ಸಾರ್ಕ್ ಸದಸ್ಯರ ವರ್ತನೆಯೇ ಒಗ್ಗಟ್ಟಿನ ಉತ್ತರ: ಪಾಕ್ ಗೆ ಭಾರತ ತಿರುಗೇಟು
Team Udayavani, Apr 11, 2020, 2:42 AM IST
ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used
ಹೊಸದಿಲ್ಲಿ: ಕೋವಿಡ್ ವೈರಸ್ ಸೋಂಕಿನ ವಿರುದ್ಧ ಸಾರ್ಕ್ನ ಪ್ರತಿಯೊಂದು ಸದಸ್ಯ ರಾಷ್ಟ್ರವೂ ಹೇಗೆ ಒಗ್ಗಟ್ಟಿನಿಂದ ಹೋರಾಡುತ್ತಿವೆ ಎಂಬುದನ್ನು ಆಯಾ ರಾಷ್ಟ್ರಗಳ ವರ್ತನೆಯೇ ತೋರಿಸುತ್ತದೆ ಎನ್ನುವ ಮೂಲಕ ಭಾರತ, ಪಾಕ್ಗೆ ಪರೋಕ್ಷವಾಗಿ ತಿರುಗೇಟು ನೀಡಿದೆ.
ಪ್ರಧಾನಿ ಮೋದಿ ಅವರ ಕರೆಯಂತೆ ಸಾರ್ಕ್ ಕೋವಿಡ್ ವೈರಸ್ ತುರ್ತು ನಿಧಿಗೆ 3 ಮಿಲಿಯನ್ ಡಾಲರ್ ನೀಡುವುದಾಗಿ ಗುರುವಾರ ಘೋಷಿಸಿ, ಸೋಂಕಿಗೆ ಸಂಬಂಧಿಸಿದಂತೆ ತೆಗೆದುಕೊಳ್ಳುವ ಯಾವುದೇ ಕ್ರಮಗಳು ಒಕ್ಕೂಟದ ಚೌಕಟ್ಟಿನೊಳಗೇ ಇರಬೇಕು ಎಂಬ ಬೇಡಿಕೆ ಇರಿಸಿತ್ತು.
ಈ ಕುರಿತು ಪ್ರತಿಕ್ರಿಯಿಸಿರುವ ಭಾರತ, ಬಾಂಗ್ಲಾದೇಶ, ಅಫ್ಘಾನಿಸ್ತಾನ, ಭೂತಾನ್, ಮಾಲ್ಡೀವ್ಸ್, ನೇಪಾಳ, ಶ್ರೀಲಂಕಾ ಸೇರಿ ಎಲ್ಲ ಸಾರ್ಕ್ ರಾಷ್ಟ್ರಗಳೂ ಆರಂಭದಲ್ಲೇ ತುರ್ತು ನಿಧಿಗೆ ತಮ್ಮ ಕೊಡುಗೆ ನೀಡಿವೆ. ಭಾರತ ಕೂಡ ಪ್ರಧಾನಿಯವರು ಹೇಳಿದ ಕೂಡಲೇ ಹಣ ಬಿಡುಗಡೆ ಮಾಡಿದೆ.
ಈ ನಿಟ್ಟಿನಲ್ಲಿ ಪಾಕಿಸ್ತಾನದ ವರ್ತನೆಯು ಸೋಂಕಿನ ವಿರುದ್ಧ ಅವರ ಹೋರಾಟದ ಗಂಭೀರತೆಯನ್ನು ತೋರುತ್ತದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ವಕ್ತಾರ ಅನುರಾಗ್ ಶ್ರೀವಾಸ್ತವ ಅಭಿಪ್ರಾಯ ಪಟ್ಟಿದ್ದಾರೆ.