ಬ್ಯಾಡಗಿ:ಆಟೋದಲ್ಲೇ ಮಗು ಹೆತ್ತ ತಾಯಿ
Team Udayavani, Aug 11, 2017, 11:08 AM IST
ಬ್ಯಾಡಗಿ: ಚಾಲಕನ ಸಮಯ ಪ್ರಜ್ಞೆಯಿಂದ ಗರ್ಭಿಣಿಯೊಬ್ಬಳು ತಾಲೂಕಿನ ತರೇದಹಳ್ಳಿ ಗ್ರಾಮದ ಬಳಿ
ಆಟೋದಲ್ಲೇ ಮಗುವಿಗೆ ಜನ್ಮ ನೀಡಿದ್ದಾಳೆ. ತಾಲೂಕಿನ ಕೋಡಿಹಳ್ಳಿ ಗ್ರಾಮದ ಮಹದೇವಕ್ಕ ಮಾಲಿಂಗಪ್ಪ ಮಾತನವರ ಆಟೋದಲ್ಲಿ ಮಗುವಿಗೆ ಜನ್ಮ ನೀಡಿದವರು. ಈಗ ತಾಯಿ- ಮಗು ಕ್ಷೇಮವಾಗಿದ್ದು, ತಾಲೂಕಾಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಸಮೀಪದ ಶಂಕರೀಪುರ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಗರ್ಭಿಣಿ ಚಿಕಿತ್ಸೆ ಪಡೆಯುತ್ತಿದ್ದರು.
ವೈದ್ಯರು ಆ.16ರಂದು ಹೆರಿಗೆಯಾಗುವುದಾಗಿ ತಿಳಿಸಿದ್ದರು. ಆದರೆ, ಗುರುವಾರ ಬೆಳಗ್ಗೆ ಇದ್ದಕ್ಕಿದ್ದಂತೆ ಹೆರಿಗೆ ನೋವು ಕಾಣಿಸಿಕೊಂಡಿತು. ಈ ವೇಳೆ ಮನೆಯಲ್ಲಿ ಪತಿ ಮಾಲಿಂಗಪ್ಪ ಇರಲಿಲ್ಲ. ಮಹದೇವಕ್ಕ ಕೂಗಳತೆ ದೂರದಲ್ಲಿದ್ದ ಆಟೋ ಚಾಲಕ ಸೋಮೇಶ ಕೂರಗುಂದ ಮೂಲಕ ಆಂಬ್ಯುಲೆನ್ಸ್ಗೆ ಕರೆ ಮಾಡಿಸಿದ್ದರು. ಆಂಬ್ಯುಲೆನ್ಸ್ ಬರುವುದು ತಡವಾದ ಕಾರಣ ಮಹದೇವಕ್ಕ ಅನಿವಾರ್ಯವಾಗಿ ತಮ್ಮನ ಜೊತೆಗೂಡಿ ಆಟೋದಲ್ಲಿ ಬ್ಯಾಡಗಿ ಆಸ್ಪತ್ರೆಗೆ ಹೊರಟಿದ್ದರು.
ತರೇದಹಳ್ಳಿ ಗ್ರಾಮದ ಸಮೀಪ ಮಹಿಳೆಗೆ ಹೆರಿಗೆ ನೋವು ಉಲ್ಬಣಗೊಂಡಿತು. ಪರಿಸ್ಥಿತಿ ಅರ್ಥೈಸಿಕೊಂಡ ಚಾಲಕ ಆಟೋದ ಎರಡೂ ಬದಿ ಬಟ್ಟೆ ಕಟ್ಟಿ ಹೆರಿಗೆಗೆ ಅನುಕೂಲ ಮಾಡಿಕೊಟ್ಟರು. ಮಹಿಳೆ ಆಟೋದಲ್ಲೇ ಮಗುವಿಗೆ ಜನ್ಮ ನೀಡಿದ್ದು, ಬಳಿಕ ತಾಲೂಕಾಸ್ಪತ್ರೆಗೆ ದಾಖಲಿಸಿದ್ದಾರೆ.