ಆರೋಗ್ಯಕ್ಕೆ ಮತ್ತೊಂದು ಕ್ಲೋನ್‌ ಯೋಜನೆ?

Team Udayavani, Oct 13, 2021, 11:30 AM IST

ನವದೆಹಲಿ:  ಆರೋಗ್ಯ ವಿಮೆ ವ್ಯಾಪ್ತಿಯಿಂದ ಹೊರಗೆ ಇರುವ ಸುಮಾರು 40 ಕೋಟಿ ಮಂದಿಗೆ ವಿಶೇಷ ಯೋಜನೆ ಜಾರಿಗೆ ತರಲು ಚಿಂತನೆ ನಡೆಸಲಾಗುತ್ತಿದೆ.

ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆ ಮಾದರಿಯಲ್ಲಿಯೇ ಯೋಜನೆ ಇರಲಿದೆ. ಹಾಲಿ ಇರುವ ಪ್ರಧಾನಮಂತ್ರಿ ಜನ ಆರೋಗ್ಯ ಯೋಜನೆ ಮೂಲಕ ಪ್ರತಿ ಕುಟುಂಬಕ್ಕೆ 5 ಲಕ್ಷ ರೂ. ವಿಮೆ ನೀಡಲಾಗುತ್ತದೆ ಮತ್ತು 50 ಕೋಟಿ ಮಂದಿಗೆ ಇದರಿಂದ ನೆರವಾಗಿದೆ. ಕೇಂದ್ರ ಸರ್ಕಾರದ ಮೂಲಗಳನ್ನು ಉಲ್ಲೇಖಿಸಿ “ನ್ಯೂಸ್‌18′ ವರದಿ ಮಾಡಿರುವ ಪ್ರಕಾರ ಆರೋಗ್ಯ ವಿಮೆಯಿಂದ ವಂಚಿತರಾಗಿರುವವರಿಗೆ”ಪಿಎಂಜೆಎವೈ ಕ್ಲೋನ್‌ ಕವರ್‌’ ಅನ್ನು ಜಾರಿಗೊಳಿಸಲು ಇರಾದೆಯಲ್ಲಿದೆ ಕೇಂದ್ರ ಸರ್ಕಾರ.

ಏನಿದು ಕ್ಲೋನ್‌ ಕವರ್‌?:

40 ಕೋಟಿ ಮಂದಿ ಆರ್ಥಿಕ ಸಂಕಷ್ಟದಿಂದ ಆರೋಗ್ಯ ಸೇವೆ ಪಡೆಯಲು ಸಾಧ್ಯವಾಗದೇ ಇರುವವರಿಗೆ ಮತ್ತು ವಿಮೆ ವ್ಯಾಪ್ತಿಯಿಂದ ಹೊರಗೆ ಇರುವವರಿಗೆ ಈ ಯೋಜನೆ. ಪ್ರಧಾನಮಂತ್ರಿ ಜನ ಆರೋಗ್ಯ ಯೋಜನೆ ಮಾದರಿಯಲ್ಲಿಯೇ ಹೊಸ ಯೋಜನೆ ಇರಲಿದೆ.

21 ಕಂಪನಿಗಳ ಗುರುತು:

ಸರ್ಕಾರ ಈಗಾಗಲೇ ಗುರುತಿಸಿರುವ 21 ವಿಮಾ ಕಂಪನಿಗಳೊಂದಿಗೆ ಒಪ್ಪಂದ ಮಾಡಿ ಯೋಜನೆ ಜಾರಿ ಮಾಡಲಾಗುತ್ತದೆ. ಮ್ಯಾಕ್ಸ್‌ ಬೂಪಾ ಆರೋಗ್ಯ ವಿಮಾ ಕಂಪನಿ ಲಿ., ರಾಯಲ್‌ ಸುಂದರಂ ಜನರಲ್‌ ಇನುರೆನ್ಸ್‌ ಕಂಪನಿ ಸೇರಿ ಅನೇಕ ಪ್ರಮುಖ ಕಂಪನಿಗಳ ಹೆಸರಿವೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

ವಿಮೆ ಲೆಕ್ಕಾಚಾರ: ಪಿಎಂಜೆಎವೈ – 50 ಕೋಟಿ ರಾಜ್ಯ ಸರ್ಕಾರದ ವಿಮೆಗಳನ್ನು ಹೊಂದಿರುವವರು – 3 ಕೋಟಿ ಇಸಿಎಚ್‌ಎಸ್‌/ಇಎಸ್‌ಸಿಐ/ಸಿಜಿಎಚ್‌ಎಸ್‌ – 15-17 ಕೋಟಿ ಖಾಸಗಿ ಸಂಸ್ಥೆಗಳ ಆರೋಗ್ಯ ವಿಮೆ- 14 ಕೋಟಿ  ಬಾಕಿ ಉಳಿದವರು – 40 ಕೋಟಿ