Kasaragod ಮಹಿಳೆ ಆತ್ಮಹತ್ಯೆ : ಪತಿ, ಅತ್ತೆಗೆ ಕಠಿನ ಸಜೆ, ದಂಡ
Team Udayavani, Oct 27, 2023, 6:46 PM IST
ಕಾಸರಗೋಡು: ಗರ್ಭಿಣಿ ಮಹಿಳೆ ಪತಿಯ ಮನೆಯಲ್ಲಿ ಆತ್ಮಹತ್ಯೆಗೈದ ಪ್ರಕರಣಕ್ಕೆ ಸಂಬಂಧಿಸಿ ಮನೆಯಲ್ಲಿ ಕಿರುಕುಳ ಹಾಗು ಆತ್ಮಹತ್ಯೆಗೆ ಪ್ರೇರಣೆ ಅಪರಾಧದಲ್ಲಿ ಪತಿ ಹಾಗೂ ಪತಿಯ ತಾಯಿಗೆ ಕಠಿನ ಸಜೆ ಮತ್ತು ದಂಡ ವಿಧಿಸಿ ನ್ಯಾಯಾಲಯ ತೀರ್ಪು ನೀಡಿದೆ.
ಕಾಸರಗೋಡು ಪೊಲೀಸ್ ಠಾಣೆ ವ್ಯಾಪ್ತಿಯ ಸ್ವಾದಿಕ್ ಸುಲೈಮಾನ್ (35) ಮತ್ತು ತಾಯಿ ಆಸ್ಯ ಅಮ್ಮ (50)ಳಿಗೆ ಕಾಸರಗೋಡು ಎಡಿಶನಲ್ ಡಿಸ್ಟ್ರಿಕ್ಟ್ ಆ್ಯಂಡ್ ಸೆಶನ್ಸ್ ನ್ಯಾಯಾಲಯ(1) ಶಿಕ್ಷೆ ವಿಧಿಸಿದೆ. ಸ್ವಾದಿಕ್ ಸುಲೈಮಾನ್ಗೆ ಆರು ವರ್ಷ ಜೈಲು ಹಾಗೂ ಎರಡು ಲಕ್ಷ ರೂ. ದಂಡ ವಿಧಿಸಿದೆ. ದಂಡ ಪಾವತಿಸದಿದ್ದಲ್ಲಿ ಒಂದು ವರ್ಷ ಹೆಚ್ಚುವರಿ ಸಜೆ ಅನುಭವಿಸುವಂತೆ ತೀರ್ಪಿನಲ್ಲಿ ತಿಳಿಸಿದೆ.
ಆಸ್ಯ ಅಮ್ಮಳಿಗೆ ಎರಡು ವರ್ಷ ಜೈಲು ಹಾಗೂ ಎರಡು ಲಕ್ಷ ರೂ. ದಂಡ ವಿಧಿಸಿದೆ. ದಂಡ ಪಾವತಿಸದಿದ್ದಲ್ಲಿ ನಾಲ್ಕು ತಿಂಗಳು ಹೆಚ್ಚುವರಿ ಸಜೆ ಅನುಭವಿಸುವಂತೆ ತೀರ್ಪಿನಲ್ಲಿ ತಿಳಿಸಿದೆ.
2016 ಅ. 21ರಂದು ಮುಳ್ಳೇರಿಯ ಕಿನ್ನಿಂಗಾರಿನ ಮುಹಮ್ಮದ್ ಅಲಿ ಅವರ ಪುತ್ರಿ ಫಾಯಿಸ(23) ಪತಿಯ ಮನೆಯಲ್ಲಿ ಆತ್ಮಹತ್ಯೆಗೈದಿದ್ದರು. ಸಾವಿನ ಬಗ್ಗೆ ಸಂಶಯಿಸಿ ಫಾಯಿಸ ಮನೆಯವರು ಪೊಲೀಸರಿಗೆ ದೂರು ನೀಡಿದ್ದರು.