ಚೀನಿ ಸೇನೆಗೆ ಆಘಾತ ನೀಡುತ್ತೆ ಘಾತಕ್ ಪಡೆ
Team Udayavani, Jun 30, 2020, 6:27 AM IST
ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used
ವಾಸ್ತವ ಗಡಿ ನಿಯಂತ್ರಣ ರೇಖೆಯಲ್ಲಿ (ಎಲ್ಎಸಿ) ಭಾರತ ಹಾಗೂ ಚೀನ ನಡುವಿನ ಬಿಗುವಿನ ವಾತಾವರಣ ದಿನೇ ದಿನೆ ಬಿಗಡಾಯಿಸುತ್ತಾ ಸಾಗಿರುವ ನಡುವೆಯೇ ಎಲ್ಎಸಿಯಲ್ಲಿ ನಿಯೋಜನೆಗೊಂಡಿರುವ ತನ್ನ ಸೈನಿಕರಿಗೆ ಚೀನ, ಮಾರ್ಷಲ್ ಆರ್ಟ್ಸ್ ತರಬೇತಿ ನೀಡುತ್ತಿದೆ.
ಆದರೆ, ಭಾರತವೇನೂ ಕೈಕಟ್ಟಿ ಕುಳಿತಿಲ್ಲ. ಚೀನ ಯಾವುದೇ ರೀತಿಯ ದಾಳಿ ನಡೆಸಿದರೂ ಅದಕ್ಕೆ ತಕ್ಕ ಪ್ರತ್ಯುತ್ತರ ನೀಡಲು ಸಮರ್ಥವಾಗಿರುವ ಯೋಧರ ಪಡೆಗಳು ಈಗಾಗಲೆ ಭಾರತದ ಪಾಳಯದಲ್ಲಿ ಸರ್ವ ಸನ್ನದ್ಧವಾಗಿ ನಿಂತಿವೆ.
ಅಂತಹವುಗಳಲ್ಲಿ ಒಂದು ‘ಘಾತಕ್’ ಕಮಾಂಡೊ ಪಡೆ. ಘಾತಕ್ ಅದೆಷ್ಟು ಸಮರ್ಥ ಕಮಾಂಡೊಗಳನ್ನು ಒಳಗೊಂಡ ಪಡೆ ಎಂದರೆ, ಚೀನದ ಮಾರ್ಷಲ್ ಆರ್ಟ್ಸ್ ತರಬೇತಿ ಪಡೆದ ಸೈನಿಕರು ಈ ಕಮಾಂಡೊಗಳ ಮುಂದೆ ಮಂಕಾಗುತ್ತಾರೆ.
ಏನಿದು ಘಾತಕ್ ಪಡೆ?
– ಕಾಲಾಳು ಪಡೆಯಲ್ಲೇ ದೈಹಿಕವಾಗಿ ಅತ್ಯಂತ ಸದೃಢರಾಗಿರುವ ಯೋಧರ ತಂಡ ಇದು.
– ಪ್ರತಿಯೊಬ್ಬ ಘಾತಕ್ ಕಮಾಂಡೊಗೆ 45 ದಿನಗಳ ಕಠಿನ ತರಬೇತಿ.
– ಮಾರ್ಷಲ್ ಆರ್ಟ್ಸ್ ತರಬೇತಿ ಪಡೆದಿರುವ ಕಮಾಂಡೊಗಳು, ಮಲ್ಲ ಯುದ್ಧದಲ್ಲೂ ಪ್ರವೀಣರು.
– 35 ಕೆ.ಜಿ ಭಾರ ಹೊತ್ತು 40 ಕಿ.ಮೀ ದೂರದವರೆಗೆ ಓಡುವ ಸಾಮರ್ಥ್ಯ ಕಮಾಂಡೊಗಳಿಗಿರುತ್ತದೆ.
– ವಿಶೇಷ ಕಾರ್ಯಾಚರಣೆ, ಯುದ್ಧದ ವೇಳೆ ಭಾರೀ ತೂಕದ ಶಸ್ತ್ರಾಸ್ತ್ರ ಹೊತ್ತು ಮುನ್ನೆಲೆಯಲ್ಲಿ ನಿಂತು ಹೋರಾಡುವುದು ಇದರ ಕೆಲಸ.
– ಯಾರ ಬೆಂಬಲವೂ ಇಲ್ಲದೆ ತಾವೊಬ್ಬರೇ ಶತ್ರುವಿನ ಮೇಲೆ ದಾಳಿ ಮಾಡುವುದು ಇವರ ವೈಶಿಷ್ಟ್ಯ.
– ಹೆಲಿಬಾರ್ನ್ ದಾಳಿ, ಪರ್ವತ ಸಂಗ್ರಾಮ, ರಾಕ್ ಕ್ಲೈಂಬಿಂಗ್, ಡೆಮಾಲಿಷನ್, ಮುಖಾಮುಖಿ ಕಾದಾಟ ಮತ್ತು ಆಡಳಿತ, ವ್ಯವಸ್ಥಾಪನೆ ಕುರಿತಂತೆಯೂ ತರಬೇತಿ ಪಡೆದಿರುತ್ತಾರೆ.
ಎಲ್ಲಿದೆ ಈ ಘಾತಕ್ ಪಡೆ?
ಚೀನಿ ಸೈನಿಕರಿಗೆ ಮಾರ್ಷಲ್ ಆರ್ಟ್ಸ್ ತರಬೇತಿ ನೀಡಿ ಲಡಾಖ್ ಬಳಿಯ ಗಡಿಯಲ್ಲಿ ನಿಯೋಜಿಸಲಾಗಿದೆ. ಸರಿಯಾಗಿ ಅವರಿಗೆ ಎದುರಾಗಿ ಭಾರತದ ಭಾಗದ ಗಡಿಯಲ್ಲಿ ಘಾತಕ್ ಕಮಾಂಡೊಗಳು ನಿಂತಿದ್ದಾರೆ.
ನಮ್ಮ ಬೆಳಗಾವಿಯಲ್ಲಿ ತರಬೇತಿ
ವಿಶೇಷವೇನೆಂದರೆ ಘಾತಕ್ ಕಮಾಂಡೊಗಳಿಗೆ ತರಬೇತಿ ನೀಡುತ್ತಿರುವುದು ಬೆಳಗಾವಿಯಲ್ಲಿ. ಸಾಮಾನ್ಯವಾಗಿ ಈ ಪಡೆಯಲ್ಲಿ 20 ಕಮಾಂಡೊಗಳಿರುತ್ತಾರೆ. ಆ ಪೈಕಿ, ಒಬ್ಬ ಕಮಾಂಡಿಂಗ್ ಕ್ಯಾಪ್ಟನ್, ಇಬ್ಬರು ಅನಿಯೋಜಿತ ಅಧಿಕಾರಿಗಳು, ಮಾರ್ಕ್ಸ್ ಮ್ಯಾನ್ ಮತ್ತು ಸ್ಪಾಟರ್ ಜೋಡಿ, ಲೈಟ್ ಮೆಷೀನ್ ಗನ್ನರ್ಗಳು ಮತ್ತು ರೇಡಿಯೋ ಆಪರೇಟರ್ಗಳು ಈ ತಂಡದಲ್ಲಿರುತ್ತಾರೆ. ಉಳಿದವರು ದಾಳಿ ಪಡೆಯ ರೀತಿ ಕಾರ್ಯನಿರ್ವಹಿಸುತ್ತಾರೆ.