ಪದ್ಮಾವತ್‌: ಶಾಲಾ ಬಸ್‌ ದಾಳಿಕೋರರನ್ನು ಖಂಡಿಸಿ: ಕೇಜ್ರಿ ಕರೆ

Team Udayavani, Jan 25, 2018, 3:28 PM IST

ಹೊಸದಿಲ್ಲಿ : ಪದ್ಮಾವತ್‌ ಚಿತ್ರ ಪ್ರತಿಭಟನಕಾರರು ಗುರುಗ್ರಾಮದಲ್ಲಿ  ಶಾಲಾ ಮಕ್ಕಳ ಬಸ್ಸಿನ ಮೇಲೆ ದಾಳಿ ನಡೆಸಿರುವುದನ್ನು ಅತ್ಯುಗ್ರವಾಗಿ ಖಂಡಿಸಿರುವ ದಿಲ್ಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್‌ ಅವರು ಈ ರೀತಿಯ ದಾಳಿಗಳ ಬಗ್ಗೆ ಯಾರೂ ಮೂಕರಾಗಿ ಉಳಿಯಬಾರದು, ತೀವ್ರವಾಗಿ ಖಂಡಿಸಬೇಕು ಎಂದು ಹೇಳಿದ್ದಾರೆ.

“ನಾನು ಎಲ್ಲರಲ್ಲೂ ವಿನಂತಿ ಮಾಡುತ್ತೇನೆ; ನಾವಿನ್ನು ಮೂಕರಾಗಿರಲು ಸಾಧ್ಯವಿಲ್ಲ; ಈ ದಾಳಿಕೋರರು ಮುಸ್ಲಿಮರನ್ನು ಕೊಂದವರು, ದಲಿತರನ್ನು ಸಜೀವ ದಹನ ಮಾಡಿದವರು; ಚಚ್ಚಿ ಕೊಂದವರು; ಇವತ್ತು ಅವರು ನಮ್ಮ ಮಕ್ಕಳ ಮೇಲೆ ಕಲ್ಲು ಹೊಡೆಯುತ್ತಿದ್ದಾರೆ; ನಮ್ಮ ಮನೆಗೇ ನುಗ್ಗಿ ಬಂದು ನಮ್ಮ ಮೇಲೆ ದಾಳಿಗೆ ಮುಂದಾಗಿದ್ದಾರೆ; ಹಾಗಿರುವಾಗ ಇನ್ನು ಯಾರೂ ಮೂಕರಾಗಿರಬಾರದು; ಇಂತಹ ದಾಳಿಗಳನ್ನು ಖಂಡಿಸಿ ಮಾತನಾಡಲೇಬೇಕು’ ಎಂದು ಕೇಜ್ರಿವಾಲ್‌ ಗುಡುಗಿದರು. 

ಜನರು ವಿಭಜಕ ಶಕ್ತಿಗಳ ವಿರುದ್ಧ ಸೆಟೆದೆದ್ದು ಮಾತನಾಡಬೇಕು ಎಂದು ಕೇಜ್ರಿವಾಲ ದಿಲ್ಲಿಯ ಉತ್ತರ ಛತ್ರಶಾಲಾ ಸ್ಟೇಡಿಯಂ ನಲ್ಲಿ ಗಣರಾಜ್ಯೋತ್ಸವದ ಪ್ರಯುಕ್ತ ನಡೆದ ರಾಜ್ಯ ಮಟ್ಟದ ಕಾರ್ಯಕ್ರಮದಲ್ಲಿ ಮಾತನಾಡುತ್ತಾ ಹೇಳಿದರು.