Hanuman Jayanti: ಭದ್ರತೆಗೆ ರಾಜ್ಯಗಳಿಗೆ ಕೇಂದ್ರ ಸರಕಾರ ಸೂಚನೆ

Team Udayavani, Apr 6, 2023, 6:05 AM IST

ಹೊಸದಿಲ್ಲಿ: ದೇಶಾದ್ಯಂತ ಗುರುವಾರ ಹನುಮಾನ್‌ ಜಯಂತಿ ಹಿನ್ನೆಲೆಯಲ್ಲಿ ಅಹಿತಕರ ಘಟನೆಗಳು ನಡೆಯದಂತೆ ಎಚ್ಚರಿಕೆ ವಹಿಸಿ. ಹೀಗೆಂದು ರಾಜ್ಯಗಳಿಗೆ ಕೇಂದ್ರ ಗೃಹ ಸಚಿವಾ ಲಯ ಬುಧವಾರ ಮುನ್ನೆಚ್ಚರಿಕೆಯ ಸುತ್ತೋಲೆ ಕಳುಹಿಸಿದೆ.

ಮಾ.30ರಂದು ರಾಮನವಮಿ ವೇಳೆ ಪಶ್ಚಿಮ ಬಂಗಾಲ, ಬಿಹಾರಗಳಲ್ಲಿ ಕೋಮು ಗಲಭೆಗಳು ನಡೆದಿದ್ದವು. ಈ ಹಿನ್ನೆಲೆಯಲ್ಲಿ ಅಂಥ ಘಟನೆಗಳು ಮರುಕಳಿಸದಂತೆ ಎಚ್ಚರಿಕೆ ವಹಿಸಲು ಸೂಚನೆ ನೀಡಲಾಗಿದೆ. ಮುಖ್ಯವಾಗಿ ಪಶ್ಚಿಮ ಬಂಗಾಲ, ಬಿಹಾರಗಳಿಗೆ ಗಂಭೀರ ಎಚ್ಚರಿಕೆ ರವಾನಿಸಿದೆ. ಯಾವುದೇ ಸಂದರ್ಭದಲ್ಲಿಯೂ ಕೂಡ ಕೋಮು ಸಾಮರಸ್ಯಕ್ಕೆ ಧಕ್ಕೆಯಾಗದಂತೆ ನೋಡಿಕೊಳ್ಳಲು ಸೂಚಿಸಲಾಗಿದೆ.

ಅರೆ ಸೇನಾಪಡೆ ನಿಯೋಜನೆ: ಕಲ್ಕತಾ ಹೈಕೋರ್ಟ್‌ನಿಂದ ತೀವ್ರ ತರಾಟೆಗೆ ಒಳಗಾದ ಬಳಿಕ ಪಶ್ಚಿಮ ಬಂಗಾಲ ಸರಕಾರ ಕೋಮುಸೂಕ್ಷ್ಮ ಪ್ರದೇಶಗಳಾದ ಹೂಗ್ಲಿ, ಹೌರಾ, ಬಾರೆಕ್‌ಪುರಗಳಲ್ಲಿ ಅರೆ ಸೇನಾಪಡೆಗಳನ್ನು ನಿಯೋಜಿಸಲು ನಿರ್ಧರಿಸಿದೆ. ಸದ್ಯ ಅಲ್ಲಿ ರಾಮನವಮಿ ವೇಳೆ ಹಿಂಸಾಕೃತ್ಯಗಳು ನಡೆದು ಪರಿಸ್ಥಿತಿ ಇನ್ನಷ್ಟೇ ತಹಬದಿಗೆ ಬರುತ್ತಿದೆ.