ನಕಲಿ ಟ್ವಿಟ್ಟರ್ ಖಾತೆ ಸೃಷ್ಟಿಸಿದ ಕುತೂಹಲ: ಪ್ರೇಮ್ ಟ್ವೀಟ್ ಗೆ ರಕ್ಷಿತಾ ಸ್ಪಷ್ಟನೆ

Team Udayavani, Jun 9, 2021, 3:34 PM IST

ಬೆಂಗಳೂರು: ನಿರ್ದೇಶಕ ಪ್ರೇಮ್‌ ಹೆಸರಲ್ಲಿ ಟ್ವೀಟರ್‌ ನಲ್ಲಿ ನಕಲಿ ಖಾತೆ ಸೃಷ್ಟಿಸಿ ಅನಾಮಿಕರು ಪೋಸ್ಟ್‌ ಹಾಕುವ ಮೂಲಕ ಗೊಂದಲಕ್ಕೆ ಕಾರಣರಾಗುತ್ತಿದ್ದಾರೆ. ಸೋಮವಾರ ಪ್ರೇಮ್‌ ಹೆಸ ರನ ಟ್ವೀಟರ್‌ ಖಾತೆಯಿಂದ ಬಂದ ಟ್ವೀಟ್‌ ವೊಂದು ಗೊಂದಲ ಹಾಗೂ ಅಭಿಮಾನಿಗಳ ಕುತೂಹಲಕ್ಕೆ ಕಾರಣವಾಯಿತು.

ಪ್ರೇಮ್‌ ತಮ್ಮ ಮುಂದಿನ ಚಿತ್ರದ ಘೋಷಣೆಯನ್ನು ಮಾಡಿದಂತಹ ಟ್ವೀಟ್‌ವೊಂದು ಸಿನಿಮಾ ಪ್ರಿಯರಲ್ಲಿ ಕುತೂಹಲ ಹೆಚ್ಚುವಂತೆ ಮಾಡಿದ್ದು ಸುಳ್ಳಲ್ಲ. “ಏಕ್‌ ಲವ್ಯ’ ನಂತರ ನನ್ನ ಮುಂದಿನ ನಿರ್ದೇಶನದ ಚಿತ್ರದ ದರ್ಶನ್‌ ಜೊತೆಗೆ. ಡಿ55 ಚಿತ್ರವನ್ನು ನಾನು ನಿರ್ದೇಶಿಸಲಿದ್ದು, ಶೀಘ್ರದಲ್ಲೇ ಟೈಟಲ್‌, ಫ‌ಸ್ಟ್‌ ಲುಕ್‌ ಅನೌನ್ಸ್‌ ಮಾಡುತ್ತೇನೆ’ ಎಂಬ ಟ್ವೀಟ್‌ವೊಂದು ಪ್ರೇಮ್‌ ತಮ್ಮ ಟ್ವೀಟರ್‌ ನಿಂದ ಮಾಡಿದಂತೆ ಹರಿದಾಡುತ್ತಿತ್ತು.

ಇದನ್ನೂ ಓದಿ: ಏನಿದು ಕ್ಲಬ್ ಹೌಸ್ ಆ್ಯಪ್: ಇದರ ಜನಪ್ರಿಯತೆಗೆ ಕಾರಣಗಳೇನು ?

ಈ ಬಗ್ಗೆ ಸ್ಪಷ್ಟನೆ ನೀಡಿದ ಪ್ರೇಮ್‌ ಪತ್ನಿ ರಕ್ಷಿತಾ ಪ್ರೇಮ್‌, “ಇದು ಪ್ರೇಮ್‌ ಅವರ ಅಕೌಂಟ್‌ ಅಲ್ಲ. ಆದರೆ, ಈ ರೀತಿ ಟ್ವೀಟ್‌ ಮಾಡಿದವರಿಗೆ ಒಳ್ಳೆಯದಾಗಲಿ. ದರ್ಶನ್‌ ಹಾಗೂ ಪ್ರೇಮ್‌ ಮತ್ತೆ ಒಟ್ಟಿಗೆ ಕೆಲಸ ಮಾಡುವಂತಾಗಲಿ. ನಾನು ಆ ನಿರೀಕ್ಷೆಯಲ್ಲೇ ಇದ್ದೇನೆ’ ಎಂದು ಟ್ವೀಟ್‌ ಮಾಡಿದ್ದಾರೆ. ಸದ್ಯ ನಿರ್ದೇಶಕ ಪ್ರೇಮ್‌ “ಏಕ್‌ ಲವ್ಯ’ ಚಿತ್ರ ನಿರ್ದೇಶಿಸುತ್ತಿದ್ದು, ರಕ್ಷಿತಾ ಈ ಚಿತ್ರದ ನಿರ್ಮಾಪಕಿ.