ISRO;ಉಪಗ್ರಹ ಕಕ್ಷೆ ಎತ್ತರಕ್ಕೆ ದೇಸಿ ಎಲೆಕ್ಟ್ರಿಕ್‌ ವ್ಯವಸ್ಥೆ: ಅನುಕೂಲತೆಯೇನು?

Team Udayavani, Mar 10, 2024, 6:19 AM IST

ಹೊಸದಿಲ್ಲಿ: ಇಸ್ರೋ ಮತ್ತೊಂದು ಮೈಲುಗಲ್ಲು ಸ್ಥಾಪಿಸಲು ಸಜ್ಜಾಗಿದೆ. ವಿದ್ಯುತ್‌ಚಾಲಿತ ನೋದನ ವ್ಯವಸ್ಥೆ (ಎಲೆಕ್ಟ್ರಿಕ್‌ ಪ್ರೊಪಲ್ಶನ್‌ ಸಿಸ್ಟಂ)ಯನ್ನು ಇಸ್ರೋ ದೇಶೀಯವಾಗಿ ಅಭಿವೃದ್ಧಿಪಡಿ­ಸಿದ್ದು, ಪ್ರಸಕ್ತ ವರ್ಷದ ದ್ವಿತೀಯಾ­ರ್ಧದಲ್ಲಿ ಉಡಾವಣೆಯಾಗಲಿರುವ ಟಿಡಿಎಸ್‌-01 ಉಪಗ್ರಹದಲ್ಲಿ ಇದನ್ನು ದೇಶಕ್ಕೆ ಪರಿಚಯಿಸಲಿದೆ.
ಉಪಗ್ರಹಗಳ ಕಕ್ಷೆ ಎತ್ತರಿಸುವ ಪ್ರಕ್ರಿಯೆಗಳಿಗೆ ಈ ವಿದ್ಯುತ್‌ಚಾಲಿತ ಪ್ರೊಪಲ್ಶನ್‌ ವ್ಯವಸ್ಥೆ ಬಳಸಲಾಗುತ್ತದೆ. ಇದು 300 ಮಿಲಿ ನ್ಯೂಟನ್‌ ಥÅಸ್ಟರ್‌ ಅನ್ನು ಹೊಂದಿರುತ್ತದೆ ಎಂದು ಇಸ್ರೋ ತಿಳಿಸಿದೆ.

ಪ್ರಸ್ತುತ ಇಸ್ರೋ ಉಪಗ್ರಹಗಳನ್ನು ಕಕ್ಷೆಗೆ ಎತ್ತರಿಸುವಂಥ ಪ್ರಕ್ರಿಯೆ ನಡೆಸಲು ರಾಸಾಯನಿಕ ನೋದನ ವ್ಯವಸ್ಥೆಯನ್ನು ಬಳಸುತ್ತಿದೆ. ಇನ್ನು ಮುಂದೆ, ಇಂಥ ಪ್ರಕ್ರಿಯೆಗಳಿಗೆ ಸಾಂಪ್ರದಾಯಿಕ ವ್ಯವಸ್ಥೆಯ ಬದಲು ವಿದ್ಯುತ್‌ಚಾಲಿತ ವ್ಯವಸ್ಥೆ ಬಳಸುವುದು ಇಸ್ರೋ ಉದ್ದೇಶ. ಇದು ಸಾಧ್ಯವಾದರೆ, ಭವಿಷ್ಯದಲ್ಲಿ ರಾಸಾಯನಿಕ ಇಂಧನಗಳ ಮೇಲಿನ ಇಸ್ರೋ ಅವಲಂಬನೆ ತಗ್ಗಲಿದೆ.

ರಾಸಾ­ಯನಿಕ ಪ್ರೊಪೆಲ್ಲೆಂಟ್‌ಗಳಿಗೆ ಹೋಲಿಸಿದರೆ ಇ-ಪ್ರೊಪಲ್ಶನ್‌ ವ್ಯವಸ್ಥೆಯು ಹೆಚ್ಚು ಕಾರ್ಯದಕ್ಷತೆ ಹೊಂದಿದೆ.

“ಅಗ್ನಿಬಾನ್‌ ರಾಕೆಟ್‌’ ನ್ನು ಉಡಾವಣೆ ಮಾಡಲು ಸಕಲ ಸಿದ್ಧತೆ
ಐಐಟಿ ಮದ್ರಾಸ್‌ನ ಸಹಕಾರ­ದೊಂದಿಗೆ ಚೆನ್ನೈಯ ಖಾಸಗಿ ಸಂಸ್ಥೆ “ಅಗ್ನಿಕುಲ ಕಾಸ್ಮೋಸ್‌’ ಸಿದ್ಧಪಡಿಸಿರುವ “ಅಗ್ನಿಬಾನ್‌ ರಾಕೆಟ್‌’ ನ್ನು ಉಡಾವಣೆ ಮಾಡಲು ಸಕಲ ಸಿದ್ಧತೆ ನಡೆಸಲಾಗುತ್ತಿದೆ. ಇದು ಇಸ್ರೋ ಉಡಾ ವಣೆ ಮಾಡುತ್ತಿರುವ 2ನೇ ಖಾಸಗಿ ರಾಕೆಟ್‌ ಆಗಿದೆ. ಇದೊಂದು ತ್ರೀಡಿ ಪ್ರಿಟಿಂಗ್‌ ರಾಕೆಟ್‌ ಆಗಿದ್ದು, ಮಾ.22ರಿಂದ 28ರ ಅವಧಿಯಲ್ಲಿ ಉಡಾ­ವಣೆಯಾಗುವ ಸಾಧ್ಯತೆ ಇದೆ ಎಂದು ಕಂಪೆನಿ ಹೇಳಿದೆ. ಶ್ರೀಹರಿಕೋಟಾದಲ್ಲಿ ನಿರ್ಮಾಣ ಮಾಡಲಾಗಿರುವ ಖಾಸಗಿ ಲಾಂಚ್‌ಪ್ಯಾಡ್‌ ಮೂಲಕ ಈ ಉಡಾವಣೆ ನಡೆಯಲಿದೆ. ಇದು 2 ವಿಭಾಗಗಳನ್ನು ಹೊಂದಿರುವ ರಾಕೆಟ್‌ ಆಗಿದ್ದು, 100 ಕೆ.ಜಿ. ತೂಕದ ಪೇಲೋಡನ್ನು 700 ಕಿ.ಮೀ. ದೂರಕ್ಕೆ ಹೊತ್ತೂಯ್ಯಬಲ್ಲದು. 2022ರ ನ.19ರಂದು ಹೈದರಾಬಾದ್‌ ಮೂಲದ ಸ್ಕೈರೂಟ್‌ ಸಂಸ್ಥೆ ಮೊದಲ ಬಾರಿಗೆ ಖಾಸಗಿ ರಾಕೆಟ್‌ನ್ನು ಉಡಾವಣೆ ಮಾಡಿತ್ತು.