ ಆಫ್ ಮೈಸೂರು ಸೇರಿದಂತೆ 5 ಸಹವರ್ತಿ ಬ್ಯಾಂಕುಗಳು ಏ.1ರಿಂದ ಎಸ್‌ಬಿಐನಲ್ಲಿ ವಿಲೀನಗೊಳ್ಳಲಿವೆ. ಇದಾದ ಬಳಿಕ 3 ಸಹವರ್ತಿ ಬ್ಯಾಂಕ್‌ಗಳು ಹೊಂದಿರುವ ಪ್ರಧಾನ ಕಚೇರಿಗಳು ಮತ್ತು ಕೆಲ ಶಾಖೆಗಳನ್ನು ಮುಚ್ಚುವ ಕಾರ್ಯ ಏ.24ರಿಂದ ಆರಂಭವಾಗಲಿದೆ. 3 ಬ್ಯಾಂಕುಗಳ 27 ವಲಯ ಕಚೇರಿಗಳು, 81 ಪ್ರಾದೇಶಿಕ ಕಚೇರಿಗಳು ಮತ್ತು 11 ನೆಟ್‌ವರ್ಕ್‌ ಆಫೀಸ್‌ಗಳಿಗೆ ಈ ನಿರ್ಧಾರದಿಂದ ತೊಂದರೆಯಾಗಲಿದೆ. ಒಂದೇ ರೀತಿಯ ಕಾರ್ಯನಿರ್ವಹಣೆ ಎದುರಾಗುವ ಹಿನ್ನೆಲೆಯಲ್ಲಿ ಇಂಥ ನಿರ್ಧಾರ ಕೈಗೊಳ್ಳಲಾಗಿದೆ.

ಈ ನಡುವೆ ಸ್ವಂತ ಕಟ್ಟಡವುಳ್ಳ ಸ್ಥಳಗಳಲ್ಲಿ ಅಥವಾ 99 ವರ್ಷಗಳ ಕಾಲ ಈ ಹಿಂದೆಯೇ ಒಪ್ಪಂದ ಮಾಡಿಕೊಂಡಿದ್ದ ಸ್ಥಳಗಳಲ್ಲಿ ಆಯಾ ಸಹವರ್ತಿ ಬ್ಯಾಂಕ್‌ನ ಪ್ರಧಾನ ಕಚೇರಿಗಳ ಬದಲು ಎಸ್‌ಬಿಐನ ಪ್ರದೇಶಿಕ ಕಚೇರಿಗಳನ್ನು ಸ್ಥಳಾಂತರಿಸುವ ಬಗ್ಗೆಯೂ ಚರ್ಚೆ ನಡೆದಿದೆ. ಶಾಖೆಗಳು, ಕಚೇರಿಗಳನ್ನು ಮುಚ್ಚುವುದರಿಂದ ಹೆಚ್ಚುವರಿಯಾಗಿ 1,107 ಉದ್ಯೋಗಿಗಳು ಉಳಿಯುತ್ತಾರೆ. ಅವರನ್ನು ಯಾವ ಕೆಲಸಕ್ಕೆ ನಿಯೋಜಿಸುವುದು ಎಂಬ ಬಗ್ಗೆ ಯೋಚಿಸಲಾಗುತ್ತಿದೆ.