ಅರಗಿಸಿಕೊಳ್ಳಲಾಗದ ದುರಂತ

Team Udayavani, Dec 9, 2021, 6:00 AM IST

ಮೂರು ಸಶಸ್ತ್ರ ಪಡೆಗಳ ಮೊಟ್ಟ ಮೊದಲ ಮುಖ್ಯಸ್ಥ ಜ| ಬಿಪಿನ್‌ ರಾವತ್‌ ಅವರ ನಿಧನ ದೇಶ ಅಷ್ಟು ಸುಲಭದಲ್ಲಿ ಅರಗಿಸಿಕೊಳ್ಳಲಾಗದ ದುರಂತ. ರಕ್ಷಣ ಕ್ಷೇತ್ರದಲ್ಲಿ ಸುಧಾರಣೆಯ ಬೀಜ ಬಿತ್ತಿದ್ದ ಜ| ಬಿಪಿನ್‌ ರಾವತ್‌ ಅವರು, ಕರ್ತವ್ಯದಲ್ಲಿದ್ದಾಗಲೇ ಹೆಲಿಕಾಪ್ಟರ್‌ ದುರಂತದಲ್ಲಿ ಸಾವನ್ನಪ್ಪಿದ್ದಾರೆ. ಇವರ ಜತೆಗೆ ಪತ್ನಿ ಮಧುಲಿಕಾ ರಾವತ್‌ ಮತ್ತು ಕಾಪ್ಟರ್‌ ಸಿಬಂದಿಯೂ ಸೇರಿ ಒಟ್ಟು 14 ಮಂದಿಯಲ್ಲಿ 13 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ.

ಜ| ಬಿಪಿನ್‌ ರಾವತ್‌ ಅವರಿದ್ದ ಹೆಲಿಕಾಪ್ಟರ್‌ ದುರಂತ ಹಲವು ಆತಂಕಕಾರಿ ಪ್ರಶ್ನೆಗಳನ್ನು ಎದುರಿಟ್ಟಿದೆ. ಸೇನಾ ಮುಖ್ಯಸ್ಥರು, ಪ್ರಧಾನಿ, ರಾಷ್ಟ್ರಪತಿ ಅವರನ್ನು ಹೊತ್ತೂಯ್ಯಬಲ್ಲ ಸಾಮರ್ಥ್ಯದ ಅತ್ಯಂತ ಸುರಕ್ಷಿತ ಎಂದೇ ಪರಿಗಣಿಸಲ್ಪಡುವ ಈ ಹೆಲಿಕಾಪ್ಟರ್‌ ದುರಂತಕ್ಕೀಡಾಗಿದ್ದು, ಸಾಮಾನ್ಯ ಸಂಗತಿಯಲ್ಲ. ಈ ಘಟನೆಗೆ ಏನು ಕಾರಣ ಎಂಬ ಲೆಕ್ಕಾಚಾರಗಳು, ಊಹೆಗಳು ಈಗ ಮೇಲುಗೈ ಸಾಧಿಸುತ್ತಿವೆ. ಈ ಕುರಿತು ಭಾರತೀಯ ವಾಯುದಳ ತನಿಖೆಗೆ ಆದೇಶಿಸಿದ್ದು, ಈ ದುರ್ಘ‌ಟನೆ ಹಿಂದಿನ ಸತ್ಯ ಹೊರಬೀಳುವವರೆಗೆ ದೇಶಕ್ಕೆ  ನೆಮ್ಮದಿ ಇಲ್ಲ. ಘಟನೆ ಹಿಂದೆ ವಿದ್ರೋಹಿಗಳ ಸಂಚು ಇದೆ ಎಂಬ ವ್ಯಾಖ್ಯಾನಗಳೂ ಕೇಳಿಬಂದವಾದರೂ, ಸತ್ಯಾಸತ್ಯತೆ ಹೊರಬೀಳುವ ತನಕ ಕಾಯಲೇಬೇಕು.

ಭಾರತೀಯ ಸೇನೆಯಲ್ಲಿ ಹೊಸ ಕ್ರಾಂತಿಕಾರಿ ಬದಲಾವಣೆಗಳನ್ನು ತಂದ  ಜ| ಬಿಪಿನ್‌ ರಾವತ್‌ ಅವರ ದುರಂತ ಸಾವು ಈ ದೇಶ ಇತಿಹಾಸದುದ್ದಕ್ಕೂ ಮರೆಯಲಾಗದ ಸಂಗತಿ. ಸೇನೆಗೆ ಬೇಕಾಗಿರುವ ಶಸ್ತ್ರಾಸ್ತ್ರಗಳಿಗಾಗಿ ವಿದೇಶಿ ಅವಲಂಬನೆ ಬಿಟ್ಟು, ಸ್ವದೇಶಿಯಾಗಿಯೇ ತಯಾರಿಸಬೇಕು ಎಂಬುದು ಇವರ ಮಹದಾಸೆಯಾಗಿತ್ತು. ಅಲ್ಲದೇ, ಸ್ವತಂತ್ರ ಭಾರತದಲ್ಲಿಯೇ ಮೊದಲ ಬಾರಿಗೆ ಇಂಥ ಸುಧಾರಣೆಗೆ ಜ|ರಾವತ್‌ ಅವರು ಕೈಹಾಕಿದ್ದರು.

