ಮಹಾರಾಷ್ಟ್ರದ ನಾಗಪುರದಲ್ಲಿ ದುರಂತ ಅಂತ್ಯ: ಜೀವ ತೆಗೆದ ವಯಾಗ್ರ, ಮದ್ಯ!
ವ್ಯಕ್ತಿ ಗೆಳತಿಯ ಜತೆಗೆ ಹೋಟೆಲ್ನಲ್ಲಿ ಇದ್ದಾಗ ದುರಂತ
Team Udayavani, Mar 8, 2023, 7:15 AM IST
ನಾಗಪುರ: ಗೆಳತಿಯ ಜತೆಗೆ ಹೊಟೇಲ್ನಲ್ಲಿ ಇರುವ ಸಂದರ್ಭದಲ್ಲಿ ವ್ಯಕ್ತಿ ಮದ್ಯ ಸೇವನೆ ವೇಳೆ 2 ವಯಾಗ್ರ ಮಾತ್ರೆಗಳನ್ನು ಸೇವಿಸಿ ಮೃತಪಟ್ಟಿದ್ದಾನೆ. ಆತನ ವಿವರಗಳು ಸದ್ಯಕ್ಕೆ ಖಚಿತಪಟ್ಟಿಲ್ಲ. ಈ ಬಗ್ಗೆ “ಫೊರೆನ್ಸಿಕ್ ಆ್ಯಂಡ್ ಲೀಗಲ್ ಮೆಡಿಸಿನ್’ ಎಂಬ ನಿಯತ ಕಾಲಿಕೆಯಲ್ಲಿ ಪ್ರಕಟವಾಗಿದೆ. ಹೊಟೇಲೊಂ ದರಲ್ಲಿ ಗೆಳತಿಯೊಂದಿಗೆ ತಂಗಿದ್ದ ವ್ಯಕ್ತಿರಾತ್ರಿ ಮದ್ಯ ಸೇವಿಸುವಾಗ 50 ಎಂ.ಜಿ.ಯ ಎರಡು ಸಿಲೆನಾಫಿಲ್ ಮಾತ್ರೆ ಸೇವಿಸಿದ್ದಾನೆ.
ಅದನ್ನು ವಯಾಗ್ರ ಹೆಸರಿನಿಂದಲೇ ಮಾರಲಾಗುತ್ತಿದೆ. ಮರುದಿನ ಬೆಳಗ್ಗೆ ವ್ಯಕ್ತಿ ವಿಪರೀತ ಸುಸ್ತಾಗಿದ್ದ, ಅನಂತರ ವಾಂತಿ ಮಾಡಿಕೊಳ್ಳಲಾರಂಭಿಸಿದ. ಗೆಳತಿ ಆಸ್ಪತ್ರೆಗೆ ತೆರಳಲು ಸೂಚಿಸಿದರೂ ಆತ ತನಗೆ ಹಿಂದೆಯೂ ಹೀಗಾಗಿದೆ ಎಂದು ಹೇಳಿ ನಿರಾಕರಿಸಿದ! ಕೆಲವು ಹೊತ್ತಿನಲ್ಲೇ ಪರಿಸ್ಥಿತಿ ಬಿಗಡಾಯಿಸಿತು. ಅಂತಿಮವಾಗಿ ಆತನನ್ನು ಆಸ್ಪತ್ರೆಗೆ ಒಯ್ದರೂ ದಾರಿಯಲ್ಲೇ ಆತ ಮೃತಪಟ್ಟಿದ್ದ. ಆ ವ್ಯಕ್ತಿಗೆ ಗಂಭೀರ ಅನಾರೋಗ್ಯಗಳು, ಶಸ್ತ್ರಚಿಕಿತ್ಸೆಯಾದ ಉದಾಹರಣೆಗಳೇನಿರಲಿಲ್ಲ. ಹಾಗಿದ್ದರೂ ಹೀಗಾಗಿದ್ದೇಕೆ ಎಂದು ವೈದ್ಯರು ಈಗ ತಲೆಕೆಡಿಸಿಕೊಂಡಿದ್ದಾರೆ.
ಮರಣೋತ್ತರ ಪರೀಕ್ಷೆಯಲ್ಲಿ ಆತನ ಮೆದುಳಿನಲ್ಲಿ ರಕ್ತಸ್ರಾವವಾಗಿದ್ದು ಪತ್ತೆಯಾಗಿದೆ. ಹಾಗೆಯೇ ಹೆಪ್ಪುಗಟ್ಟಿದ (ಕ್ಲಾಟ್) ರಕ್ತವೂ ಕಂಡು ಬಂದಿರುವ ಅಂಶದ ಬಗ್ಗೆ ಮರಣೋತ್ತರ ಪರೀಕ್ಷೆಯಲ್ಲಿ ಉಲ್ಲೇಖಿಸಲಾಗಿದೆ. ಮದ್ಯದೊಂದಿಗೆ ವಯಾಗ್ರ ಸೇವಿಸಿದ್ದು, ಜತೆಗೆ ಬಿಪಿಯೂ ಇದ್ದಿದ್ದರಿಂದ ಹೀಗಾಗಿದೆ ಎಂದು ಅಭಿಪ್ರಾಯಪಡಲಾಗಿದೆ.