ಮೃತರ ಧ್ವನಿಯನ್ನೂ ಅನುಕರಿಸಲಿದೆ ಅಲೆಕ್ಸಾ!

Team Udayavani, Jun 24, 2022, 6:50 AM IST

ವಾಷಿಂಗ್ಟನ್‌: ಡಿಜಿಟಲ್‌ ಧ್ವನಿ ಸಹಾಯಕ ತಂತ್ರಜ್ಞಾನದ ಮೂಲಕ ಜಗತ್ತಿಗೆ “ಅಲೆಕ್ಸಾ’ ಎಂಬ ಗೆಳತಿಯನ್ನು ಪರಿಚಯಿಸಿದ್ದ ಅಮೆಜಾನ್‌ ಈಗ ಮತ್ತೂಂದು ಹೊಸ ಪ್ರಯೋಗಕ್ಕೆ ಕೈಹಾಕಿದೆ.

ಇಹಲೋಕವನ್ನು ತ್ಯಜಿಸಿ ಹೋಗಿರುವ ಪ್ರೀತಿ ಪಾತ್ರರ ಧ್ವನಿಯನ್ನು ಮತ್ತೆ ಮತ್ತೆ ಆಲಿಸಬೇಕು ಎಂದು ಯಾರ ಮನಸ್ಸುಗಳು ತುಡಿಯುತ್ತಿರುತ್ತವೆಯೋ, ಅವರಿಗೆಂದೇ ಈ ಪ್ರಯೋಗ ನಡೆಸಲಾಗುತ್ತಿದೆ. ಸುಧಾರಿತ ತಂತ್ರಜ್ಞಾನದ ಮೂಲಕ ಅಲೆಕ್ಸಾ ಈಗ, ಯಾರದ್ದಾದರೂ ಧ್ವನಿಯ ಮಾದರಿಯನ್ನು ಕೇವಲ ಒಂದು ನಿಮಿಷ ಕಾಲ ಕೇಳಿಸಿಕೊಂಡರೆ ಸಾಕು, ಆ ಧ್ವನಿಯನ್ನೇ ಅನುಕರಣೆ ಮಾಡುವಂಥ ಸಾಮರ್ಥ್ಯವನ್ನು ಪಡೆದಿದೆ.

ಹೀಗಾಗಿ, ಮೃತ ವ್ಯಕ್ತಿಗಳ ಧ್ವನಿಯ ಮಾದರಿಯನ್ನು ಅಲೆಕ್ಸಾಗೆ ಕೇಳಿಸಿದರೆ, ಅಲೆಕ್ಸಾ ಅದೇ ಧ್ವನಿಯನ್ನು ಅನುಕರಣೆ ಮಾಡುತ್ತದೆ. ಇದರಿಂದಾಗಿ, ಅಗಲಿರುವಂಥ ನಿಮ್ಮ ಪ್ರೀತಿಪಾತ್ರರೇ ನಿಮ್ಮ ಮನೆಯಲ್ಲಿದ್ದುಕೊಂಡು ನಿಮ್ಮೊಂದಿಗೆ ಮಾತನಾಡುತ್ತಿದ್ದಾರೆ ಎಂದು ನಿಮಗೆ ಭಾಸವಾಗಲಿದೆ. ಈ ನಮ್ಮ ಪ್ರಯತ್ನವನ್ನು ಅನೇಕರು ಮೆಚ್ಚಿದ್ದಾರೆ ಎಂದು ಅಲೆಕ್ಸಾ ಕೃತಕ ಬುದ್ಧಿಮತ್ತೆ ವಿಭಾಗದ ಹಿರಿಯ ಉಪಾಧ್ಯಕ್ಷ ರೋಹಿತ್‌ ಪ್ರಸಾದ್‌ ಹೇಳಿದ್ದಾರೆ.