ವಿರಾಟ್‌ ಕೊಹ್ಲಿ ಇನ್ನೊಂದು ದಾಖಲೆ

Team Udayavani, Jul 18, 2018, 6:00 AM IST

ಹೆಡಿಂಗ್ಲೆ: ಭಾರತ ತಂಡದ ನಾಯಕ ವಿರಾಟ್‌ ಕೊಹ್ಲಿ ಅವರ ದಾಖಲೆ ಮುರಿಯುವ ಕಾಯಕ ಮುಂದುವರಿಯುತ್ತಿದೆ. ಸದ್ಯ ಸಾಗುತ್ತಿರುವ ಇಂಗ್ಲೆಂಡ್‌ ಪ್ರವಾಸದ ವೇಳೆ ಅವರು ಈಗಾಗಲೇ ಎರಡು ಅಪರೂಪದ ದಾಖಲೆ ನಿರ್ಮಿಸಿದ್ದಾರೆ. ಹೆಡಿಂಗ್ಲೆಯಲ್ಲಿ ಮಂಗಳವಾರ ನಡೆದ ಮೂರನೇ ಪಂದ್ಯದಲ್ಲಿ ಇನ್ನೊಂದು ದಾಖಲೆ ಮಾಡಿ ಸಂಭ್ರಮಿಸಿದ್ದಾರೆ. ನಾಯಕನಾಗಿ ಅತೀ ವೇಗವಾಗಿ 3 ಸಾವಿರ ರನ್‌ ಪೂರ್ತಿಗೊಳಿಸಿದ ಆಟಗಾರರಾಗಿ ಮೂಡಿಬಂದಿದ್ದಾರೆ.

ಕೊಹ್ಲಿ ಅವರು ಕೇವಲ 49 ಇನ್ನಿಂಗ್ಸ್‌ಗಳಲ್ಲಿ ಅತೀ ವೇಗದ 3 ಸಾವಿರ ರನ್‌ ಪೂರ್ತಿಗೊಳಿಸಿದ ಸಾಧನೆ ಮಾಡಿದರು. ಈ ಸಾಧನೆಯಲ್ಲಿ ದ್ವಿತೀಯ ಸ್ಥಾನದಲ್ಲಿರುವ ಎಬಿ ಡಿ’ವಿಲಿಯರ್ ಅವರಿಗಿಂತ 11 ಇನ್ನಿಂಗ್ಸ್‌ ಮುಂಚಿತವಾಗಿ ಕೊಹ್ಲಿ 3 ಸಾವಿರ ರನ್‌ ತಲುಪಿದ್ದರು. ಡಿ’ವಿಲಿಯರ್ 60, ಎಂಎಸ್‌ ಧೋನಿ 70, ಸೌರವ್‌ ಗಂಗೂಲಿ 74, ಗ್ರೇಮ್‌ ಸ್ಮಿತ್‌ ಮತ್ತು ಮಿಸ್ಬಾ ಉಲ್‌ ಹಕ್‌ ತಲಾ 83 ಹಾಗೂ ಸನತ್‌ ಜಯಸೂರ್ಯ ಮತ್ತು ರಿಕಿ ಪಾಂಟಿಂಗ್‌ ತಲಾ 84 ಇನ್ನಿಂಗ್ಸ್‌ ಆಡಿ 3 ಸಾವಿರ ರನ್‌ ತಲುಪಿದ್ದರು. 3ನೇ ಏಕದಿನ ಪಂದ್ಯದ 10ನೇ ಓವರಿನಲ್ಲಿ ಡೇವಿಡ್‌ ವಿಲ್ಲಿ ಅವರ ಎಸೆತದಲ್ಲಿ ಒಂಟಿ ರನ್‌ ತೆಗೆಯುವ ಮೂಲಕ ಕೊಹ್ಲಿ ಈ ಸಾಧನೆ ಮಾಡಿದರು. 

ಟ್ವೆಂಟಿ20 ಸರಣಿ ವೇಳೆ ಕೊಹ್ಲಿ ಅವರು ಟ್ವೆಂಟಿ20ಯಲ್ಲಿ ಅತೀ ವೇಗವಾಗಿ 2 ಸಾವಿರ ರನ್‌ ಪೂರ್ತಿಗೊಳಿಸಿದ (56 ಇನ್ನಿಂಗ್ಸ್‌) ಸಾಧನೆ ಮಾಡಿದ ಭಾರತದ ಮೊದಲ ಆಟಗಾರ ಎಂದೆನಿಸಿಕೊಂಡಿದ್ದರು. ಈ ಅಪರೂಪದ ಸಾಧನೆಯನ್ನು ಕೇವಲ ಮೂವರು ಮಾಡಿದ್ದಾರೆ. ಅಗ್ರಸ್ಥಾನದಲ್ಲಿರುವ ನ್ಯೂಜಿಲ್ಯಾಂಡಿನ ಮಾರ್ಟಿನ್‌ ಗಪ್ಟಿಲ್‌ 73 ಇನ್ನಿಂಗ್ಸ್‌ಗಳಿಂದ 2,271 ರನ್‌ ಗಳಿಸಿದ್ದರೆ ಬ್ರೆಂಡನ್‌ ವೆ‌ುಕಲಮ್‌ 71 ಇನ್ನಿಂಗ್ಸ್‌
ಗಳಿಂದ 2,140 ರನ್‌ ಗಳಿಸಿದ್ದಾರೆ.