ಭಾರತದ ಯುದ್ಧನೌಕೆಗಳಿಗೆ ಸಿಂಗಾಪುರ ಬಂದರು ನೆರವು
Team Udayavani, Nov 30, 2017, 12:32 AM IST
ನವದೆಹಲಿ: ಸಿಂಗಾಪುರದ ಚಂಗಿ ನೌಕಾ ನೆಲೆಯನ್ನು ಅಗತ್ಯ ಸನ್ನಿವೇಶ ಬಳಸಿಕೊಳ್ಳುವುದಕ್ಕೆ ಸಂಬಂಧಿಸಿದಂತೆ ಭಾರತ ಮತ್ತು ಸಿಂಗಾಪುರದ ಮಧ್ಯೆ ಬುಧವಾರ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ. ಇದರಿಂದಾಗಿ ವಿವಾದಿತ ದಕ್ಷಿಣ ಚೀನಾ ಸಮುದ್ರದಲ್ಲಿ ಸಾಗುವ ಭಾರತೀಯ ನೌಕಾಪಡೆಯ ಹಡಗುಗಳು ಸಿಂಗಾಪುರದ ಚಂಗು ಬಂದರಿನಲ್ಲಿ ಇಂಧನ ಮರುಪೂರಣ ಮಾಡಿಕೊಳ್ಳಬಹುದಾಗಿದೆ. ಇದು ಆಗ್ನೇಯ ಏಷ್ಯಾದಲ್ಲಿ ಚೀನಾ ಪ್ರಾಬಲ್ಯವನ್ನು ಕುಗ್ಗಿಸುವ ನಿಟ್ಟಿನಲ್ಲಿ ಅತ್ಯಂತ ಮಹತ್ವದ್ದಾಗಿದೆ.
ಈ ಒಪ್ಪಂದದಿಂದ ಉಭಯ ದೇಶಗಳ ನೌಕಾಪಡೆ ನೇರವಾಗಿ ಸಂವಹನ ನಡೆಸಬಹುದಾಗಿದ್ದು, ಈ ಹಿಂದೆ ಭಾರತದ ಹಡಗುಗಳನ್ನು ಚಂಗು ನೌಕಾನೆಲೆಯಲ್ಲಿ ಲಂಗರು ಹಾಕಲು ಪರವಾನಗಿ ಪಡೆಯಬೇಕಿತ್ತು. ಇದಕ್ಕೆ ವಾರಗಳ ಕಾಲಾವಕಾಶವೇ ಬೇಕಾಗುತ್ತಿತ್ತು. ಕಳೆದ ಕೆಲವು ವರ್ಷಗಳಿಂದ ಚೀನಾ ಹಡಗುಗಳು ಪದೇ ಪದೇ ಹಿಂದು ಮಹಾಸಾಗರ ಪ್ರವೇಶಿಸುತ್ತಿರುವುದು ಭಾರತದ ಆತಂಕಕ್ಕೆ ಕಾರಣವಾಗಿದೆ. ಸಿಂಗಾಪುರದ ಚಂಗಿ ನೌಕಾನೆಲೆ ಅತ್ಯಾಧುನಿಕವಾಗಿದ್ದು, ಭಾರತಕ್ಕೆ ಅತ್ಯಂತ ಮಹತ್ವದ್ದಾಗಿದೆ.