ಇದನ್ನೂ ಓದಿ:ರಾವತ್ ಒಬ್ಬ ಅತ್ಯುತ್ತಮ ಸೈನಿಕ,ನಿಜವಾದ ದೇಶಭಕ್ತ: ಪ್ರಧಾನಿ ಮೋದಿ

2019ರ ಆರಂಭದಲ್ಲೇ ಸಿಡಿಎಸ್‌ ಅಧಿಕಾರ ವಹಿಸಿಕೊಂಡಿದ್ದ ಜ|ರಾವತ್‌ ಅವರು, ಭೂಸೇನೆ, ವಾಯುಸೇನೆ ಮತ್ತು ನೌಕಾದಳದ ನಡುವಿನ ಸಮನ್ವಯಕ್ಕಾಗಿ ಶ್ರಮಿಸುತ್ತಿದ್ದರು. ಅಲ್ಲದೆ, ಈ ಮೂರು ದಳಗಳನ್ನು ಒಳಗೊಂಡ ಕಮಾಂಡ್‌ವೊಂದನ್ನು ರಚಿಸಲು ಯೋಜನೆ ರೂಪಿಸಿದ್ದರು. ಇದನ್ನು ಪೂರ್ವ ಮತ್ತು ಪಶ್ಚಿಮದ ಮುಂಚೂಣಿ ನೆಲೆಗಳಲ್ಲಿ ಸ್ಥಾಪಿಸಲು ಮುಂದಾಗಿದ್ದರು. ಅಂದರೆ, ಪಾಕಿಸ್ತಾನ ಮತ್ತು ಚೀನಾದ ಯಾವುದೇ ಚಿತಾವಣೆಗೆ ತಕ್ಕ ಎದಿರೇಟು ನೀಡುವುದು ಇವರ ಆಲೋಚನೆಯಾಗಿತ್ತು. ಸದ್ಯ ದೇಶದಲ್ಲಿ 17 ಕಮಾಂಡ್‌ಗಳಿದ್ದು, ಭಾರತೀಯ ಸೇನೆ ಮತ್ತು ವಾಯುಸೇನೆಗೆ ತಲಾ 7 ಕಮಾಂಡ್‌ಗಳು ಮತ್ತು ನೌಕಾದಳಕ್ಕೆ ಮೂರು ಕಮಾಂಡ್‌ಗಳಿವೆ.

ಇದರ ಜತೆಗೆ ಮೂರು ದಳಗಳನ್ನು ಒಳಗೊಂಡ ಥಿಯೇಟರ್‌ ಕಮಾಂಡ್‌ ರಚನೆಗೂ ಜ|ರಾವತ್‌ ಅವರು ಮುಂದಾಗಿದ್ದರು. ಅಂದರೆ ನೌಕಾದಳ ಮತ್ತು ವಾಯು ಸೇನೆಗೆ ಸಮ್ಮಿಳಿತ ಕಮಾಂಡ್‌ಗಳನ್ನು ರಚಿಸುವ ಯೋಜನೆ ರೂಪಿಸಿದ್ದರು. ಇದಕ್ಕೆ ವಾಯುಸೇನೆಯ ಒಳಗೆ ಟೀಕೆಯೂ ವ್ಯಕ್ತವಾಗಿತ್ತು. ಆದರೂ, ಪ್ರಧಾನಿ ನರೇಂದ್ರ ಮೋದಿ ಮತ್ತು ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್‌ ದೋವಲ್‌ ಅವರ ಜತೆಗೆ ಉತ್ತಮ ಬಾಂಧವ್ಯ ಹೊಂದಿದ್ದ ಜ|ರಾವತ್‌ ಅವರು, ನೌಕಾದಳಕ್ಕಾಗಿ ಮೊದಲ ಸಮ್ಮಿಳಿತ ಕಮಾಂಡ್‌ ರಚನೆಯ ನಿರ್ಧಾರ ಮಾಡಿದ್ದರು. ಇದು 2022ರ ಮಧ್ಯಭಾಗದಲ್ಲಿ ಜಾರಿಗೆ ಬರಬೇಕಾಗಿತ್ತು.

2016ರಲ್ಲಿ ಭಾರತ, ಪಾಕ್‌ ಆಕ್ರಮಿತ ಕಾಶ್ಮೀರದಲ್ಲಿ ಸರ್ಜಿಕಲ್‌ ದಾಳಿ ನಡೆಸಿದಾಗ, ಇದರ ಯೋಜನೆ ರೂಪಿಸಿದ್ದವರು ಜ|ರಾವತ್‌ ಅವರು. ಅಲ್ಲದೆ ಈಶಾನ್ಯ ಭಾರತದಲ್ಲಿನ ಉಗ್ರವಾದ ಮಟ್ಟಹಾಕುವಲ್ಲಿಯೂ ಇವರ ಪಾತ್ರ ಗಣನೀಯವಾಗಿದೆ. ಯುದ್ಧತಂತ್ರ ವಿಚಾರದಲ್ಲಿ ನಿಪುಣರಾಗಿದ್ದ ಜ|ರಾವತ್‌ ಅವರು, ಸದಾ ಹಸನ್ಮುಖೀ. ಅಂದ ಹಾಗೆ, ಇವರು ಮಾಧ್ಯಮ ಮತ್ತು ಸಂವಹನ ವಿಭಾಗದಲ್ಲಿ ವ್ಯಾಸಂಗ ಮಾಡಿದ್ದರು.