ಕೋವಿಡ್ 19 ಕೋಲಾಹಲ:  ಜಿಡಿಪಿ ನಿರೀಕ್ಷೆ ಶೇ.2.5ಕ್ಕೆ ಇಳಿಕೆ

Team Udayavani, Mar 28, 2020, 10:49 PM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ದೇಶದ ಆರ್ಥಿಕತೆಯ ಮೇಲೆ ಕೋವಿಡ್ 19 ವೈರಸ್ ಬೀರಲಿರುವ ಗಂಭೀರ ಪರಿಣಾಮವನ್ನು ಗಮನಿಸಿ, ಮೂಡೀಸ್‌ ರೇಟಿಂಗ್‌ ಸಂಸ್ಥೆಯು 2020ರ ವಿತ್ತ ವರ್ಷದಲ್ಲಿ ದೇಶದ ಜಿಡಿಪಿ (ಒಟ್ಟು ದೇಶೀಯ ಉತ್ಪನ್ನ) ನಿರೀಕ್ಷೆಯನ್ನು ಶೇ.2.5ಕ್ಕಿಳಿಸಿದೆ. ಈ ಹಿಂದೆ ಇದನ್ನು ಶೇ.5.3 ಎಂದು ಅಂದಾಜಿಸಲಾಗಿತ್ತು.

2020-21ರಲ್ಲಿ ಜಿಡಿಪಿಗೆ ಭಾರೀ ಹೊಡೆತ ಬೀಳಲಿದ್ದು, ಆರ್ಥಿಕ ಪ್ರಗತಿ ಕುಂಠಿತವಾಗಲಿದೆ ಎಂದು ಮೂಡೀಸ್‌ ಭವಿಷ್ಯ ನುಡಿದಿದೆ.  3 ವಾರಗಳ ಲಾಕ್‌ ಡೌನ್‌ ನಿಂದಾಗಿ ದೇಶದಲ್ಲಿ ಉದ್ದಿಮೆಗಳು, ಫ್ಯಾಕ್ಟರಿಗಳು ಬಂದ್‌ ಆಗಲಿವೆ, ಸಾವಿರಾರು ಮಂದಿ ತಾತ್ಕಾಲಿಕವಾಗಿ ಉದ್ಯೋಗ ಕಳೆದುಕೊಳ್ಳಲಿದ್ದಾರೆ, ಆದಾಯ ಕುಂಠಿತವಾಗಲಿದೆ.

ಒಟ್ಟಾರೆಯಾಗಿ ಪ್ರತಿಯೊಂದು ವಲಯದ ಮೇಲೂ ಇದು ದುಷ್ಪರಿಣಾಮ ಬೀರಲಿದೆ. 2021ರ ಬಳಿಕ ಆರ್ಥಿಕತೆ ಮತ್ತೆ ಹಳಿಗೆ ಬರಲಿದೆ ಎಂದು ಮೂಡೀಸ್‌ ಅಂದಾಜಿಸಿದೆ. ಅಂದರೆ, 2020ರ ವಿತ್ತ ವರ್ಷದ ಜಾಗತಿಕ ಆರ್ಥಿಕತೆಯಲ್ಲಿ ಜಿಡಿಪಿ ಶೇ.0.5ರಷ್ಟು ಕುಸಿತ ಕಾಣಲಿದ್ದು, 2021ರಲ್ಲಿ ಶೇ.3.2ಕ್ಕೇರಲಿದೆ ಎಂದಿದೆ.