ಬಿಹಾರದಲ್ಲಿ ಶೀಘ್ರವೇ ತೃತೀಯ ಲಿಂಗಿಗಳ ಬೆಟಾಲಿಯನ್?
Team Udayavani, Dec 27, 2020, 12:18 AM IST
ಪಟ್ನಾ: ಎಲ್ಲವೂ ಅಂದುಕೊಂಡಂತೆ ನಡೆದರೆ, ದೇಶದಲ್ಲೇ ತೃತೀಯ ಲಿಂಗಿಗಳ ಪ್ರತ್ಯೇಕ ಪೊಲೀಸ್ ಬೆಟಾಲಿಯನ್ ಹೊಂದಿರುವ ಮೊದಲ ರಾಜ್ಯ ಎಂಬ ಹೆಗ್ಗಳಿಕೆಗೆ ಬಿಹಾರ ಪಾತ್ರ ವಾಗಲಿದೆ. ಈವರೆಗೆ ಪೊಲೀಸ್ ಸೇವೆಯಲ್ಲಿ ತೃತೀಯ ಲಿಂಗಿಗಳ ನೇಮಕಕ್ಕೆ ಸಂಬಂಧಿಸಿ ರಾಜ್ಯ ಸರಕಾರಗಳು ನಿರ್ದಿಷ್ಠ ಅಥವಾ ಪ್ರತ್ಯೇಕ ನೀತಿ ಹೊಂದಿರಲಿಲ್ಲ.
ಈಗ ಬಿಹಾರ ಸರಕಾರವು ಇಂಥದ್ದೊಂದು ಕಾರ್ಯಕ್ಕೆ ಮುಂದಾಗಿದ್ದು, ರಾಜ್ಯ ಪೊಲೀಸ್ ಇಲಾಖೆಯಲ್ಲಿ ತೃತೀಯ ಲಿಂಗಿಗಳಿಗೆಂದೇ ನಿರ್ದಿಷ್ಟ ಬೆಟಾಲಿಯನ್ ಅನ್ನು ರಚಿಸುವ ಬಗ್ಗೆ ಪರಿಶೀಲನೆ ಆರಂಭಿಸಿದೆ ಎಂದು ಗೃಹ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಅಮೀರ್ ಸುಭಾನಿ ಹೇಳಿದ್ದಾರೆ.
40 ಸಾವಿರ ತೃತೀಯ ಲಿಂಗಿಗಳು
ಬಿಹಾರದಲ್ಲಿ 18 ವರ್ಷ ದಾಟಿದ ಸುಮಾರು 40 ಸಾವಿರ ತೃತೀಯ ಲಿಂಗಿಗಳಿದ್ದಾರೆ. ಆದರೆ, ಈ ಪೈಕಿ ಈವರೆಗೆ ಪೊಲೀಸ್ ಇಲಾಖೆಗೆ ಯಾರೊಬ್ಬರೂ ನೇಮಕಗೊಂಡಿಲ್ಲ. ಈಗ ರಾಜ್ಯ ಸರಕಾರವು ಈ ನಿಟ್ಟಿನಲ್ಲಿ ಹೆಜ್ಜೆಯಿಟ್ಟಿದ್ದು, ಸರಕಾರದ ಅನುಮತಿ ದೊರೆತ ತತ್ಕ್ಷಣವೇ, ತೃತೀಯ ಲಿಂಗಿಗಳ ನೇಮಕಕ್ಕಿರುವ ಮಾನದಂಡಗಳು ಹಾಗೂ ಇತರ ತಾಂತ್ರಿಕ ವಿಚಾರಗಳನ್ನು ಅಂತಿಮಗೊಳಿಸಲಾಗುವುದು ಎಂದು ಎಡಿಜಿ ಜಿತೇಂದ್ರ ಕುಮಾರ್ ಮಾಹಿತಿ ನೀಡಿದ್ದಾರೆ.
ಹೈಕೋರ್ಟ್ಗೆ ಅರ್ಜಿ
ರಾಜ್ಯ ಪೊಲೀಸ್ ಇಲಾಖೆಗೆ 8 ಸಾವಿರ ಕಾನ್ಸ್ಟೆಬಲ್ಗಳ ನೇಮಕ ಪ್ರಕ್ರಿಯೆ ಸದ್ಯದಲ್ಲೇ ನಡೆಯಲಿದ್ದು, ಈ ಪ್ರಕ್ರಿಯೆಯಲ್ಲಿ ತೃತೀಯ ಲಿಂಗಿಗಳಿಗೂ ಪಾಲ್ಗೊಳ್ಳಲು ಅವಕಾಶ ಕಲ್ಪಿಸಬೇಕು ಎಂದು ಕೋರಿ ವೀರ ಯಾದವ್ ಅವರು ಪಟ್ನಾ ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಿದ್ದರು.
ಸದ್ಯ ಆನ್ಲೈನ್ ನೇಮಕಾತಿ ಅರ್ಜಿ ಯಲ್ಲಿ “ಪುರುಷ’ ಮತ್ತು “ಮಹಿಳೆ’ ಎಂಬ 2 ಲಿಂಗಗಳ ಆಯ್ಕೆ ಗಷ್ಟೇ ಅವಕಾಶವಿದೆ. ಈ ಹಿನ್ನೆಲೆಯಲ್ಲಿ, ಅರ್ಜಿಗೆ ಸಂಬಂಧಿಸಿ ಸೂಕ್ತ ನಿರ್ಧಾರ ಕೈಗೊಳ್ಳುವಂತೆ ಸರಕಾರಕ್ಕೆ ಹೈಕೋರ್ಟ್ ಸೂಚಿಸಿತ್ತು.
ಬಿಹಾರದ ಪೊಲೀಸ್ ಇಲಾಖೆಯಲ್ಲಿ ದೊಡ್ಡಮಟ್ಟದ ಬದಲಾವಣೆ ಆಗುತ್ತಿರುವುದು ಇದು ಮೊದಲೇನಲ್ಲ. ಕಳೆದ ಫೆಬ್ರವರಿಯಲ್ಲಿ ಇಲಾಖೆಯಲ್ಲಿ ಬುಡಕಟ್ಟು ಜನಾಂಗದ ಮಹಿಳೆ ಯರಿಗೆ ಅವಕಾಶ ಕಲ್ಪಿಸಲಾಗಿದೆ. ಅಲ್ಲದೆ, ರಾಜ್ಯ ಪೊಲೀಸ್ ಇಲಾಖೆಯಲ್ಲಿ ಮಹಿಳೆಯರಿಗೆ ಶೇ.35 ಮೀಸಲಾತಿ ಯನ್ನೂ ನೀಡಲಾಗಿದೆ.