ಗೋಗ್ರಾ- ಹಾಟ್ಸ್ಪ್ರಿಂಗ್ಸ್ನಿಂದ ಸೇನೆ ವಾಪಸ್
Team Udayavani, Sep 9, 2022, 6:58 AM IST
ಹೊಸದಿಲ್ಲಿ: ಪೂರ್ವ ಲಡಾಖ್ನ ಗೋಗ್ರಾ- ಹಾಟ್ಸ್ಪ್ರಿಂಗ್ಸ್ ಪ್ರದೇಶದಿಂದ ಭಾರತ- ಚೀನ ಹಿಂದೆ ಸರಿಯುವ ಪ್ರಕ್ರಿಯೆ ಆರಂಭಿಸಿವೆ. ಈ ಮೂಲಕ ಗಸ್ತು ಕೇಂದ್ರ 15ರಲ್ಲಿ 2 ವರ್ಷಗಳಿಂದಲೂ ಮುಂದುವರಿದಿದ್ದ ಸಂಘರ್ಷಕ್ಕೆ ಅಂತ್ಯ ಹಾಡಿದಂತಾಗಿದೆ.
ಜುಲೈಯಲ್ಲಿ ಎರಡೂ ದೇಶಗಳ ಮಧ್ಯೆ ನಡೆದಿದ್ದ 16ನೇ ಸುತ್ತಿನ ಮಾತುಕತೆಯ ಫಲವೆಂಬಂತೆ ಸೆ. 8ರಿಂದ ಉಭಯ ಪಡೆಗಳೂ ಗೋಗ್ರಾ-ಹಾಟ್ಸ್ಪ್ರಿಂಗ್ಸ್ನಿಂದ ಯೋಜನಾಬದ್ಧವಾಗಿ ವಾಪಸಾಗಲು ಆರಂಭಿಸಿವೆ ಎಂದು ಉಭಯ ಸೇನೆಗಳು ಗುರುವಾರ ಬಿಡುಗಡೆ ಮಾಡಿರುವ ಜಂಟಿ ಹೇಳಿಕೆಯಲ್ಲಿ ತಿಳಿಸಿವೆ.
ಉಜ್ಬೇಕಿಸ್ಥಾನದಲ್ಲಿ ಶಾಂಘೈ ಸಹಕಾರ ಸಂಘ(ಎಸ್ಸಿಒ)ದ ಶೃಂಗಸಭೆಗೆ ಒಂದು ವಾರ ಬಾಕಿಯಿರುವಾಗ ಈ ಘೋಷಣೆ ಹೊರಬಿದ್ದಿದೆ. ಶೃಂಗದಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಚೀನ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಭಾಗಿಯಾಗುವರು. ಅಂದು ಉಭಯ ನಾಯಕರ ನಡುವೆ ದ್ವಿಪಕ್ಷೀಯ ಮಾತುಕತೆ ನಡೆಯುವ ಸಾಧ್ಯತೆಯೂ ಇದೆ. ಈ ಹಿಂದೆಯೇ ಲಡಾಖ್ನ ಗಾಲ್ವಾನ್ಪ್ರದೇಶ, ಪಾಂಗಾಂಗ್ ಸರೋವರ ಪ್ರದೇಶದಿಂದ ಎರಡೂ ಸೇನೆಗಳು ವಾಪಸಾಗಿವೆ. ಡೆಪ್ಸಾಂಗ್ ಪ್ರದೇಶದ ಉತ್ತರ ಭಾಗದಿಂದ ಮಾತ್ರ ಚೀನ ಸೇನೆ ಇನ್ನೂ ಹಿಂದೆಸರಿದಿಲ್ಲ.