ವಿಂಬಲ್ಡನ್ ಟೆನಿಸ್ 2022: ಸಿಮೋನಾ ಹಾಲೆಪ್, ಎಲೆನಾ ರಿಬಕಿನಾ ಸೆಮಿಫೈನಲ್ ಗೆ
Team Udayavani, Jul 7, 2022, 12:41 AM IST
ಲಂಡನ್: ಮಾಜಿ ಚಾಂಪಿಯನ್ ರುಮಾನಿಯಾದ ಸಿಮೋನಾ ಹಾಲೆಪ್ ಮತ್ತು ಕಝಾಕ್ಸ್ಥಾನದ ಎಲೆನಾ ರಿಬಕಿನಾ ಅವರು ವಿಂಬಲ್ಡನ್ ಟೆನಿಸ್ ಕೂಟದ ವನಿತೆಯರ ಸಿಂಗಲ್ಸ್ನಲ್ಲಿ ಸೆಮಿಫೈನಲ್ ತಲುಪಿದ್ದಾರೆ.
ಪ್ರಚಂಡ ಫಾರ್ಮ್ ನಲ್ಲಿರುವ ಹಾಲೆಪ್ ಬುಧವಾರ ನಡೆದ ಪಂದ್ಯದಲ್ಲಿ ಅಮೆರಿಕದ ಅಮಂಡಾ ಅನಿಸಿಮೋವಾ ಅವವರನ್ನು 6-2, 6-4 ಸೆಟ್ಗಳಿಂದ ಸುಲಭವಾಗಿ ಮಣಿಸಿ ಅಂತಿಮ ನಾಲ್ಕರ ಸುತ್ತಿಗೇರಿದರು. ಈ ವರ್ಷದ ವಿಂಬಲ್ಡನ್ನಲ್ಲಿ ಹಾಲೆಪ್ ಇನ್ನೂ ಯಾವುದೇ ಸೆಟ್ ಕಳೆದುಕೊಂಡಿಲ್ಲ.
2019ರ ಚಾಂಪಿಯನ್ ಆಗಿರುವ ಹಾಲೆಪ್ ಕೇವಲ 63 ನಿಮಿಷಗಳ ಹೋರಾಟದಲ್ಲಿ ಅನಿಸಿಮೋವಾ ಅವರನ್ನು ನೆಲಕ್ಕುರುಳಿಸಿದರಲ್ಲದೇ 3ನೇ ಬಾರಿ ಇಲ್ಲಿ ಸೆಮಿಫೈನಲ್ ತಲುಪಿದರು.
ದಿನದ ಇನ್ನೊಂದು ಪಂದ್ಯದಲ್ಲಿ ಎಲೆನಾ ರಿಬಕಿನಾ ಅವರು ಆಸ್ಟ್ರೇಲಿಯದ ಅಜ್ಲಾ ತೋಮ್ಜಾ ನೋವಿಕ್ ಅವರನ್ನು 4-6, 6-2, 6-3 ಸೆಟ್ಗಳಿಂದ ಕೆಡಹಿದರು. ಮೊದಲ ಸೆಟ್ ಸೊತರೂ ವಿಚಲಿತರಾಗದ ರಿಬಕಿನಾ ಮುಂದಿನೆರಡು ಸೆಟ್ ಗೆದ್ದು ಸೆಮಿಫೈನಲ್ ತಲುಪಿದರು. ಅವರು ಗ್ರ್ಯಾನ್ ಸ್ಲಾಮ್ ಕೂಟದ ಸೆಮಿಫೈನಲ್ ತಲುಪಿದ ಕಝಾಕ್ಸ್ಥಾನದ ಮೊದಲ ಆಟಗಾರ್ತಿ ಎಂದೆನಿಸಿಕೊಂಡರು.
ಜಬಿಯುರ್ ಸೆಮಿಗೇರಿದ
ಮೊದಲ ಅರಬ್ ಮಹಿಳೆ
ಟುನಿಶಿಯಾದ ಆನ್ಸ್ ಜಬಿಯುರ್ ಚೆಕ್ ಗಣರಾಜ್ಯದ ಮೇರಿ ಬೌಜ್ಕೋವಾ ರನ್ನು 3-6, 6-1, 6-1 ಸೆಟ್ಗಳಿಂದ ಸೋಲಿಸುವ ಮೂಲಕ ಗ್ರ್ಯಾನ್ಸ್ಲಾಮ್ ಟೆನಿಸ್ ಕೂಟವೊಂದರಲ್ಲಿ ಅರಬ್ ರಾಷ್ಟ್ರಗಳ ಮಹಿಳೆಯೊಬ್ಬರು ಮೊದಲ ಬಾರಿಗೆ ಸೆಮಿಫೈನಲಿಗೇರಿದ ಸಾಧನೆ ಮಾಡಿದ್ದಾರೆ.
ರಾಯಲ್ ಬಾಕ್ಸ್ನಲ್ಲಿ ನ್ಪೋರ್ಟಿಂಗ್ ರಾಯಲ್ಟಿ
ಖ್ಯಾತ ಫುಟ್ ಬಾಲ್ ಆಟಗಾರ ಡೇವಿಡ್ ಬೆಕ್ಹ್ಯಾಮ್ ಬುಧವಾರ ತನ್ನ ತಾಯಿ ಸಾಂಡ್ರಾ ಜತೆ ರಾಯಲ್ ಬಾಕ್ಸ್ನಲ್ಲಿ ಕುಳಿತುಕೊಂಡು ವಿಂಬಲ್ಡನ್ ಟೆನಿಸ್ ಕೂಟದ ಪಂದ್ಯವನ್ನು ವೀಕ್ಷಿಸಿದರು. ಈ ಕುರಿತು ಇನ್ಸ್ಟಾಗ್ರಾಮ್ನಲ್ಲಿ ಬೆಕ್ಹ್ಯಾಮ್ ಪಂದ್ಯ ವೀಕ್ಷಿಸುತ್ತಿರುವ ಅವರ ಚಿತ್ರವನ್ನು ಹಾಕಲಾಗಿತ್ತು ಮಾತ್ರವಲ್ಲದೇ “ಸ್ಪೋ ರ್ಟಿಗ್ ರಾಯಲ್ಟಿ ಇನ್ ದ ರಾಯಲ್ ಬಾಕ್ಸ್’ ಎಂದು ಬರೆಯಲಾಗಿತ್ತು.