ಲಾಕ್‌ಡೌನ್‌ ನಿರ್ಬಂಧ ಸಡಿಲಿಕೆ: ಕಾರ್ಮಿಕರ ಅಂತಾರಾಜ್ಯ ಸಂಚಾರಕ್ಕಿಲ್ಲ ಅವಕಾಶ

Team Udayavani, Apr 20, 2020, 7:22 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಸೋಮವಾರದಿಂದ ದೇಶದ ಗ್ರಾಮೀಣ ಭಾಗಗಳಲ್ಲಿ ಕೆಲವು ವಲಯಗಳಿಗೆ ಲಾಕ್‌ಡೌನ್‌ ನಿರ್ಬಂಧ ಸಡಿಲಿಕೆ ಉಂಟಾಗಲಿದೆ. ಅದಕ್ಕೆ ಸಂಬಂಧಿಸಿದಂತೆ ಕೇಂದ್ರ ಗೃಹ ಸಚಿವಾಲಯ ಮಾರ್ಗಸೂಚಿಗಳನ್ನು ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಕಳುಹಿಸಿಕೊಟ್ಟಿದೆ. ಅದರ ಪ್ರಕಾರ…

– ವಲಸೆ ಕಾರ್ಮಿಕರು ಯಾವ ರಾಜ್ಯದಲ್ಲಿ ನೆಲೆಸಿದ್ದಾರೋ ಅಲ್ಲಿಯೇ ಅವರಿಗೆ ಸಂಚಾರಕ್ಕೆ ಅವಕಾಶ. ಸ್ಥಳೀಯ ಆಡಳಿತದ ವ್ಯಾಪ್ತಿಯಲ್ಲಿ ಕೆಲಸಕ್ಕಾಗಿ ನೋಂದಣಿ ಮಾಡಿಸಬೇಕು. ಕಾರ್ಮಿಕರ ಕೌಶಲ್ಯವನ್ನು ಗಮನಿಸುವಂಥ ಕಾರ್ಯಕ್ರಮ ಹಮ್ಮಿಕೊಂಡು ಆ ಕಾರ್ಮಿಕರು ಯಾವ ಕಾಮಗಾರಿಗೆ ಸೂಕ್ತ ಎಂಬುದನ್ನು ಗುರುತಿಸಿ, ಆಯಾ ಕಾಮಗಾರಿಗೆ ಅವರನ್ನು ನಿಯೋಜಿಸಬೇಕು.

– ಗ್ರಾಮೀಣ ಪ್ರದೇಶಗಳಲ್ಲಿ ನಡೆಯುವ ಕಾಮಗಾರಿಗಳಿಗೆ ಕೂಲಿಯಾಳುಗಳನ್ನು ಸಾಗಿಸುವ ಹೊಣೆಯನ್ನು ಜಿಲ್ಲಾಡಳಿತಗಳೇ ಹೊರಬೇಕು. ಕೂಲಿಯಾಳುಗಳು ಹಿಂದೆ ಕಾರ್ಯನಿರ್ವಹಿಸುತ್ತಿದ್ದ ಕಡೆಯಲ್ಲೇ ಕೆಲಸ ನಿರ್ವಹಿಸಲು ಬಯಸಿದರೆ ಹಾಗೂ ಅವರು ಬಯಸುವ ಕೆಲಸದ ಸ್ಥಳ ರಾಜ್ಯದೊಳಗೇ ಇದ್ದರೆ ಅವರನ್ನು ಅಲ್ಲಿಗೆ ಕಳುಹಿಸುವ ವ್ಯವಸ್ಥೆ ಮಾಡಬೇಕು.

– ವಲಸೆ ಕಾರ್ಮಿಕರಿಗೆ ಅಂತಾರಾಜ್ಯ ಪ್ರಯಾಣಕ್ಕೆ ಅವಕಾಶ ಇಲ್ಲ.

– ನಿಗದಿತ ಪ್ರದೇಶಕ್ಕೆ ಬಸ್‌ಗಳಲ್ಲೇ ಕರೆದೊಯ್ಯಬೇಕು. ಕರೆದೊಯ್ಯುವ ಮುನ್ನ ಆರೋಗ್ಯ ಇಲಾಖೆ ನೀಡಿರುವ ಮಾರ್ಗಸೂಚಿಗಳನ್ನು ಪಾಲಿಸಬೇಕು.

– ಅವರನ್ನು ಕರೆದೊಯ್ಯುವ ಬಸ್‌ಗಳನ್ನು ಕ್ರಿಮಿನಾಶಕಗಳಿಂದ ಶುದ್ಧಗೊಳಿಸಿರಬೇಕು. ಅವರನ್ನು ಕೊಂಡೊಯ್ಯುವಾಗ ಬಸ್‌ನೊಳಗೆ ಕಾರ್ಮಿಕರ ನಡುವೆ ಅಂತರವಿರುವಂತೆ ಅವರನ್ನು ಕೂರಿಸಬೇಕು

– ಪ್ರತಿಯೊಬ್ಬ ಕೂಲಿಯಾಳನ್ನೂ ಸ್ಕ್ಯಾನಿಂಗ್‌ಗೆ ಒಳಪಡಿಸಬೇಕು. ಅವರು ಸೋಂಕಿತರಲ್ಲ ಎಂದು ಕಂಡುಬಂದರಷ್ಟೇ ಅವರನ್ನು ಕಾಮಗಾರಿಗೆ ಕರೆದೊಯ್ಯಬೇಕು.