Panaji: ಗೋಮಾಂತಕಿಯರಿಗೆ ಎರಡು ಪಾಸ್ ಪೋರ್ಟ್ ಯಾಕೆ ಬೇಕು ?

Team Udayavani, Jan 3, 2024, 3:28 PM IST

ಪಣಜಿ: ಶಾಸಕ ಚರ್ಚಿಲ್ ಅಲೆಮಾವೊ ಗೋವಾ ಸ್ವಾತಂತ್ರ್ಯ ದಿನದಂದು ಪೋರ್ಚುಗೀಸರನ್ನು ಹಾಡಿ ಹೊಗಳಿದ್ದರು. ನಾನು ಪೋರ್ಚುಗೀಸರಿಗೆ ನಮಸ್ಕರಿಸುತ್ತೇನೆ ಎಂದು ಅಲೆಮಾವ್ ಹೇಳಿದ್ದರು. ಅದಾದ ನಂತರ ಇದೀಗ ಮತ್ತೊಮ್ಮೆ ಅಲೆಮಾವ್ ನ ಪೋರ್ಚುಗೀಸ್ ಪ್ರೇಮ ಕಂಡು ಬಂದಿದ್ದು, ಗೋಮಾಂತಕಿಯರು ಎರಡು ಪಾಸ್ ಪೋರ್ಟ್ ಯಾಕೆ ಬೇಕು ಎಂಬುದಕ್ಕೆ ಉತ್ತರಿಸಿದ್ದಾರೆ.

ಪೋರ್ಚುಗೀಸರು 1962 ರ ಮೊದಲು ಜನಿಸಿದ ಗೋಮಾಂತಕಿಗಳಿಗೆ ಪೋರ್ಚುಗೀಸ್ ಪೌರತ್ವವನ್ನು ಪಡೆಯಲು ಬಾಗಿಲು ತೆರೆದರು. ಇದರಿಂದ ಗೋವಾದ ಸಾಸಷ್ಠಿ ತಾಲೂಕಿನಲ್ಲಿ ಬಡತನ ಸಾಕಷ್ಟು ಪ್ರಮಾಣದಲ್ಲಿ ಕಡಿಮೆಯಾಗಿದೆ ಎಂದು ಅಲೆಮಾಂವ್ ಡಿ.19ರಂದು ವಿಚಿತ್ರ ಹೇಳಿಕೆ ನೀಡಿದ್ದರು.

ಇದೀಗ ಮಡಗಾಂವ್‌ನಲ್ಲಿ ಸುದ್ಧಿಗಾರರೊಂದಿಗೆ ಮಾತನಾಡಿದ ಶಾಸಕ ಚರ್ಚಿಲ್ ಅಲೆಮಾಂವ, ನಾನು ಪೋರ್ಚುಗೀಸರಿಗೆ ನಮಸ್ಕರಿಸುತ್ತೇನೆ. ಗೋವಾದ ಶೇಕಡ 80 ರಷ್ಟು ಅಭಿವೃದ್ಧಿ ಅವರಿಂದಲೇ. ಗೋಮಾಂತಕಿಯರು ಅವರಿಂದಲೇ ವಿದೇಶದಲ್ಲಿ ಉದ್ಯೋಗಗಳನ್ನು ಪಡೆಯಲು ಸಾಧ್ಯವಾಯಿತು. ಜನರು ಪೋರ್ಚುಗೀಸ್ ಪಾಸ್‍ಪೋರ್ಟ್‍ನೊಂದಿಗೆ ಕೆಲಸ ಮಾಡಲು ಹೋಗುತ್ತಾರೆ ಮತ್ತು ಮತ ಚಲಾಯಿಸಲು ಭಾರತಕ್ಕೆ ಹಿಂತಿರುಗುತ್ತಾರೆ. ಆದ್ದರಿಂದ ಗೋಮಾಂತಕರು ಎರಡೂ ಪಾಸ್ ಪೋರ್ಟ್ ಹಿಡಿದಿಡಲು ಸ್ವತಂತ್ರರಾಗಿರಬೇಕು ಎಂದು  ಅಲೆಮಾವ್ ಹೇಳಿದರು.

ಏತನ್ಮಧ್ಯೆ, ಹೊಸದಾಗಿ ಸಚಿವರಾಗಿ ನೇಮಕಗೊಂಡ ಅಲೆಕ್ಸ್ ಸಿಕ್ವೇರಾ ಅವರ ಪಾಸ್‍ಪೋರ್ಟ್ ಸಮಸ್ಯೆ ಸುದ್ದಿಯಲ್ಲಿದೆ. ಸಿಕ್ವೇರಾ ಅವರ ಪಾಸ್‍ಪೋರ್ಟ್ ಕೂಡ ಪೋರ್ಚುಗೀಸ್ ಆಗಿದೆ. ಅವರ ಭಾರತೀಯ ಪಾಸ್‍ಪೋರ್ಟ್ ಅನ್ನು ರದ್ದುಗೊಳಿಸಬೇಕು ಎಂದು ಮಾಜಿ ಶಾಸಕ ಮಿಕಿ ಪಚೆಕೊ ಒತ್ತಾಯಿಸಿದ್ದಾರೆ.