ಒಲಿಂಪಿಕ್ಸ್ನಲ್ಲಿ ಗುರುವಾರ 24 ಕೋವಿಡ್ ಪ್ರಕರಣ
Team Udayavani, Jul 29, 2021, 10:15 PM IST
ಟೋಕ್ಯೊ: ಇಲ್ಲಿ ನಡೆಯುತ್ತಿರುವ ಒಲಿಂಪಿಕ್ಸ್ನಲ್ಲಿ ಗುರುವಾರ 24 ಹೊಸ ಕೋವಿಡ್ ಪ್ರಕರಣಗಳು ಕಂಡುಬಂದಿವೆ. ಇದರಲ್ಲಿ ಮೂವರು ಅಥ್ಲೀಟ್ಗಳು ಸೇರಿದ್ದಾರೆ.
ಇಲ್ಲಿಯವರೆಗಿನ ದಾಖಲೆಗಳನ್ನು ಗಮನಿಸಿದರೆ, ಈ ಬಾರಿಯ ಒಲಿಂಪಿಕ್ಸ್ನಲ್ಲಿ ದಿನವೊಂದರಲ್ಲಿ ಸಂಭವಿಸಿದ ಗರಿಷ್ಠ ಪ್ರಕರಣಗಳ ಸಂಖ್ಯೆಯಿದು. ಇದರಿಂದ ಒಲಿಂಪಿಕ್ಸ್ನಲ್ಲಿ ಸೋಂಕಿತರ ಸಂಖ್ಯೆ ಒಟ್ಟಾರೆ 193ಕ್ಕೆ ಮುಟ್ಟಿದೆ. ಗುರುವಾರದ ಹೊಸ ಸೋಂಕಿತರ ಪೈಕಿ ಕೂಟಕ್ಕೆ ಸಂಬಂಧಿಸಿದ ಸಿಬ್ಬಂದಿ ಸಂಖ್ಯೆ 6, ಇನ್ನು ಇತರೆ 15 ಮಂದಿ ಗುತ್ತಿಗೆದಾರರಾಗಿದ್ದಾರೆ.
ಇದೇ ವೇಳೆ ಟೋಕ್ಯೊ ನಗರದಲ್ಲೂ ಕೊರೊನಾ ಹೆಚ್ಚಿದೆ. ಗುರುವಾರ ಒಂದೇ ದಿನ ನಗರದಲ್ಲಿ 3,865 ಮಂದಿಗೆ ಸೋಂಕು ತಗುಲಿದೆ. ಅದರಲ್ಲಿ 81 ಮಂದಿಯ ಸ್ಥಿತಿ ತೀವ್ರವಾಗಿದೆ. ಇದು ದಿನವೊಂದರಲ್ಲಿ ಟೋಕ್ಯೊ ಎದುರಿಸಿದ ಗರಿಷ್ಠ ಸೋಂಕುಗಳ ಪ್ರಮಾಣವಾಗಿದೆ. ಆದರೆ ಇದಕ್ಕೆ ಒಲಿಂಪಿಕ್ಸ್ ಕಾರಣವಲ್ಲ ಎಂದು ಅಂತಾರಾಷ್ಟ್ರೀಯ ಒಲಿಂಪಿಕ್ ಸಮಿತಿಯ ವಕ್ತಾರ ಮಾರ್ಕ್ ಆ್ಯಡಮ್ಸ್ ಹೇಳಿದ್ದಾರೆ.