ಏಷ್ಯನ್ ಬ್ಯಾಡ್ಮಿಂಟನ್: ಸಿಂಧು, ಶ್ರೀಕಾಂತ್ಗೆ ಆಘಾತ
Team Udayavani, Apr 28, 2018, 6:00 AM IST
ವುಹಾನ್ (ಚೀನ): ಎರಡು ಬಾರಿಯ ಕಾಮನ್ವೆಲ್ತ್ ಗೇಮ್ಸ್ ಚಿನ್ನ ವಿಜೇತೆ ಸೈನಾ ನೆಹ್ವಾಲ್ ಮತ್ತು ವಿಶ್ವದ 10ನೇ ರ್ಯಾಂಕಿನ ಎಚ್ಎಸ್ ಪ್ರಣಯ್ ಅವರು ಏಷ್ಯನ್ ಬ್ಯಾಡ್ಮಿಂಟನ್ ಚಾಂಪಿಯನ್ಶಿಪ್ನ ಸೆಮಿಫೈನಲಿಗೇರಿದ್ದಾರೆ. ಆದರೆ ಒಲಿಂಪಿಕ್ ಬೆಳ್ಳಿ ವಿಜೇತೆ ಪಿವಿ ಸಿಂಧು ಮತ್ತು ಅಗ್ರ ಶ್ರೇಯಾಂಕದ ಕಿದಂಬಿ ಶ್ರೀಕಾಂತ್ ನೇರ ಗೇಮ್ಗಳ ಸೋಲಿನೊಂದಿಗೆ ಹೊರಬಿದ್ದಿದ್ದಾರೆ. ಮಾಜಿ ನಂಬರ್ ವನ್ ಸೈನಾ ಶ್ರೇಯಾಂಕರಹಿತ ಆಟಗಾರ್ತಿ ಕೊರಿಯದ ಲೀ ಜಂಗ್ ಮಿ ಅವರನ್ನು 21-15, 21-13 ಗೇಮ್ಗಳಿಂದ ಸೋಲಿಸಿದರು. ಮುಂದಿನ ಸುತ್ತಿನಲ್ಲಿ ಅವರು ಚೈನೀಸ್ ತೈಪೆಯ ತೈ ಝು ಯಿಂಗ್ ಅವರನ್ನು ಎದುರಿಸಲಿದ್ದಾರೆ.
ಪ್ರಣಯ್ ಮುನ್ನಡೆ
ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಪದಕ ಗೆಲ್ಲಲು ವಿಫಲರಾಗಿದ್ದ ಪ್ರಣಯ್ ಅವರು ಕಠಿನ ಹೋರಾಟದಲ್ಲಿ ದ್ವಿತೀಯ ಶ್ರೇಯಾಂಕದ ಕೊರಿಯದ ಸನ್ ವಾನ್ ಹೊ ಅವರನ್ನು ಸೋಲಿಸಿ ಅಂತಿಮ ನಾಲ್ಕರ ಸುತ್ತಿಗೇರಿದರು. ಒಂದು ತಾಸು ಮತ್ತು 12 ನಿಮಿಷಗಳ ಹೋರಾಟದಲ್ಲಿ ಅವರು 18-21, 23-21, 21-12 ಗೇಮ್ಗಳಿಂದ ಗೆದ್ದು ಬಂದರು. ಮುಂದಿನ ಸುತ್ತಿನಲ್ಲಿ ಅವರು ಒಲಿಂಪಿಕ್ ಚಾಂಪಿಯನ್ ಚೆನ್ ಲಾಂಗ್ ಅವರನ್ನು ಎದುರಿಸಲಿದ್ದಾರೆ. ಇದೇ ವೇಳೆ ಸಿಂಧು ಏಳನೇ ಶ್ರೇಯಾಂಕದ ಕೊರಿಯದ ಸಂಗ್ ಜಿ ಹ್ಯುನ್ ಅವರಿಗೆ 19-21, 10-21 ಗೇಮ್ಗಳಿಂದ ಶರಣಾದರು.
ಕೆಟ್ಟ ಪ್ರದರ್ಶನ
ಅಂತಾರಾಷ್ಟ್ರೀಯ ಕೂಟದಲ್ಲಿ ಇದು ನನ್ನ ಕೆಟ್ಟ ಪ್ರದರ್ಶನ ಎಂದು ಸೋತ ಬಳಿಕ ಶ್ರೀಕಾಂತ್ ಹೇಳಿದರು. ನಾನು ಪಂದ್ಯದಲ್ಲಿಹಿಡಿತ ಸಾಧಿಸಲು ವಿಫಲನಾದೆ ಮತ್ತು ಎದು ರಾಳಿಗೆ ಅಂಕ ಗಳಿಸಲು ಹಲವು ಅವಕಾಶ ಮಾಡಿಕೊಟ್ಟೆ. ತಪ್ಪು ರಹಿತ ಪಂದ್ಯ ಆಡಲು ಬಯ ಸಿದ್ದೆ. ಆದರೆ ನಡೆದದ್ದೇ ಬೇರೆ ಎಂದು ಶ್ರೀಕಾಂತ್ ತಿಳಿಸಿದರು.